Sua Tutŋana 20:22-29

²²Sombe tomtom sa ikam mbulu sananŋana pu, na kam ŋgar be pokot pepe. Zem la Yooba namaana, mi ni ko iuulu u pa pataŋana ku tana.

²³Iti sombe lelende be takam ŋgomo pa koroŋ sa, na tuur ka kadoono ma irao kat pa ka kin. Kokena tasala sorok pizin wal pakan, mi pakan na tusu pizin. Pa mbulu pakaamŋana ta kembei, Yooba leleene pa ri sa som kat.

²⁴Yooba ta ikamam peeze pa pai kiti. Mbulu tabe ipet piti pa kaimer i, na asiŋ iute? Tomtom sa som. Yooba itutamen ta iute.

²⁵Sombe tomtom sa ikam kat ŋgar som, mi imbuk sorok sua be iur koroŋ sa ma iwe Yooba lene, na ni iur kilis pa itunu. Pa kaimer sombe ŋgar kini itooro, na le zaala sa be ireege mini sua kini mbukŋana tana na som.

²⁶King ta so le ŋgar ambaiŋana, nako ipitpeleele zin tomtom: Ambaimbaiŋan tila ndel, sananŋan tila ndel. Mi wal sananŋan na, ni ko ipun zin ma mburan imap.

²⁷Mat ki Yooba ta iyaryaara piti, mi izzwe ŋgar kiti turkeŋana ta imbotmbot sula lelende.

²⁸King sa isombe iurur leleene pa Anutu mi zin tomtom mi itoto sua kini mbukŋana, nako imbot ambai. Pa sombe iurur leleene pizin tomtom mi imuŋaiŋai zin, na peeze kini ko imbol ma imbotmbot.

²⁹Zin naŋgaŋ na, mburan biibi, tabe nin se pa. Mi zin kolman na, momo kizin ta iwe aigau pizin mi iswe zin kembei mbulu kizin iŋgeeze men.