Tauwai 2:5-19

⁵Tagu kai votevotedi ani kani tabudi bi tabudi e wadidi.

⁶Bi doba e voiye egu kai wapewapedi ani wai utuvidi aubaidi.

⁷Tagu egu taupaulayababa wapawapa, waivini bi oloto e gimala bi taupaulayababa waivinidi ai natuna te taupaulayababa wapawapa a bewedi egu vanuwemo. Bi egu kau bi sipu dubudi wapewapedi, wala mote mainana ḡaliḡalibona dolidolidi Yelusalemmo.

⁸Tagu silva, gold bi ḡaliḡalibona edi waiguyau ḡoneḡonedi e legaudi dobu ḡesaudiḡa. Tagu olooloto bi waiwaivini tausale bi kota vesavesala mulemuleledi wapewapedi e legaudi bi sa voiyegu te yài nuwavisu.

⁹Bi ei ḡonaḡona gulata mote aiyai mainana wala Yelusalem malagainemo. Bi niga kauwidimo egu nuwauyauya lisigumo i kena.

¹⁰Bai matabudi e kitedi bi e ḡoeḡoedina e legaudi, ani wainuwavisugu aubaina. Bi mote bai ḡesauna e daboke. Tagu egu noyamo e wainuwavisu bi mba taunana egu noya maiina.

¹¹Mwali e voivoiyedina e noḡotiwatedi te e noya gulata. Bi matabudi e kita kovidi te banidi geḡa. Mba maibena yavala e kwavikwavi. Bi niga dobunemo mote bai ḡesauna yàma vai.

¹²Nuwauyauya bi mote noḡota kauwa lavedi e noḡoti waitetedi. Lava aiyai muliḡa bi yai ḡalibonana ba bai e voivoiyena mainana ya voiye.

¹³Bi e banavi te nuwauyauya i visuna kaka noḡota balebaledi, mba mainana yanayana i visuna kaka boimatuwa.

¹⁴Lava nuwauyauyana ba manoḡotina ya nawanawa, bi lava ena kauwa mai bu'uwa, ba ena nawa maibena boimatuwaḡa ya nawanawa. Bi e sibe te niga kauwidi ḡemotidi kota labuidi lisidimo ya tubuḡa.

¹⁵Bi nopogumo ei noḡotana gado, “Bai bu'uwa lisinemo i tubutubuḡana, male mainana lisigumo ya tubuḡa, bi e banavi munaḡegu, te egu nuwauyauya banina geḡa.

¹⁶Bi laḡan muliḡa nuwauyauya, bi bu'uwa lavedi mote aiyai ima noḡoti watedi. Banina nuwauyauya lavana ya pekina mainana kota bu'uwa lavana ya peki.”

¹⁷Taunana aubaina yawasana e tunidaboke banina bai matabuna niga dobunemo yà voivoiyedina ba pilipili sa vitevitegu maibena yavala kwavikwavi.

¹⁸Tagu yà pekina ba mwali matabudi e voivoiyedina yà gose kamaḡedi lava ḡesau lisinemo. Taunana aubaina niga dobunemo egu noya e daboke.

¹⁹Tagu egu nuwauyauyamo e noya gulata te mwali matabudi niga dobunemo e legaudi. Bi e kita te mote ei nuwavisu banina lava ḡesau mote i noyae bi waiguyauna ya vai bi ya labe kauwe e geḡa. Mba lavana nuwanuwauyauyana e bu'ubu'uwina, taunana aubaina mote ei nuwavisu, niga kauwa kavekavedi.