Soukapwüng 6:6-36

⁶Iwe, chon Israel ra fokun mwelele pokiten chon Mitian. Iei mine ra siö ngeni ewe Samol mi Lapalap pwe epwe alisiir.

⁷Lupwen ekewe aramasen Israel ra siö ngeni ewe Samol mi Lapalap pokiten ekewe chon Mitian,

⁸ewe Samol mi Lapalap a tinala rer eman soufos. Iwe, a üreniir, “Iei alon ewe Samol mi Lapalap ewe Koten Israel: Üa emwenikemiiwu seni Isip, ewe leni ia ra nöünikemi amanau ie.

⁹Üa angasakemi seni chon Isip, pwal seni chokewe mi ariaföüükemi lon ei fanü. Üa asürela me mwemi o ngenikemi fanüer.

¹⁰Iwe, üa ürenikemi, ‘Ngang ewe Samol mi Lapalap ämi we Kot. Ousap fel ngeni än chon Amor kewe kot, ir chokewe oua fen nonom lon fanüer.’ Nge ämi ousap aüselinga aloi.”

¹¹Mürin, nöün ewe Samol mi Lapalap chon läng a feito Ofra o mottiu fän ewe irä ook än Joas seni ewe eterekesin Apieser. Nge Kition nöün we mwän a wichiwich umwun wiich lon ewe lenien üchüch wain, pun a aopala seni chon Mitian.

¹²Iwe, nöün ewe Samol mi Lapalap we chon läng a pwä ngeni Kition o üreni, “Ewe Samol mi Lapalap a etuk, en sounfiu mi pwora.”

¹³Nge Kition a üreni, “Ai Samol, ika ewe Samol mi Lapalap a wesewesen etikem, pwota a fis ngenikem ekewe mettoch? Nge ikafa ekewe föför mi amwarar aia rong seni semelapem kewe, lupwen ra apworausa ngenikem usun än ewe Samol mi Lapalap emwenirewu seni Isip? Nge iei ewe Samol mi Lapalap a pöütikeemila o asechikeemilong lepöün chon Mitian.”

¹⁴Iwe, ewe Samol mi Lapalap a kul ngeni o üreni, “Kopwe feila lon om na pöchökül o angasala chon Israel seni lepöün chon Mitian. Ngang üa tinukela.”

¹⁵Nge Kition a üreni, “Ai Samol, epwe ifa usun ai üpwe tongeni amanaua chon Israel? Nengeni, ai eterekes a chokükün seni meinisin lon ewe ainangen Manasa, nge ngang ese wor manei lon ai famili.”

¹⁶Iwe, ewe Samol mi Lapalap a üreni, “Ngang üpwe etuk, nge en kopwe akufu chon Mitian usun chök om kopwe akufu eman chök aramas.”

¹⁷Nge Kition a üreni, “Are üa küna ümöümöch me reöm, kopwe pwäri ngeniei eu asisil, pwe üpwe silei pwe en ai Samol mi Lapalap ka fos ngeniei.

¹⁸Üa tüngor ngonuk pwe kosap feila seni ikei tori üpwe liwinto reöm o uwato ai asoren mongö ngonuk.” Iwe, a üreni, “Üpwe nonom ikei tori kopwe liwinto.”

¹⁹Iwe, Kition a liwinla leimwan o amolätä eman apanen kuuch, pwal pilawa esap wor iis lon seni ilik paun pilawa mi amas. Mürin, a iseis ewe fituk lon eu pasikit, nge setin a anomu lon eu nape o uweerela ren ewe chon läng mi nom fän ewe irä ook.

²⁰Iwe, nöün Kot we chon läng a üreni, “Kopwe angei ewe fituk me ewe pilawa esap wor iis lon o iseniir won ei achau, kopwe pwal ninätiu wor setin ewe.” Iwe, a föri iei usun.

²¹Mürin, nöün ewe Samol mi Lapalap we chon läng a aitiewu wokun mi nom lepöün o tiki ngeni ewe fituk me ewe pilawa esap wor iis lon. Iwe, a küütä ekkei seni ewe achau o kenala ewe fituk me ewe pilawa. Mürin, ewe chon läng a morukola seni fän mesan.

²²Nge lupwen Kition a mefi pwe i nöün ewe Samol mi Lapalap we chon läng, a üra, “Ai Samol me ai Kot, osupwangei, pun iei üa küna noum we chon läng ren mesei.”

²³Ewe Samol mi Lapalap a üreni, “Kinamwe epwe toruk. Kosap niuokus, pun kosap mäla.”

²⁴Mürin, Kition a senätä eu rongen asor ngeni ewe Samol mi Lapalap ikenan o aita ngeni: Ewe Samol mi Lapalap i ewe Koten kinamwe. Iwe, tori ikenai ei rongen asor a chüen nom lon Ofra lon fanüen chon ewe eterekesin Apieser.

²⁵Iwe, lon ewe pwinin ewe Samol mi Lapalap a üreni Kition, “Kopwe angei nöün semom ätemwänin kow, ewe aruomanün ätemwänin kow fisu ierin o ataela än semom rongen asor fän iten ewe anü Paal. Kopwe pwal pöküetiu uluulun ewe anüfefin Asera mi nom ünükün.

²⁶Kopwe senätä eu rongen asor ngeni ewe Samol mi Lapalap om we Kot won ungen ewe leni mi pöchökül o atettelöchü föün. Mürin kopwe angei ewe aruomanün ätemwänin kow o eäni asoren kek, nge kopwe eäni mwüch uluulun ewe anüfefin Asera kopwe pöküetiu.”

²⁷Iei mine Kition a filätä engol mwän seni lein nöün chon angang o föri usun mine ewe Samol mi Lapalap a üreni. Iwe, a föri lepwin, nge sap lerän, pun a niuokusiti an famili me mwänin ewe telinimw.

²⁸Iwe, lupwen mwänin ewe telinimw ra pwätä lesosorusich, ra küna pwe ewe rongen asor fän iten ewe anü Paal a tala, nge uluulun ewe anüfefin Asera mi nom ünükün a pöküpökütiu. Iwe, ewe aruomanün ätemwänin kow a fen kek won ewe rongen asor mi sesetä.

²⁹Iwe, ra kapasfengen lefiler, “Iö a föri ei sokun?” Nge mürin ar alewoi o akais ra apasa, “Kition nöün Joas we mwän a föri ei.”

³⁰Mürin, mwänin ewe telinimw ra üreni Joas, “Kopwe emwenawu noum we mwän pwe aipwe niela, pun a ataela ewe rongen asor fän iten ewe anü Paal o pöküetiu uluulun ewe anüfefin Asera mi nom ünükün.”

³¹Nge Joas a kapas ngeni chokewe meinisin mi ütä ünükün fän ar song, “Ifa usun, ämi oua mochen fiu fän iten ewe anü Paal? Ika oua mochen peni? Iö epwe fiu fän iten ewe anü Paal epwe ninnila lesosorun lesor. Are Paal eman kot, epwe püsin fiu fän itan, pun an rongen asor a kata.”

³²Iwe, lon ena ränin ra aita ngeni Kition Jerupaal , pun ra apasa, “Likiti ngeni ewe anü Paal pwe epwe püsin fiu ngeni Kition, pokiten a ataela an rongen asor.”

³³Mürin, ekewe chon Mitian meinisin, ekewe chon Amalek me ekewe aramas mi nom ötiu ra chufengen, ra pwereto pekiton ewe chanpupu Jortan o nonom lon ewe lemolun Jesreel.

³⁴Nge Ngünün ewe Samol mi Lapalap a feitiu won Kition. Iwe, a ettiki eu rappwa, pwe chon ewe eterekesin Apieser repwe rong o tapwela mürin.

³⁵Iwe, Kition a tinala chon künö lemenen ewe fanü Manasa. Nge chon ewe ainangen Manasa ra rong ewe kö o tapwela mürin. Kition a pwal tinala chon künö ren chon ekewe ainangen Aser, Sepulon me Naftali. Iwe, pwal ir ra feila pwe repwe chu ngeniir.

³⁶Mürin, Kition a üreni Kot, “Are en kopwe angasa Israel rei, usun ka fen apasa,