Sua Tutŋana 30:3-14

³Nio, tipaute yo pa ŋgar ambaiŋana som. Mi Anutu potomŋana na, aŋute kati som.

⁴Lak, asiŋ ta isala saamba, mi isu mini be iso ka sua? Mi asiŋ ta ikiskis miiri ila namaana keteene, mi iurur yaŋ ilala miiri tiene? Asiŋ iur toono ka seŋgaaŋa ta boozomen? Ni zaana asiŋ, mi lutuunu zaana asiŋ? Sombe nu ute, na so yo lak!

⁵Anutu sua kini ta boozomen na, totoombo ma tikilaala kek: Ina ŋonoono men. Mi zin wal ta tipase pini be iporoukaala zin na, ni iwe siŋgiao pizin.

⁶Re: Kokena pagaaba sua ku ila raama sua kini, to ni iyaambu, mi tomtom tiso nu kwom pakamkaamŋom.

⁷O Yooba, koroŋ ru ta nio leleŋ be aŋwi u pa. Mazwaana ta aŋbotmbot su toono na, ruutu koroŋ ru taiŋgi pio pepe.

⁸Mbulu boozomen ta pakamkaamŋan mi ŋonon somŋan na, ziiri ma timbotmbot molo pio. Mboro kat yo. Kokena leŋ koroŋ som mi aŋbot ŋoobo, som leŋ koroŋ boozo mete. Kam koŋ kini ta irao yo.

⁹Pa sombe leŋ koroŋ boozo mete, nako aŋpizil ndemeŋ pu mi aŋrepiilu ma aŋso: “Yooba, ni asiŋ?” Mi sombe leŋ koroŋ som mi aŋbot ŋoobo, nako aŋkam kuumbu mi aŋpamiaŋ Anutu tio zaana.

¹⁰La ki biibi sa ma ŋgal sorok sua pa mbesooŋo kini pepe. Kokena mbesooŋo tana ileŋ, to isuŋ Anutu be ipasaanu. Pa nu uunu ku.

¹¹Tomtom pakan, zin tizuŋzuŋ Anutu be ikampe nan bizin som, mi tigibgiibi sua sananŋan boozomen pa taman bizin.

¹²Mi wal pakan na, tire zitun kembei mbulu kizin iŋgeeze men. Tamen mbulu kizin pakan ta tikamam ki keŋana na, sananŋana kat. Iŋgeeze som.

¹³Mi tomtom pakan na, tipakurkur zitun, mi matan pasom waen bizin pakan ma tau!

¹⁴Mi wal pakan na, kwon kembei ta buza. Sua kizin ipasansaana kat zin wal sorrokŋan ta timbotmbot raama pataŋana na, Pa tisombe tipambiriizi zin ma timap kat pa toono.