Solomon 5:3-14

³Piru migkaǥi a te, “Neluwas ku en is kumbalè ku, ne id-uman ku en be maan heini idseluub? Neledlezan kud is menge paa ku, ne ed-umanan ku en be maan heini eburingi?”

⁴Midsikep duen te minahal ku is terangka te gemawan, ne zutun utew a nelipey.

⁵Mid-enew a is ibpeseled ku sikandin. Ne hein migewezan ku is gewezà duen te ǥemawan midtiǥis diyà te velad ku is mira.

⁶Mibpuwasan ku is minahal ku, piru wazè en sikandin. Egkesuat a he mezineg ku is laǥeng din. Umbe mid-umew ku sikandin, piru wazè en sikandin medtavak. Mibpen-ehè ku sikandin, piru wazè ku meturedu.

⁷Naahà a te menge vantey zutun te kedrunda zan diyà te inged. Midlagkut e zan ne nepelian a. Migkuwa zan is samput ku.

⁸Sikiyu is menge vahi te Jerusalem, penangdù kew he emun egkeehè niw is minahal ku ne keǥiyi niw sikandin he midluyahan a tenged te kebmahal.

⁹Sikew is kezegwayan he vahi, hengkey is meupiya ziyà te minahal nu su ibpepenangdù key man kenikew? Edhuna ve sikandin he meupiya kenà te zuma?

¹⁰Mekempet wey meriǥàriǥà is minahal ku. Te sepulù he libu he menge maama, ne iyan sikandin edhuna.

¹¹Edhuna pa he mevali is ulu zin kenà te vulawan. Mekurkuruten is bulvul zin ne iring keitem te uwak.

¹²Is mata zin iring kekempet te mata te merepatik he iring keputì te gatas, he ziyà te veyvey te wahig. Ne iring heini kekempet te mahalen he menge vatu.

¹³Is enaping din mehemut iring te pemuleey he neeneb te menge pinemula he ebeelan he pehemut. Is menge bivig din henduen be te menge liryu he edtudà duen is mira.

¹⁴Is menge vekelawan din, ne henduen be te kebilya he vulawan he zuen duen mahalen he menge vatu. Is lawa zin henduen be te impesinew he ungal te ilipanti he nezeyzeyanan te menge vatu he sepiru.