Tuwalali 2:2-36

²Yaka butun etega i loem labulabumwa i ola mana gasigasisena butuna ge limi toto hi miminaa gamwana gegewena i pakalaopop.

³Inoke bugul etega hi kite, ana awa i ola ginaha memena i lovaleyan i tala maisena ge maisena pwataliyaa.

⁴Inoke hi gewigewi Yayaluwa Bwabwalena hi kalaopopwi ge hi telipuna anan getoga ona hi baubaunan, i ola Yayaluwa Bwabwalena wana pek.

⁵Saugena o Yudiya gamagaliliyau bolo wali tapwalolo hi nuwahikan bubun hi gewi heliya iyoho Yelusalema, hi noem panuwa gegewel panayawi pwatanaa hagali kaiwena.

⁶Sauga butun ya hi hago, yaka boda bwabwatana hi nogogo hi nowanik. Hi gewigewi nuwaliya hi ahe, kaiwena hi hago toabulilek hi baaba gamagal maisena ge maisena anana elana.

⁷Ateliya i you ge hi nuwa gewagewa, inoke hi ba, “Gamagalau bolo hi baaba ya, heliya Galili gamagaliliyau.

⁸Ga i ola ge kila maisena maisena ta hagol hi baaba anala tomaha ge tomaha elana?

⁹Kilau ta neem Patiya, Midiya, ge Elam; Mesopoteimiya, Yudiya, ge Kapadosiya; Pontas ge Eisiya;

¹⁰ta neem al Piligiya, Pampiliya ge Itipita ge Libiya ana labi elal, bolo panuwa Sailini labenaa. Enuna ta neem Loma,

¹¹kilau enuna Yudiya gamagaliliyau, enuna nige Yudiya gamagaliliyau i oola yaa Yudiya wali tapwalolo iyaka ta ahe, ge kilau enuna ta neem Kiliti ge Alebiya—yaa kila maisena ge maisena ta hagol Yehoba wana ginol bwabwatal hi wasaan anala tomaha ge tomaha elana.”

¹²Gegewel ateliya i you ge nuwaliya i samwawinwin, inoke avaliyau hi nelil hi ba, “Bugul ya ana sapu ga i ola?”

¹³Yaa enuna toabulilek hi talawasi-agil hi ba, “Gamagalau ya oine hi im nabiyan.”

¹⁴Inoke Pita i milil, alonau ge alonau ali toto elulutega maisena, ge i baaba boda elal, anana i bwata, i ba, “Taliwau ge nuwau, Yudiya gamagaliliyau ge Yelusalema ana tomina ku gewigewi, no baaba nuku hago ge nuwamiu ni sapu.

¹⁵Ama nige ha iim kokona i oola wami nuwatu. Sauga ya naen kilok mweluluga ya te, ge nige kila wala pagan i oola tage oine ta im mweluluge.

¹⁶Bugul toto sauga ya ku kite heiya toto palopita Yoeli i baunan, i ba:

¹⁷Yehoba i ba, ‘Sauga mowamowasena elana, Yayaluwau na ligin gamagalau gegewel elal. Inoke natumiyau melubolau ge meluyowau nihi palopisai, i ola al wami hevalau ge wami tonowakau pankite ge kenonou toto i neem Yehoba elana nihi kite ge nihi kenonouan.

¹⁸Ibwe, lan bolo o elal, Yayaluwau na ligin al no totuwalali melubolau ge meluyowau elal, inoke nihi palopisai.

¹⁹Ginol yawiyawi na ginolil labulabumwa, sabwelu ni gogou ge waikena ni ket ni ola saliya; ge abapankite na ginolil panayawiya, saliya, ginaha ge kasu babalona nihi masal. Bugul bolo o nihi masal, mulaa abwe Babala wana lan bwabwatana ge wawasana ni vin.

²¹Ge inoke henala ebo labe kaiwena ni awanun Babala elana mwal ni pwawa.’”

²²Pita i ba al i ba, “Gamagalau Isileli, ku laegan no baaba ya elana! Yehoba i pankitemiu tunahot iya wana totuwalali te Yeisu, kaiwena gasisi ge ginol yawiyawi i talamwan Yeisu i ginolil. Iyaka ku atena to, kaiwena i ginol gamwamiwa.

²³Houhouwena Yehoba i nuwatu haba Yeisu kaiwena inoke i talamwan nimamiwa inoke alomiyau ge Loma, gamagalau nanakil, ku lokolosan ge i yaomal.

²⁴Yaa Yehoba i palutem salaiya ge i pwamwalem yaomal wana gasisi elana, kaiwena yaomal nige i bosowaina ni kukuhikan.

²⁵He Yeisu bana te Deibid i ba ola hiwe: Yehoba ya kite i houwa-agau sauga gegewena, nige bugul etega ni papalamwalamwaniu-agau, kaiwena iya i minaa labeu awowa.

²⁶Inoke nuwau i waisi ge no baaba i yaliyaliyaya. Bwagana ebo abwe na aliga, Yehoba wam bateli ya nuwahikan ge ateu i matuwaan,

²⁷kaiwena nige nu teteli yohau salaiya, nige nu tatalam wam totuwalali bwabwalena tuwana ni bwebweyan.

²⁸Yawal ana kamwasa iyaka u pankiteyau, wam yaliyaya ni pakalaopopwau kaiwena na minaa maninimwa.

²⁹“Taliwau ge nuwau, na ba bubun ya. Tubula kin Deibid i yaomal ge hi yamwi, salaina iyahe te i minamina lan ebe.

³⁰Yaa iya palopita, ge i atena Yehoba bateli gasigasisena etegana i ginol te tubutubunina etega ni tabwa kin ni ola iya.

³¹Inoke i kite pahuwala hauna abwe Yehoba ni ginol, yaka Mesaiya wana lut al bana i ba te Yehoba nige i teteli yoho salaiya, ge tuwana nige ni bwebweyan.

³²Yeisu toto ya Yehoba i palutem yaomala, ge ama ha kite ha tabwa ana towasa.

³³I ha labulabumwa i minaa Yehoba labena awonaa, yaka Yayaluwa Bwabwalena i aheya Tamana elana i ola wana bateli. Inoke i ligin eliyama ge bugul bolo sauga ya ku kite ge ku hago hi masal.

³⁴He nige Deibid i haha labulabumwa, yaa iya i ba: Yehoba i baek no Babala elana i ba, ‘U misiyowa labeu awowa

³⁵inoke am topihigelgel na teli lowagil aem gabulanaa.’

³⁶“Gamagalau Isileli ku gewigewi, nuku atena bubun Yeisu toto komiu ku lokolosan, Yehoba i teli heyan iya Babala ge Mesaiya.”