Soakas 31:10-30

¹⁰Arulana upa in konauk sie mutan pah in ma nukewa! El saok liki wek yohk molo!

¹¹Mukul tumal uh filiya lulalfongi lal sel, ac el fah tiana enenu kutena ma.

¹²Ke lusen moul lal nufon mutan se inge oru na ma wo nu sin mukul tumal, ac tia oru kutena ma koluk nu sel.

¹³El kafofona in orek nuknuk ke unen sheep ac linen.

¹⁴El use mongo nu lohm sel yen loesla me, oana ke oak wiwa kako uh oru.

¹⁵El ngutalik meet liki lenelik ac akola mongo nu sin sou lal, ac fahk nu sin mutan kulansap lal ma elos in oru.

¹⁶El suk sie ipin acn ac molela; el orekmakin mani el sruokya in yukwiya ima in grape se.

¹⁷El sie mwet alken, ku, ac moniyuk in orekma.

¹⁸El etu lupan kapak ke ma nukewa el oru, ac el orekma paht ke fong.

¹⁹El sifacna orek turet, ac sang otwela nuknuk.

²⁰El kulang nu sin mwet sukasrup ac mwet enenu.

²¹El tia fosrnga ke pacl ohu ke sripen oasr nuknuk fusrfusr lun sou lal.

²²El sifacna orala mwe loeyuk bed, ac el nukum nuknuk wowo orekla ke linen sroninmutuk.

²³Mukul tumal eteyuk in acn sel, ac el sie mwet kol we.

²⁴Mutan se inge el orek nuknuk ac mwe lohl, ac kukakin nu sin mwet kuka.

²⁵El sie mutan ku in mano su akfulatyeyuk, ac el tia elya ke pacl fahsru.

²⁶Kas lal uh lalmwetmet ac kulang.

²⁷El kafofo pacl nukewa, ac karingin enenu lun sou lal.

²⁸Tulik natul akkalemye insewowo lalos sel, ac mukul tumal kaksakunul.

²⁹El fahk mu, “Oasr mutan na wo puspis, a kom wo lukelos nukewa.”

³⁰Kulang uh mwe aklukukye, ac oasku uh tia kawil, a sie mutan su sangeng sin LEUM GOD fal in kaksakinyuk.