3Wal ndeeŋeŋan na, Yooba irao izem zin ma tikan peteele na som. Mi koroŋ ta wal sananŋan lelen pa i na, ni ipiŋgisŋgis pizin.
4Sombe namanda ikamam kat uraata som, nako tombot ŋoobo. Mi sombe namanda ikamam kat uraata, nako lende koroŋ boozo.
5Sombe mazwaana ki mai ipet, mi lutundu bizin tikam uraata ma tiyo kanda kini, ina iswe kembei zin len ŋgar ambaiŋana. Mi sombe tikenne mi timbombooren, ina tipamiaŋ ti.
6Wal ndeeŋeŋan na, kampeŋana matakiŋa imbotmbot se kizin. Mi wal sananŋan na, tizzwe malmal tabe tikam i som. Titurkewe.
7Sombe wal ndeeŋeŋan timeete, na tomtom matan lala pa mbulu kizin ambaiŋana mi tipakurkur Anutu pa. Mi wal sananŋan na, zan ko isaana ma isaana kat.
8Wal ta len ŋgar ambaiŋana na, sombe tutut zin, nako tileŋ la kalŋanda. Mi wal kankaanaŋan ta tizorzooro mi kwon perper sorok na, zin ko tisaana ma tila len.
9Tomtom ta so ipa pai kini ma ambai men, na kosasa ko irao be ipasaana kati na som. Tamen zin wal ta tipaŋobŋoobo pa zaala ambaiŋana na, kaimer mbulu kizin ta tikamam ki keŋana na, ko imbot kat mat mi tomtom tiute.
10Zin wal ta matan iparkinmeete pizin na, kaimer ko tikam mbulu sa mi tikam pataŋana piti. Mi wal kankaanaŋan ta tizorzooro mi kwon perper sorok na, zin ko tisaana ma tila len.
11Sua kizin wal ndeeŋeŋan, ina kembei yok lepeene. Pa iuluulu zin tomtom be timbot ambai. Mi zin wal sananŋan na, tizzwe malmal tabe tikam i som. Titurkewe.
12Mbulu ki tuurur koi, ina ikamam ma ŋoŋi imbotmbot la mazwanda. Mi sombe tuurur lelende pizin tomtom, nako matanda mbiriizikaala sanaana kizin, mi takam ŋgar pa mini som.
13Zin wal tau tikilaala ŋgar iŋgoi ta ambai ma ilip na, kwon ipiyotyooto ŋgar ambaiŋana men. Mi zin wal ta len ŋgar somŋan na, teene ko ikan zin!
14Zin wal ta len ŋgar ambaiŋana na, gorgori tirru ŋgar pakan be isala ki. Mi wal kankaanaŋan ta tizorzooro na, molo som to sua sananŋana ta iwedet pa kwon na, ko ipasaana zin.
15Zin wal ta len koroŋ boozo na, tipase pa pat ma koroŋ kizin be iporoukaala zin pa pataŋana. Mi zin wal sorrokŋan ta len koroŋ som mi timbot ŋoobo na, pataŋana kizin tana ko ipun zin ma tisaana kat.
16Kadoono ta wal ndeeŋeŋan tikamam pa uraata kizin, ina iuluulu zin be tikam mbotŋana ambaiŋana. Mi kadoono ta wal sananŋan tikamam pa uraata kizin, ina tiwirri sorok pa koroŋ sananŋan men.
17Tomtom ta so ileŋleŋ la sua pazalŋana, na imbotmbot la zaala ki mbotŋana ambaiŋana kek. Mi zin wal tau tileŋtut sua pazalŋana, nako tiyaaru zin tomtom pakan ma tipaŋoobo pa zaala ambaiŋana.
18Tomtom ta so iurur koi pu mi ikiskis la leleene, nako kwoono ipakamkaam. Mi tomtom ta so ileŋ sua ŋgalŋana sa mi ila ma izzo pizin wal pakan, na ni tomtom kankaanaŋana.
19Sombe nu kwom suaŋom, na re u. Pa nu kola kam sanaana. Irao kam som na som. Mi tomtom ta so imborro kat kwoono, na ni tomtom ŋgarŋana.
20Sua ta iwedet pa wal ndeeŋeŋan kwon, ina kembei pat silba ta tomtom lelen pa ilip. Tamen ŋgar ta imbotmbot la wal sananŋan lelen, ina ŋono somŋana.
21Sua ta iwedet pa wal ndeeŋeŋan kwon, ina iuluulu tomtom boozomen be timbot ambai. Mi wal kankaanaŋan ta tizorzooro na, tikam kat ŋgar som. Tana kaimer ko timetmeete ma tila len.
22Kampeŋana ki Yooba, ta ikamam lende koroŋ boozomen. Mi koroŋ ta so ni ikam piti, nako ka pataŋana sa som.
23Wal kankaanaŋan ta tizorzooro na, sombe lelen iurur pa mbulu sananŋana sa, to ikam zin ma lelen ambai mi menmeen zin. Mi tomtom ta so ŋgar kini ipet kek, na ŋgar ambaiŋana ta ikami ma leleene ambai.
24Koroŋ ta wal sananŋan timototo, ta ko ipet pizin. Mi koroŋ ta wal ndeeŋeŋan lelen pa na, Yooba ko ikam pizin.
25Pataŋana biibi ko ipambiriizi zin wal sananŋan. Tamen wal ndeeŋeŋan ko timendernder mbolŋana ma alok.
26Zin wal ta so tiŋgo tomtom maolŋana ma ila be ikam uraata, nako lelen ambai som. Ko kembei koroŋ ta ikam ma zoŋon imenel, mi you ka koi ila matan.