1Mi laik tenkyu long yu, Bikpela na King bilong mi, na mi tok amamas long yu, God, yu Helpim bilong mi.
2Mi litimapim nem bilong yu, long wanem, yu bin was long mi na yu bin lukautim mi, na yu bin helpim mi, na mi no kisim bagarap. Pasin bilong tok giaman na tok stil i no bin mekim mi i pundaun. Taim ol manmeri i ranim mi, yu bin was long mi, na yu bin helpim mi
3long bikpela marimari na long gutpela nem bilong yu. Yu bin helpim mi long taim ol manmeri i laik kaikaim mi. Na yu bin sambai long mi, olsem na ol manmeri i no kilim mi na ol traim i no bagarapim mi.
4Yu bin banisim mi taim ol arapela manmeri i wokim paia na smok bilong kilim mi.
5Yu bin lukautim mi, na mi no go daun long ples bilong ol man i dai pinis. Yu bin was long mi, na ol manmeri bilong tok nogut na tok giaman i no bagarapim mi, na ol i no kotim mi nating long ai bilong king.
6Tru tumas, klostu mi bin i dai na go daun olgeta long ples bilong ol man i dai pinis.
7Ol manmeri i ranim mi long olgeta hap na i no gat wanpela i stap bilong helpim mi. Mi laik painim wanpela man bilong sambai long mi, tasol i no gat wanpela i stap.
8Bikpela, nau mi tingting long marimari bilong yu, na long ol wok yu bin mekim bipo. Yu bin helpim ol manmeri i bin wetim yu, na yu bin kisim bek ol long han bilong ol birua.
9Mi singaut long Bikpela Antap Tru na mi prea bai mi no ken i dai.
10Mi krai long Bikpela, em i Papa bilong mi, bai em i no ken lusim mi long taim nogut, na bai em i helpim mi taim mi no gat strong bilong winim ol hambak manmeri. Mi no ken malolo long litimapim nem bilong yu, na long tok amamas na tok tenkyu long yu.
11Yu bin harim prea bilong mi, na yu bin helpim mi long taim mi laik kisim bagarap, na long taim ol samting nogut i kamap long mi.
12Olsem na bai mi tok tenkyu na tok amamas long yu, Bikpela, na bai mi litimapim nem bilong yu.
13Taim mi yangpela yet, na mi no bin lukim yet ol longwe ples, mi bin askim Bikpela stret bai em i givim gutpela tingting long mi.
14Olgeta taim mi go long haus bilong en, mi save prea long kisim dispela gutpela tingting, na bai mi mekim olsem tasol inap long taim mi dai.
15Long taim mi yangpela yet na mi stap olsem nupela plaua, na i kam inap mi lapun na mi olsem prut i mau pinis, oltaim dispela gutpela tingting i amamasim bel bilong mi. Taim mi mangi yet mi bin bihainim em na wokabaut long rot bilong em.
16Liklik taim tasol mi bin putim yau long em, na em i givim bikpela skul long mi.
17Olsem na mi go het long bungim gutpela tingting. Na mi tok amamas long Bikpela i bin givim gutpela tingting long mi.
18Mi pasim tingting long bihainim tru skul bilong em, na mi no sem long wok hat long kamapim gutpela pasin bilong em.
19Tru tumas, mi tingting oltaim long holimpas gutpela tingting, na mi strong long mekim stretpela pasin tasol. Mi litimapim han bilong mi i go antap na mi krai, long wanem, mi sori yet long gutpela tingting.
20Mi wok strong long kisim gutpela tingting, na mi bihainim stretpela pasin, olsem na mi kisim em. Namba wan taim mi bungim gutpela tingting, mi kisim gutpela skul, olsem na bai mi stap orait.
21Bel bilong mi i wari long painim gutpela tingting, olsem na mi bin kisim gutpela samting tru.
22Bikpela i givim wanpela gutpela presen long mi, em pasin bilong autim ol toktok, olsem na mi inap autim olgeta amamas bilong mi.
23Yupela ol manmeri i no bin skul, yupela kam klostu long mi bilong kisim gutpela tingting long mi.
24Bilong wanem yupela i sot long dispela samting? Na bilong wanem yupela i krai na singaut long en?
25Mi tokim yupela olsem. Maski baim. Yupela i ken kisim nating ol dispela samting.
26Yupela i no inap i go longwe bilong painim gutpela tingting. Karim hevi bilong em antap long sol bilong yupela na bai yupela i kisim gutpela skul.
27Lukim. Mi no bin hatwok tumas long winim bikpela bel isi.
28Sapos yupela i baim skul long planti mani, bai yupela i kisim bek planti samting moa moa yet.
29Mi prea, bai yupela i ken amamas long marimari bilong Bikpela, na yupela i no ken sem long litimapim nem bilong em.
30Nau em i taim bilong wok. Yupela hariap na pinisim, na long taim God i bin makim bai yupela i kisim gutpela pe.
