HECHOS 2:21-40

²¹Jinq'uinba, upete machcatac u c'atben Cajnojala que u japänba, u xe chich u japän.

²²Aj Pedro u yäli tä cha'num ca'da: ―Anela lo' Israel, ubinla ni t'anda: Jini winic aj Jesús aj Nazaretba, Dios chich u ye'betla cache' une u täsqui, uc'a u chi q'uen cua' chichca t'oc u poder, y u chi q'uen cua' chichca que mach bay u chi trebe u chen niuntu winic, y u chi täcä cua' chichca tuba chänintic. Dios chich u yäc'bi u chen ca' jini bajca anetla, ca' chich anela täcä a wila.

²³Jinchichba Jesús äc'qui ta' c'äbla ca' chich u yäq'ui Dios utic, uc'a che' chich worin ajni tu c'ajalin. Anelaba a q'uechila, a wäq'uila tu c'äb ajmalujlejob tuba u tzämsenob baja tä cruz.

²⁴Une chich ni u tz'osi Dios tan ajchämejob, y u pa'säbi u poder chämo tuyac'o uc'a mach u ch'ä colac paq'uin chämen.

²⁵Aj Jesús chich une ni u tz'aycun aj David oni jinq'uin u yäli ca'daba: Acä paq'uin chäni Ajnoja cache' ayan t'oc no'on. Uc'a ya'an täc noj, mach'an cua' u jobän cä c'ajalin.

²⁶Jin uc'a ch'a'ali cäjin tan cä pixan, y ch'a'a cäjin cä chen t'an. Cä cuerpo täcä u c'alin pitän u q'uini que a xe a tz'osen tan ajchäme.

²⁷Uc'a ane mach uxet a wäctan cä pixan tu yajliba ajchämejob. Ane mach uxet a wäq'ue' tä c'u'nan cä cuerpo täcä, no'on que a Ch'u'ul Winiconba.

²⁸Ane a ye'bon jini bij que u bixe bajca paq'uin cuxlec untu. Ane a xe a c'alin ch'a'alesbenon cäjin ajnicon bajca anet.

²⁹’Anela cä lot, a wila chich cache' cä papla aj David chämi, mujqui, y ya'to an u mujquiba bajca anonla bada.

³⁰Uneba ajt'an ta Dios une, y yuwi chich cache' toj cua' u yälbi Dios. Dios u totoj älbi aj David cache' u xe u yäq'ue' untu de u natil ch'oc aj David ochic de ajnoja, ca' chich uneba. Jindaba aj Cristo une.

³¹Aj David worin yuwi ni jini, jin uc'a u yäli cache' aj Cristo u xe tä cuxpan, y u pixan mach uxin tä äctinte tan u yajliba ajchämejob, y u cuerpo mach uxin tä c'u'nan.

³²Jinchichba Jesús Dios u cuxpesi, cäpete t'ocob cä chäni t'ocob cache' toj.

³³Dios chich u bisi tä cielo t'oc u poder. Y u ch'i tu c'äb u Pap ni Ch'u'ul Pixan ca' chich älbintiba, jin uc'a u puqui jini a chänila samiba, jini a ubilaba.

³⁴Mach jin aj David ni t'äbi tä cieloba. Uneba u yäli ca'da: Ajnoja Dios u yälbi Cajnoja: “Chumi' täc noj.

³⁵Pijnan cä'benet a tzupsäben u poder jini que mach yo u chänenetob. Ca' a wälä a xäc'teq'ue' t'oc a woc”.

³⁶’Wina'tanla jiq'uin tu toja apetela, lo' Israel, cache' jinchichba Jesús que a tzämsilaba, Dios u yäc'bi ajnic de Ajnoja y de Cristo, jini cä pitänlaba.

³⁷Jinq'uin u yubijob ca'da, ch'ocomi u pixanob y u yälbijob aj Pedro t'oc ni otros ajc'äncanob tuba aj Jesucristoba ca'da: ―Cä lot, ¿cua' c'änä cä chen t'ocob jiq'uin?

³⁸Aj Pedro u yälbijob: ―Q'uexe a c'ajalinla tuba mach a ni' chen a tanäla, laj c'ablaquetla t'oc u c'aba' aj Jesucristo tuba pa'säbintiquetla a tanäla, y a xe a mätanla ni Ch'u'ul Pixan.

³⁹Uc'a ta'ala une jini u yäli Dios u xe u yäq'ue'ba, tuba a ch'ocob, tuba täcä upetejob machcatac an natba, upete machcatac Cajnojala Dios u xe u yacän tuba u japän uba.

⁴⁰Q'uen otros t'an täcä u bon älbijob, y u yäc'bijob c'ajalin ca'da: ―Tz'eje abala t'oc ni genteda que mach unum tu tojaba.