Soukapwüng 1:20-30

²⁰Iwe, ra ngeni Kalep ewe telinimw Hepron, usun Moses a fen apasa. Ätei a asüela seni lon Hepron ekewe ülüman mwän ir mwirimwirin Anak.

²¹Nge chon ewe ainangen Peniamin resap asüela ekewe chon Jepus mi imweimw lon Jerusalem. Iei mine ekewe chon Jepus ra nonomfengen lon Jerusalem me chon ewe ainangen Peniamin tori ikenai.

²²Iwe, chon ekewe ainangen Efraim me Manasa ra pwal feila maun ngeni Petel, nge ewe Samol mi Lapalap a etiir.

²³Ra tinala ekoch mwän pwe repwe operi Petel mi iteni Lus me lom.

²⁴Iwe, ekewe chon operi Petel ra küna eman mwän mi towu seni ewe telinimw. Ra üreni, “Kose mochen aiti ngenikem ewe alen tolong lon ewe telinimw, nge äm aipwe kirikiröch ngonuk.”

²⁵Iei mine ewe mwän a aiti ngeniir ewe alen tolong lon ewe telinimw. Iwe, chon ekewe ainangen Efraim me Manasa ra niela chon ewe telinimw ren ketilas, nge ra amanaua ewe mwän me chon an famili meinisin.

²⁶Mürin, ewe mwän a feila lon fanüen chon Hit. Ikenan a aüetä eu telinimw o aita ngeni Lus. Iei iten ewe telinimw tori ikenai.

²⁷Iwe, chon ewe ainangen Manasa resap asüela chon ewe telinimw Pet-sean, Taanak, Tor, Ipleam me Mekito pwal chon wisoposopur meinisin. Pun ekewe chon Kanaan mi nonom lon ewe fanü ra chök amwöchümwöchütiu lon.

²⁸Nge lupwen chon Israel ra pöchökülela, ra aweiresi ekewe chon Kanaan ren angangen kinrosi, nge resap fokun asürela meinisin.

²⁹Iwe, chon ewe ainangen Efraim resap pwal asüela ekewe chon Kanaan mi imweimw lon ewe telinimw Keser, iei mine chon Kanaan ra chök nonom leir.

³⁰Iwe, chon ewe ainangen Sepulon resap asüela chon ekewe telinimw Kitron me Nahalol. Iei mine ekewe chon Kanaan ra chök nonom leir, nge ra wisen angangen kinrosi ngeniir.