Soloumane ea Gesami 5:3-14

³“Na da na abula gisa:i dagoi. Na da abuliba:le amo bu gasisa:lima:bela:? Na da na emo dodofei dagoi. Na da laluba:le na emo bu nigima:ma:bela:?

⁴Na sasagesu dunu da logo ga:suga lobo ligisi. E da na gadenene esalebe, amo na dawa:loba, nodoi.

⁵Na da e ganodini misa:ne momagei dagoi ba:i. Na lobo da ‘me’ gabusiga: hano amoga dedeboi ba:i. Na da logo ga:su geda gagui.

⁶Na da na sasagesu dunu misa:ne logo doasi. Be e da asi dagoi ba:i. Na da ea sia: nabimusa: bagadewane hanai. Na da e hogoi be hame ba:i. Na da e wei be alofebe hame nabi.

⁷Sosodo aligisu dunu amo da moilai bai bagade sisiga:ha lala, na ba:i. Ilia da na fane, fofonomagia:i. Moilai bai bagade gagoi sosodo aligisu dunu ilia da na abula sawa:figi houga:le fasi.

⁸Yelusaleme uda, dilia! Nama sia: ilegema! Dilia na sasagesu dunu ba:sea, ema na da sasagesu hou ha:giwane hamobeba:le gasa hame gala adoma:ne, sia: ilegema.” Yelusaleme uda ilia amane sia:i,

⁹“Saga! Dia noga:idafa ba:su da eno uda huluane baligisa. Be dia sasagesu dunu da eno dunu huluane baligisala:? E da baligili noga:idafala:? Ninia da abuliba:le dima ilegele sia:ma:bela:?” Uda da amane sia:i,

¹⁰“Na sasagesu dunu da noga:idafa ba:sa amola e da gasa bagade gala. E da dunu 10,000 gilisisu ganodini baligili noga:idafa ba:sa.

¹¹Ea odagi gadofo da osoboya:i amola hohona:boi. Ea dialuma hinabo da helo amola balega sio defele, bunumai gala.

¹²Ea si da ‘dafe’ sio amo da dodo maga:mega dodofei amola hano yogo dalebe ea bega: esala, amo defele, noga:idafa ba:sa.

¹³Ea ba: da ifabi amo da hedama:ne fodole nasu bugi amoga nabai defele, noga:idafa ba:sa. Ea lafi gadofo da ‘lili’ mosoi amo ‘me’ hano amoga nanegai agoane ba:sa.

¹⁴Ea lobo da noga:le hamoi ba:sa amola ea lobo sogo gasisalasu amo da igi noga:idafa amoga nina: hamoi. Ea da:i da hohona:boi ‘aifoli’ amo da ‘sa:faia’ igi noga:i amoga nina: hamoi, agoane ba:sa.