Te Israel Tobolu Bidi Dabe 6:6-20

⁶tama te Israel dabego te augwali dali hwįabo bomo meni yani. Tama te Israel dabego te augwa Genuai Bidiba gela weyu, te augwali tau sao wali.

⁷Te Midian dabego te Israel dabe augwali dolali sogo, teda te Israel dabego te augwa Genuai Bidiba gela weyu, te augwali tau sao wali.

⁸Tama Genuai Bidigo profet me deli te augwaliba tagala palali. Te profetgo Godigo te po sali, te Israel bagego Genuai Bidi dao. Tama agai te po wali, “Eno dage odasa asaligo tama dage te Isipde kalabus sę yali taga soai dao.

⁹Eno dage te Isip dabego nogode ma dobola selama tialigo tama e tǫde te bidi dabego dage dali te boi hwįani. Te dage asali sogo, te eno augwali ela gudulai. Tama augwaligo tǫ te eno dagebolo mawai dao.

¹⁰Tama eno dagebolo wali, ‘Ena te God, duga Genuai Bidi da,’ po wai. ‘Dagego te Amor dabego tibo godiba lotu me olamu da,’ po wali. ‘Te bidi dabe augwaligo tǫde dage bidalu, te augwaligo tibo godiba lotu po me wagio,’ po wali. Tiali goli, dagego eno po me odobeo.” Profet bidi me deligo te Genuai Bidigo po wali.

¹¹Nosali Genuai Bidigo Mobo Bidi ensel asama, tama te moni ni te Ofra bulu pąde te ni dologode bidagasali, te Abiesergo hani bidi Joasgo bulude. Te aga ogwa Gideon, aga te Midian dabede wi ebaso, tama aga te wit agabo masigi me deli te tǫ dedage tiwai elalubo madi tede te geme duala sigi pelama bididuali. Tama agai te wit bo wali sela sąbo sę iduai.

¹²Tama Genuai Bidigo Mobo Bidi ensel agaba pedelama, tama te po wai, “Nage te boi hwįabo bomai bidi dao, te Genuai Bidi nage dali bidibao!” Te po wai.

¹³Tama Gideongo agabolo te po wali, “Genuai bidi, eno te po me deli nagebolo hanalu obao. Te Genuai Bidi da dali bidibao wida, magi baso te dwai sę dabolo pedelama elalubawe? Tama agai polobadu dago hani tau sali wiegi yai kolesaga, te tobage kolesaga agai te megi ma ebo menio. Magi basowe? Agai te dago wąį dabe te Isipdu sela soali, tama dago aya dedego dabolo te tiwai po pusai. Tiali goli, megi da, Genuai Bidigo da tagalama, tama da te Midian dabego nogode bidibao.” Gideongo te po wali.

¹⁴Tama Genuai Bidigo agabolo te po wali, “Nago bomo tigidali dali te nage pelama, tama nago te Israel dabe te Midian dabego nogode ma dobola sao. Ena digi eno nage tagala palobao,” wali.

¹⁵Tama Gideongo te tiwai po wei ponani, “Tiali goli, Genuai Bidio, te eno Israel dabe mena tama ma dobola sogowe? Eno hanigo bomo menio. Te gasa Manasego hani dabego da aiyaba elaluali. Tama ena da, te ena hanide te olo nai tiwai elalubao,” wali.

¹⁶Tama Genuai Bidigo agabolo te po wai, “Nago ebo usu yaibao, magi baso meni, te eno nage tau saibao. Te nago Midian dabe eliyu, te bidi deli elibo te tiwai yaibao.” Te po wai.

¹⁷Tialima, Gideongo te tiwai po wei ponai, “Te ena nago gedude dwagi yai bidi da omainogo da, nago enabolo te eno koneabo dąį me deli ilibaso, teda eno koneama, te nage Genuai Bidigo digi te ena dali po miani, te eno koneaibao.

¹⁸Tama nage me pigio. Te nai meba eno nagebolo te wiegi yai homu ilama ofa mawaibao,” wali. Tama Mobo Bidi enselgo te po wali, “Te ena nage asobo tonalu bidaibao.”

¹⁹Tama Gideon te aga be tomoba pelama, tama te ogwa bidi tamadi nisai meme me deli elama ulali. Tama agai te plaua meba ulali, te naigo sęgę te 10 kilo, tama yis meni yai. Agai te kibu mi te basket me delide muani, te sup ulali te poude muai. Tama agai te nai te Genuai Bidigo Mobo Bidi ensel te moni ni dologode bidibadi teba magi pali.

²⁰Tama ensel agabolo te po wali, “Te kibu mi dali te bret me te masigi daiba manao,” wali. “Tama te naiba ugwadu te sup gelao.” Tama Gideongo tama tiwai yali.