Tauwai 1:4-18

⁴Bi tubulelesa ya pekipeki bi ya tubutubuḡa. Bi niga dobuna mainana kitana ya kenakena.

⁵Suwala ya lovotava bi ya nawa ya bulu, bi ya nawa te gabunemo ya tavatava munaḡa.

⁶Yavala ya lausuve nawa oyaḡa bi kota ya lausuve nawa nisaḡa, ya wai kwaikwaivivila, bi gabunemo ya tava bi ya wai tubu munaḡe.

⁷Gauba matabudi, sa yovo sa nawanawa nisamo. Bi nisa mote bamo ima wanawanavu, bi sa munaḡa gabudimo sa tava te kota sawai tubu munaḡe.

⁸Mwalidi matabudi ḡemotidi sa tubutubuḡa te ta kitekitedi bi ta vaivaiyedi. Te tunida ya daboka bi giuwatedi mote tama ḡoeḡoe.

⁹Bi mwali matabudi wala nove a tubutubuḡana ba niganana kota sa tubutubuḡa munaḡa. Bai a voivoiyedina ba kota ḡemotidi sa voivoiye munaḡedi. Bi mote bamo bai ḡesau valivaliuna niga dobunemo kuma kita.

¹⁰Lava mote kaka ima giu gado, ‘Kwa kita niga mwali valivaliuna.’ Geḡa, mwali nove mai kenekenedi, muliḡa kaka tada te tubuḡa.

¹¹Mwali bai wala nove a tubutubuḡana, ee bai niganana ta voivoiyedina, mote lava kaka muliḡa sima noḡotiwatedi.”

¹²Tagu tauwailovelove, Islael lavedi edi ḡalibona Yelusalem tauninemo.

¹³Egu nuwauyauyamo e laulubu te mwali matabudi niga dobunemo maso e sibe kauwedi. Ei noḡotana gado, “Maimaituwa lava noya matabudi i vitedi bi sa noyanoyaedi bi geḡa te noyedimo tunidi sa kwapukwapudi.”

¹⁴Lava niga dobunemo noya matabudi sa voivoiyedina e kita kovidi bi matabuna ba banina geḡa, mba maibena yavala sa kwavikwavi.

¹⁵Lava mote ḡemoḡemotina te mwali bai i balabalana mote kaka ima ka didimani. Bi bai mwalina kwa malumaluwabiyena mote kuma laupatupatuwe.

¹⁶Tauguḡa ei nuwa noḡonoḡotana gado, “Ei, tagu e nuwauyauya kauwa kaka wala ḡaliḡalibona ḡesaudi Yelusalemmo a waibadaena. Tagu egu nuwauyauya bi egu anapu i tausaḡana kaka tedi.

¹⁷Tagu e sibe kauwe te nuwauyauya, bu'uwa bi kauwa yabayababa sibedi ba maibena yavala kwavidi.

¹⁸Bamoda e nuwauyauya gulatana ba yai nuwaboya gulata. Bi kota e anapu gulatana ba kota egu nuwaboya ya didiga gulata.”