Sua Tutŋana 20:17-26

¹⁷Ŋonoono, kini ta so takam pa zaala ki pakaamŋana, sombe ila kwondo, ina inamut kat. Mi sombe takan ma isula kopondo, nako tayamaana ambai som. Ko kembei ta patpat!

¹⁸Sombe turru zaala pa koroŋ sa, na itundu men takam ŋgar pa pepe. Tiwi wal pakan be tiuulu iti pa ŋgar kizin tomini. Mi sombe malmal biibi sa ipet, to matanda iŋgal kat be takam lende wal pakan bekena tiso iti pa malmal ka zaala.

¹⁹Wal ta tininin kao na, tizzwe sua turkeŋana ki waen bizin. Tana tomtom ta gorgori kwoono perper sorok na, nu mbotmbot molo pini: Kokena iswe sua ku ma wal pakan tileŋ.

²⁰Tomtom ta so ipiri sua sananŋana pa tamaana som naana, nako imeete karau men. Ko iwe kembei lam ta tipunmeete mi lele zugut.

²¹Rai koroŋ ku pa lutum bizin karau pepe. Kokena timboro kat som, to kampeŋana ki Anutu imbotmbot se koroŋ tana som.

²²Sombe tomtom sa ikam mbulu sananŋana pu, na kam ŋgar be pokot pepe. Zem la Yooba namaana, mi ni ko iuulu u pa pataŋana ku tana.

²³Iti sombe lelende be takam ŋgomo pa koroŋ sa, na tuur ka kadoono ma irao kat pa ka kin. Kokena tasala sorok pizin wal pakan, mi pakan na tusu pizin. Pa mbulu pakaamŋana ta kembei, Yooba leleene pa ri sa som kat.

²⁴Yooba ta ikamam peeze pa pai kiti. Mbulu tabe ipet piti pa kaimer i, na asiŋ iute? Tomtom sa som. Yooba itutamen ta iute.

²⁵Sombe tomtom sa ikam kat ŋgar som, mi imbuk sorok sua be iur koroŋ sa ma iwe Yooba lene, na ni iur kilis pa itunu. Pa kaimer sombe ŋgar kini itooro, na le zaala sa be ireege mini sua kini mbukŋana tana na som.

²⁶King ta so le ŋgar ambaiŋana, nako ipitpeleele zin tomtom: Ambaimbaiŋan tila ndel, sananŋan tila ndel. Mi wal sananŋan na, ni ko ipun zin ma mburan imap.