Vaiz 7:1-11

¹Yaxşı ad ətirli yağdan, Ölüm günü isə doğum günündən yaxşıdır.

²Yas evinə getmək Ziyafət evinə getməkdən yaxşıdır, Çünki hər kəsin axırı ölümdür. Gərək yaşayan hər adam Bunu yadında saxlasın.

³Qüssə gülməkdən yaxşıdır, Çünki üzün qəmgin olması İnsan üçün daha yaxşıdır.

⁴Hikmətli adamın ürəyi yas evindədir, Amma ağılsızın ürəyi şadlıq evində.

⁵Hikmətli adamın məzəmmətini eşitmək Ağılsızın nəğməsini eşitməkdən yaxşıdır.

⁶Çünki ağılsız adamın gülməyi Qazan altında yanan tikanlı kolun səsi kimidir. Bu da puçdur.

⁷Haram gəlir hikmətli adamı ağılsıza çevirir, Rüşvət isə ürəyi bərbad edir.

⁸Bir şeyin axırı əvvəlindən yaxşıdır, Səbirli adam qürurludan yaxşıdır.

⁹Qəzəblənməyə tələsmə, Çünki qəzəb ağılsızların Ürəyində yuva salar.

¹⁰“Niyə keçən günlər bu gündən yaxşı idi?” demə, Çünki verdiyin sual hikmətli sual deyil.

¹¹Hikmət miras mal qədər yaxşıdır, Dünyada yaşayan hər kəs üçün faydalıdır.