1Sombe kanda kini ri sa, mi itiŋan wal kiti lelende ambai, mi taparlup ti ma tombotmbot, na mbotŋana kiti ko ambai ma ilip pizin wal ta kan kini biibi, mi tamen timbotmbot raama ŋoŋi.
2Tomtom sa, sombe lutuunu ipamiaŋi, nako iur mbesooŋo kini sorokŋana sa ta le ŋgar ambaiŋana na ma iwe biibi pa lutuunu tana be imboro i. Mi kaimer ni ko ikam mbesooŋo tana le matamur kini raraate kembei ta ikam pa itunu lutuunu bizin pakan.
3You ikanan gol ma silba bekena kan muk ila ne ma tiŋgeeze kat. Mi iti tomtom na, Yooba izemzem pataŋana pakan ma iwedet piti bekena itoombo iti mi ipeŋgeeze mbulu kiti.