Sua Tutŋana 22:9-17

⁹Tomtom ta mata merereŋana, nako indeeŋe kampeŋana. Paso irairai kini mi koroŋ kini pakan pizin wal sorrokŋan.

¹⁰Zin wal ta tizorzooro mi tirepilpiili ŋgar ambaiŋana na, ziiri zin ma tila len. Naso mbulu ki zooroŋana, ŋoŋi, mi repiiliŋana imap.

¹¹Tomtom ta so leleene ŋgeezeŋana mi ikamam sua ambaiŋana men, nako king itunu leleene pini mi ikami ma iwe le gaabaŋana.

¹²Yooba itunu ta mataana pa ŋgar ambaiŋana. Mi zin wal pakamkaamŋan tau tisu mini mi tiur koi pa zitun wal kizin na, ni ikamam ma sua kizin iurur ŋonoono som.

¹³Wal maolŋan, sombe toso pizin be tila tikam uraata, na tipandelndel sua piti ta kembei: “Aiss, nio mburoŋ som. Ko aŋdeeŋe laion sa isu zaala lwoono mi ikan yo, som wal sananŋan tipun yo ma aŋmeete ma iŋgi.” Tana tila pa uraata som.

¹⁴Zin moori ta tiyaryaaru zin tomooto na, sua kizin kembei naala ta isula kat. Mi wal ta Yooba kete malmalŋana kini imbotmbot se kizin ta titoptop sula.

¹⁵Zin naŋgaŋ lelen bok pa ŋgar talliŋana. Mi sombe taballis zin mi tapazalzal zin, nako ŋgar kizin talliŋana tana imap pizin.

¹⁶Tomtom ta so iur pataŋana pizin wal sorrokŋan bekena ikoto zin mi ikam koroŋ kizin ma iwe lene, som ipomosmoozo zin wal mbio uunu, na kaimer ni ko isu ma imbot ŋoobo.

¹⁷Zin wal ta len ŋgar ambaiŋana na, ŋgun talŋom pizin mi leŋleŋ la sua kizin. Mi ŋgar ta so nio aŋpaute u pa i, na kiskis ma imbol la lelem. Pa nu so kam ta kembei, nako ikamu ma lelem ambai. Mi ko irao ru zolom pa sua sa na som.