Sua Tutŋana 24:1-23

¹Wal sananŋan na, motom berber pizin pepe, tikam lelem pepe, mi gabgaaba zin pepe.

²Pa wal ta kembei lelen be tikamam zaaba pizin tomtom. Gorgori tiluplup zin mi timburmbuuru pizin tomtom.

³Sombe ŋgar kiti ipet mi takam ŋgar ambaiŋana ma iwe lende, nako tuurpe mbulu kiti mi mboti kiti. Naso itiŋan wal kiti tombot ambai. Ko kembei topo lende ruumu ambaiŋana be tombot lela.

⁴Pa ŋgar ta iwe zaala piti be ruumu kiti bok pa koroŋ ambaimbaiŋan mi ndabokbokŋan matakiŋa ta kan kadon bibip i.

⁵Tomtom ta le ŋgar ambaiŋana na, ni ilip pizin wal ta len mburan biibi na. Gorgori wal ŋgarŋan mburan izze.

⁶Iti sombe lelende be takam malmal, na turu zin wal ŋgarŋan be tikam peeze piti mi tiso iti pa malmal ka zaala. Pa bela wal boozo tiuulu iti pa ŋgar kizin, tona tilip pa kanda koi bizin.

⁷Wal kankaanaŋan ta tizorzooro na, tikam kinkiini pa ŋgar ambaiŋana. Mi tirao som. Tana sombe tomtom tilup zin pa sua, na wal kankaanaŋan len sua sa som. Timaane men.

⁸Tomtom ta so gorgori irru zaala be ikam mbulu sananŋana, nako tipaati be pakaamŋana katuunu.

⁹Wal kankaanaŋan ta tizorzooro na, sombe tirru zaala pa koroŋ sa, na ŋgar kizin ilala pa zaala sananŋan men. Mi zin wal ta tipakurkur zitun mi tirepilpiili ŋgar ambaiŋana na, tomtom lelen pizin ri sa som kat.

¹⁰Sombe nu mbotmbot la pataŋana sa leleene mi mburom imap, na nu tomtom ŋonoono som. Pa zin wal ta tomtom ŋonoono na, timendernder mbolŋana mi tirao be tibaada pataŋana.

¹¹Zin wal ta len uunu sa som, mi kan koi bizin tikam zin sorok ma tila be tipun zin ma timeete na, re be tatke zin la kan koi bizin naman. Mi zin wal ta titoto zaala ki meeteŋana mi sursur ma tila na, karau men la mi kamke zin.

¹²Kokena pakaam ma so: “Wai, mi mbulu ta iwedet pizin na, niam ti amute som.” Pa Anutu, ni irre iti tomtom lelende ma imap. Tana mbulu ta kam na, ni iute kek. Pa Ni ta imborro u na, ikankaana pu som. Mi ni kola iur kadoono piti tomtom tataŋa ikot mbulu kiti kiti.

¹³O lutuŋ, win bigil suruunu. Pa ina koroŋ ambaiŋana. Sombe win, na inamut kat.

¹⁴Mi ŋgar ambaiŋana ta kembena. Nio leleŋ be nu ute kat ta kembei: Sombe kam ma iwe lem, nako yamaana ambai. Pa sombe ndeeŋe ŋgar ambaiŋana, na kaimer ko mbot ambai. Swom ko irao imap karau na som. Tana koroŋ ambaiŋana ta urur motom pa i, nako mbotmbot mi re kat ka ŋonoono.

¹⁵Nu tomtom sananŋom, zaŋzaaŋa zin wal ndeeŋeŋan su ruumu kizin pepe. Mi petepaala ruumu kizin mi kem koroŋ kizin pepe.

¹⁶Pa sombe tomtom ndeeŋeŋana sa itop, nako imaŋga mini. Ni irao itop pa lamata mi ru. Mi toŋgo. Ni kola imaŋga mini. Mi zin wal sananŋan na som. Sombe pataŋana sa ikam zin ma tisu, na tisu timbot pataaŋa.

¹⁷Kom koi sa, sombe pataŋana ikami, na menmeenu pepe. Mi sombe itop, na nim se pepe.

¹⁸Kokena Yooba ire mbulu ku tana, to kete malmalŋana kini ikam kat kom koi tana som.

¹⁹Zin wal sananŋan na, tipas ketem pepe, mi motom berber pizin pepe. Kokena tikam ma ŋgar ku isaana.

²⁰Pa kaimer zin ko irao timbot ambai na som. Anutu ko iyembut swon ma timeete karau men, kembei lam ta tupunmeete na.

²¹O lutuŋ, mototo Yooba ziru king, mi leŋleŋ la kalŋan. Mi zin wal ta so tizorzooro la Yooba ziru king kalŋan, na mbotmbot molo pizin.

²²Pa molo som to, wal ru tana tipamorsop zin wal zorzooroŋan pa pataŋana sa. Mi zaala tabe tipasaana zin pa i, ina tuute som.

²³Iŋgi sua pakan kizin wal ta len ŋgar ambaiŋana na. Sombe iti lende uraata be tuurpe pataŋana kizin tomtom, na titiiri kat sua kizin. Kokena talae sorok kizin wal pakan. Pa ina mbulu ambai som.