Sua Tutŋana 10:18-30

¹⁸Tomtom ta so iurur koi pu mi ikiskis la leleene, nako kwoono ipakamkaam. Mi tomtom ta so ileŋ sua ŋgalŋana sa mi ila ma izzo pizin wal pakan, na ni tomtom kankaanaŋana.

¹⁹Sombe nu kwom suaŋom, na re u. Pa nu kola kam sanaana. Irao kam som na som. Mi tomtom ta so imborro kat kwoono, na ni tomtom ŋgarŋana.

²⁰Sua ta iwedet pa wal ndeeŋeŋan kwon, ina kembei pat silba ta tomtom lelen pa ilip. Tamen ŋgar ta imbotmbot la wal sananŋan lelen, ina ŋono somŋana.

²¹Sua ta iwedet pa wal ndeeŋeŋan kwon, ina iuluulu tomtom boozomen be timbot ambai. Mi wal kankaanaŋan ta tizorzooro na, tikam kat ŋgar som. Tana kaimer ko timetmeete ma tila len.

²²Kampeŋana ki Yooba, ta ikamam lende koroŋ boozomen. Mi koroŋ ta so ni ikam piti, nako ka pataŋana sa som.

²³Wal kankaanaŋan ta tizorzooro na, sombe lelen iurur pa mbulu sananŋana sa, to ikam zin ma lelen ambai mi menmeen zin. Mi tomtom ta so ŋgar kini ipet kek, na ŋgar ambaiŋana ta ikami ma leleene ambai.

²⁴Koroŋ ta wal sananŋan timototo, ta ko ipet pizin. Mi koroŋ ta wal ndeeŋeŋan lelen pa na, Yooba ko ikam pizin.

²⁵Pataŋana biibi ko ipambiriizi zin wal sananŋan. Tamen wal ndeeŋeŋan ko timendernder mbolŋana ma alok.

²⁶Zin wal ta so tiŋgo tomtom maolŋana ma ila be ikam uraata, nako lelen ambai som. Ko kembei koroŋ ta ikam ma zoŋon imenel, mi you ka koi ila matan.

²⁷Sombe tomototo Yooba mi teleŋleŋ la kalŋaana, nako iseeŋge swondo ma molo. Tamen ni iyembutmbut wal sananŋan swon bekena timeete ma tila len karau men.

²⁸Koroŋ ambaimbaiŋan ta wal ndeeŋeŋan tiurur matan pa na, zin kola tire mi menmeen zin pa. Mi wal sananŋan na som. Koroŋ ta tiurur matan pa na, zin ko tirao be tire na som.

²⁹Yooba, ni iwe kembei siiri mbolŋana pizin wal ndeeŋeŋan be tike lela. Tamen ipasansaana zin wal sananŋan.

³⁰Wal ndeeŋeŋan, zin kembei ke mbolŋana ta irao be imuzu na som. Mi wal sananŋan na, zin ko tirao be timbot pa toono ta Yooba ikam pa wal kini na som. Ni ko iziiri zin ma tila len.