Sua Tutŋana 13:5-15

⁵Tomtom ndeeŋeŋana, ni iurur koi pa mbulu pakaamŋana. Mi wal sananŋan na, mbulu buzaanaŋana mi mbulu pamiaŋŋana ta igabgaaba zin ma ziŋan tiwwa.

⁶Tomtom ta ikamam kat mbulu na, mbulu kini ndeeŋeŋana ko iporoukalkaali ma imbotmbot ambai. Mi zin wal ta mbulu kizin irao som na, mbulu kizin sananŋana ko ipasaana zin ma tisaana kat.

⁷Tomtom ta, iti tere i na, toso ni le koroŋŋana. Mi som. Ni le koroŋ sa som. Mi tomtom toro, tere i na, toso ni sorokŋana. Mi som. Ni le koroŋ boozo.

⁸Zin mbio uunu, sombe kan koi sa ipamoto zin mi iboobo pa le pat, na tirao be tiŋgiimi i, mi ni izem zin ma timbot. Mi wal sorrokŋan na, pataŋana ta kembei iwedet pizin som. Pa tomtom tiute: Zin len koroŋ sa som.

⁹Wal ndeeŋeŋan tikamam mbotŋana ambaiŋana mi tiurur mat pizin tomtom. Mi wal sananŋan na, mbotŋana kizin kembei kai ta molo som mi imeete.

¹⁰Mbulu ki tapakurkur itundu, ina ipiyotyooto ŋoŋi boozo. Mi zin wal ta tileŋleŋ la sua na, ŋgar ambaiŋana imbotmbot la lelen.

¹¹Pat ta ka usomŋana mi ipet sorok, nako imap karau men mi ka ŋonoono sa som. Mi tomtom ta so ikamam uraata mi iurur pat kini ilalae, na pat tana ko ipet ma iwe biibi.

¹²Sombe tanamnaama koroŋ sa mi ipet karau som, inako ikam ma lelende isaana. Mi talala ma sombe takam koroŋ tana, inako ikam ma menmeen ti, mi tayamaana kembei mbotŋana kiti ambai.

¹³Zin wal ta tirepilpiili sua ki Anutu kembei koroŋ sorok, nako tire kadoono pa mbulu kizin tana. Mi tomtom ta so ileŋleŋ la tutu ki Anutu mi imoto kana, nako ikam le kadoono ambaiŋana.

¹⁴Zin wal ta len ŋgar ambaiŋana na, sua kizin kembei yok bukbukŋana ta ipiyotyooto mbotŋana ambaiŋana piti. Pa ipiŋgisŋgis kumbundu pa kilis tabe ikam ti ma temeete i.

¹⁵Ŋgar ambaiŋana ta iurur ŋonoono, ina ikam ma tomtom lelen piti. Mi zin wal pakaamŋan ta tisu mini mi tiur koi pa zitun wal kizin na, zaala kizin ko ipata.