Soakas 24:3-12

³Lohm uh musaiyuk fin pwelung lun lalmwetmet ac etauk.

⁴Acn ma oasr etauk we, infukil uh yunla ke ma saok ac oaskulana.

⁵Wo in lalmwetmet liki na in ku; aok, yohk sripa in etauk liki in fokoko.

⁶Kom enenu na in akola akwoya meet liki kom srola ke sie mweun, ac kom fin eis kas in kasru wo puspis na kom ac fah ku in kutangla.

⁷Kas lalmwetmet uh arulana loalla nu sin sie mwet lalfon in kalem kac. Wangin ma el ac ku in fahk ke pacl ac srumunyuk ma yohk sripa uh.

⁸Kom fin orek pwapa koluk pacl nukewa, ac fah eteyuk kom lah kom sie mwet orek lokoalok.

⁹Ma nukewa sie mwet lalfon ac nunkauk in oru uh ac ma na koluk. Mwet uh srunga mwet se ma kwacna aklusrongtenye mwet.

¹⁰Kom fin munasla ke pacl kom sun ma upa, kalmac pa ku lom uh srikla.

¹¹Nimet alolo in molela sie mwet su akola in anwuki ke sripen nununku sesuwos.

¹²Sahp kom ac fahk mu kom nikin, a God El etekom ac nunak lom. El ac fah moli nu sum fal nu ke ma kom orala.