Uraata Kizin Ŋgoŋana 2:21-40

²¹Mi wal boozomen ta so titaŋroro Merere be iuulu zin, na ni ko ikamke zin ma timbot ambai.

²²“Tana niom tomtom ki Israel, keleŋ sua tiŋgi. Uraata mburanŋan mi mos bibip ta Yesu ki Nasaret ikam la mazwoyom na, niom kuute lup kek. Uraata ta Anutu ipomboli ma ikam, ina iswe i kembei: Ni Anutu iŋgo i.

²³Anutu, ni itunu ŋgar kini mi iur Yesu pataaŋa kek be ima nomoyom. Tanata niomŋan zin Rom kan tau titoto tutu som na, kupuni ma imeete sala ke pambaaraŋana.

²⁴Tamen meeteŋana irao ikisi na som. Pa Anutu itatke i pa meeteŋana mburaana, mi iwiti ma burup ma imaŋga pa naala.

²⁵Ka sua, Dabit iso ta muŋgu kek. Pa iso: Nio aŋre Merere imbotmbot kereŋ uunu totomen. Ni imbotmbot raama yo mi ikiskis yo. Tana kosa sa ko irao ikam yo ma aŋtop na som.

²⁶Iŋgi tabe ikam yo ma leleŋ ambai kat, mi aŋso sua raama menmeen yo. Ŋonoono, nio ko aŋmeete. Pa nio tomtom toono koŋ. Tamen kopoŋ rru som. Iŋgi aŋmbotmbot mi aŋurur motoŋ pu men tau.

²⁷Pa nu irao zem yo ma aŋmeete mi aŋsula Andewa be aŋbot na som. Nu irao zem mbesooŋo ku potomŋana ma ibuuzu na som.

²⁸Nu patooŋo yo pa zaala ki mbotŋana mata yaryaaraŋana. Mi nu ko kam yo ma aŋbot su kerem uunu, mi kam ma leleŋ ndabok men.

²⁹“O atoŋan mi tiziŋan. Nio leleŋ be aŋso kat yom pa tumbundu Dabit. Ni imeete ma titwi i ta muŋgu kek. Ma naala kini ta imbotmbot men kar ti.

³⁰Tamen Dabit, ni Anutu kwoono. Mi ni iute tau Anutu imbuk sua mbolŋana pini be kaimer to iur popoŋana kini sa ma iwe king kembei ni itunu.

³¹Ni ire mbulu tabe ipet pa kaimer i. Tanata iso pa maŋgaŋana ki Mesia, mi iso Anutu ko irao izemi ma imeete mi isula Andewa be imbot na som. Mi irao izemi ma ibuuzu na som.

³²“Mi Yesu ta amzzo yom pini i, ta Anutu iwiti ma burup ma imaŋga mini pa naala. Niam ta boozomen ti amre kat pa motoyam, tanata ampombolmbol ka sua.

³³Ni, Anutu ipakuri, mi iuri ma imbot la namaana woono. Mi Tamaana ikam Bubuŋana Potomŋana pini kek. Ito itunu sua kini mbukŋana tau. Bubuŋana tana, ta Yesu kadoono ikam ma isalakaala yam, mi iŋgi kere mi keleŋ i.

³⁴Mi Dabit itunu na, isala saamba som. Tamen ni iso ta kembei. Iso: Merere iso pa Biibi tio ta kembei: Mar mbulem su ta nomoŋ woono i

³⁵ma irao aŋkoto kom koi bizin ma mburan imap kat, mi kumbum ise ŋguren.’

³⁶“Tana niom Israel ta munŋaana men, keleŋ kat. Yesu ta kupuni ma imeete sala ke pambaaraŋana, ta Anutu iuri ma iwe Merere mi Mesia.”

³⁷Tomtom tileŋ la pa sua tana ma ambai som. Pa sua iŋgal zin. To tisu na tiso pa Petrus bizin. Tiso: “Wai toyamŋan, kenako amkam parei?”

³⁸Petrus ipekel kwon ma iso: “Kozo kamap kotooro leleyom, mi kakam yok pa Yesu Krisi zaana. Naso sanaana tiom ila ne, mi ni ipomoozo yom ma ikam Bubuŋana Potomŋana piom.

³⁹Pa sua mbukŋana ti, iŋgi ima pa niom Israel niomŋan lutuyom bizin, mi zin iwal karkari ta timbot lele molo na tomini. Pa wal boozomen ta sombe Merere Anutu kiti iboobo zin na, sua mbukŋana tiŋgi imar pizin.”

⁴⁰Petrus iso sua tiŋgi men som. Kwoono imbol pizin pa sua boozomen. Pa isombe ikam zin ma tiurla ki Krisi. Tana iso pizin ma iso: “Motoyom iŋgal mi kuru zaala pa ituyom be kombot ambai. Pa iŋgi kombot la wal sananŋan lelen. Kokena niomŋan kala leyom.”