Pas misnare wok 2:21-40

²¹Bat ebriwan uda go kole neim blo da AntapGod, i gobi seib.’”

²²‘Pipol blo Izrael, yupla lisen nau. God bin sane Zizas blo Nazaret ane em bin meke dem mirikal, ol spesil gudsamting ane gudsain po soe yumpla God i wok tru em.

²³God bin laue yupla po kese Zizas ane tugeda wea dem nugudpipol, yupla bin neile em wea da kros po kile em. Diswan bin dat longtaim plan blo God.

²⁴Bat God bin lete em pri prom da paua blo ded ane em bin mekem laipgen. Bikoz ded nogad no paua po kip em, em mas kamlaipgen.

²⁵King Deibid bin raitem diskain baut Zizas: “Ai sabe da AntapGod i bin mata stap wea mi. Em oltaim wea mi po elpe mi. Em gibe mi da strong so ai nogo poldaun, bikoz em ya klostu wea mi.

²⁶Daswai at blo mi i prapa glad ane api. Ai preize God, ane iben ip ai go ded, ai sabe ai go kamlaipgen.

²⁷Yu God, yu nogo libe spirit blo mi wea greib wea ol dem dedwan i stap. Yu nogo lete Oliwan blo yu po ratan wea da greib.

²⁸Yu bin soe mi da rod blo trulaip. Yu meke mi prapa api bikoz yu oltaim stap klostu wea mi.”

²⁹‘Kantriman blo mi, yumpla sabe King Deibid i bipotaim pamle blo yumpla, ane em pinis ded ane em wea greib ane yumpla sabe wea da greib blo em nau tidei.

³⁰Bat Deibid i bin wan dem bipotaim spesilmesizman blo God. God bin meke strongpromis po Deibid diskain, sambodi go kam prom pamlelain blo em uda gobi king oba em. Ane sambodi go sidaun wea tron blo Deibid.

³¹God bin soe Deibid demting wanem i go apen. So em bin spikbaut da Promiswan uda God i go sanem kam, em go gedap laipwan prom da greib ane em nogo stap wea ol dem dedwan ane bodi blo em nogo ratan.

³²‘Zizas dis Promiswan, em da wan uda God i bin mekem kamlaipgen prom ded ane mipla ebriwan i bin witnis i tru, Zizas em laip.

³³Nau Zizas em de wea da ples blo ona wea raitansaid blo God. PapaGod bin gibe em da OliSpirit wea em i bin promis em. So nau Zizas bin sane da OliSpirit po yumpla. Disting i apen ya nau tidei wiskain yumpla luk ane lisen.

³⁴Deibid emselp no bin go antap wea eben wase Zizas, bat em bin spik diskain: “Da AntapGod bin spik po da BosLod blo mi, ‘Sidaun ya wea raitansaid blo mi, da ples blo ona,

³⁵antil ai go prapa smase enami blo yu ane meke dempla baudaun ane leidaun prant wea put blo yu.’”

³⁶‘So ebriwan yupla ya wea dis kantri blo Izrael mas bilib wea at blo yupla dat God bin meke Zizas BosLod ane Promiswan blo da wold. Da seim Zizas yupla bin pute em wea da kros po kile em!’

³⁷Wen dem pipol wea dat mob bin lisen wanem Pita bin spik, dempla bin prapa nadakain akan ane dempla bin aske Pita ane ol dem nada misnareman, ‘Wanem mipla go mekem nau a?’

³⁸Pita spik baigen po dempla, ‘Yupla ebriwan mas sluraun prom dem nugudwei blo yupla ane yupla mas baptaiz wea neim blo Zizas Kraist. Den God go pogibe yupla ane em go gibe yupla da OliSpirit.

³⁹Dis promis ya blo God i po yumpla ane po ol pikinini blo yumpla ane ol dem Nozuwispipol. Dis promis i po ebriwan uda AntapGod go singaut po kam po em.’

⁴⁰Pita bin spik mostrong po dempla baut Zizas, ‘Ai wone yupla, no teke wei blo dempla uda pole dem nugudwei.’