SAN LUCAS 8:2-21

²Loꞌo tyun neꞌ kunaꞌan ndyaa loꞌo neꞌ kanꞌ; tiꞌí ꞌa ngwa neꞌ kunaꞌan kanꞌ nu ngwa sꞌni la, bra kanꞌ yꞌni Jesús chaꞌ nchkaa neꞌ, loꞌo wa ngulo yu kwiꞌin kuxi nu nsuꞌwi ꞌin neꞌ kanꞌ. Ndaꞌan ska nu kunaꞌan nu naan Liya Magdalena loꞌo neꞌ, wa mdoꞌo kati loo kwiꞌin kuxi ꞌin.

³Loꞌo kanꞌ Xnan naan xka nu ndaꞌan loꞌo neꞌ; kwilyoꞌo ska yu naan Chuza lka Xnan kanꞌ, ska yu nu lka ndloo chaꞌ ꞌin ree Herodes lka yu Chuza kanꞌ. Ngwañaꞌan Susana, loꞌo ti tyun la neꞌ kunaꞌan nu ndayaꞌ ꞌin Jesús loꞌo nan nu nsuꞌwi ꞌin neꞌ.

⁴Bra kanꞌ kaꞌan ꞌa nten kichen kanꞌ mdoꞌo neꞌ ndyaa naꞌan neꞌ ꞌin Jesús. Bra wa mdyoꞌ tiꞌin nten kaꞌan kanꞌ sa tlyu ti, bra kanꞌ ykwiꞌ Jesús loꞌo neꞌ. Nde lka chaꞌ nu ngwaꞌu yu ꞌin neꞌ kanꞌ bra kanꞌ:

⁵―Wa ndyaa ska nten kata mta trigu ꞌin yu. Katsaǎnꞌ ꞌwan sa ñaꞌan ngwa bra nu msnen yu mta kanꞌ: Ngalu chinꞌ mta kanꞌ tuwiin seꞌen ndijin nten, ngwoꞌo sta neꞌ mta kanꞌ bra kanꞌ, loꞌo yan kiñi yku ꞌin ran.

⁶Xka ta mta kanꞌ ngalu seꞌen nu chinꞌ ꞌa yuu nskwa chunꞌ kee. Bra nu mtsu mta kanꞌ, ja ngwa kaluu suꞌwe kala kanꞌ, chunꞌ ja kiꞌñi yaa suun ran; mdyii kala kanꞌ ngwityi ran bra kanꞌ, chaꞌ ja mjwi seꞌen tsaa suun ran.

⁷Xka ta mta kanꞌ ngalu seꞌen mdukwa yka kicheꞌ nu ngwa xkanꞌ; bra kanꞌ bra ti ndyukwa kuten yka kicheꞌ kanꞌ xiyaꞌ, sa ñaꞌan yaꞌ nu ja mda ꞌa ran seꞌen kaluu kala trigu kanꞌ siyaꞌ ti.

⁸Xka ta mta kanꞌ ngalu seꞌen nu suꞌwe ꞌa yuu; suꞌwe ꞌa ngaluu kala kanꞌ, kaꞌan ꞌa mta mdoꞌo lo juun ran bra kanꞌ. Seꞌen nu yta yu ska mlya ti mta trigu, kanꞌ nu suꞌwe ꞌa mdoꞌo; sa yaꞌ ska siyentu mlya mta mdoꞌo bra kanꞌ. Bra wa mdyii ykwiꞌ Jesús chaꞌ kanꞌ loꞌo neꞌ, bra kanꞌ kwen ꞌa ykwiꞌ yu: ―Kunan suꞌwe wan si chañi chaꞌ nchka tiꞌ wan kunan wan chaꞌ suꞌwe nu nchkwiǐnꞌ loꞌo wan.

⁹Bra kanꞌ mnichaꞌ neꞌ nu ngiꞌni xaꞌan chaꞌ ꞌin Jesús kanꞌ sa ñaꞌan ndyoꞌo chaꞌ kanꞌ.

¹⁰Mxkwen Jesús ꞌin neꞌ bra kanꞌ: ―ꞌWan nu ndaꞌan wan loꞌoǔn, ndayaꞌ ꞌa Ndiose ꞌwan chaꞌ nchka biyaꞌ tiꞌ wan nchga chaꞌ nu yuꞌwi nchkunꞌ ti nu ngwa sꞌni; kanꞌ chaꞌ ka ꞌwan ka biyaꞌ tiꞌ wan sa ñaꞌan kulo Ndiose tñan ꞌin nten. Xka ta nten ni, xkwiꞌ chaꞌ kutsiꞌ ti nchkwiǐnꞌ loꞌo neꞌ bra nu chkwiǐnꞌ ska chaꞌ tiya loꞌo neꞌ, chaꞌ ngwañaꞌan ja ka biyaꞌ tiꞌ neꞌ, ni siya naꞌan neꞌ nu ngwa xkanꞌ; ja ska chaꞌ kanun ke neꞌ, ni siya wa ynan neꞌ nu ngwa xkanꞌ.

¹¹’Nde lka sa ñaꞌan ndyoꞌo chaꞌ kanꞌ ―ndukwin Jesús ꞌin neꞌ―. Sa ñaꞌan lka mta nu wa msnen yu kanꞌ, ngwañaꞌan lka chaꞌ suꞌwe nu nchkwiꞌ Ndiose loꞌo nten.

¹²Sa ñaꞌan lka ska ta mta nu ngalu tuwiin kanꞌ, ngwañaꞌan lka nten nu wa ynan chaꞌ suꞌwe kanꞌ nu ngwa xkanꞌ, loꞌo kanꞌ bra ti ndijyan kuneꞌ xaꞌan chaꞌ kuꞌni tyii chaꞌ suꞌwe nu nsuꞌwi niꞌ kasiya ꞌin neꞌ kanꞌ; ja ndyuꞌwi ꞌa tiꞌ neꞌ chaꞌ suꞌwe kanꞌ bra kanꞌ, ja nchka tyoꞌo laa neꞌ kanꞌ ꞌin chaꞌ kuxi ꞌin yu bra kanꞌ.

¹³Sa ñaꞌan lka xka ta mta nu ngalu lo yuu seꞌen lti ti tuꞌwa yuu chunꞌ kee kanꞌ, ngwañaꞌan lka nten nu suꞌwe ꞌa nka tiye neꞌ bra nu ynan neꞌ chaꞌ suꞌwe kanꞌ ti kulo. Bra kanꞌ sa ñaꞌan lka kala xuwe kanꞌ, chaꞌ ja kiꞌñi yaa suun ran lo kee kanꞌ, ngwañaꞌan lka nten kanꞌ, chaꞌ chinꞌ ti bra ndalo neꞌ chaꞌ msñi neꞌ chaꞌ suꞌwe kanꞌ; bra nu ñaꞌan xka ta nten ꞌin neꞌ kanꞌ, ndla ti kulaa yaꞌ neꞌ chaꞌ suꞌwe kanꞌ bra kanꞌ.

¹⁴Sa ñaꞌan lka chaꞌ ꞌin mta nu ngalu laja yka kicheꞌ kanꞌ, ngwañaꞌan lka nten nu wa ynan chaꞌ suꞌwe kanꞌ nu ngwa xkanꞌ; loꞌo kanꞌ ndiꞌin ꞌa tñan ꞌin neꞌ, ndiꞌin ꞌa tñi ꞌin neꞌ, loꞌo nsuꞌwi ꞌa seꞌen kwiji neꞌ tñi chaꞌ ꞌin ti neꞌ; kanꞌ chaꞌ ja nchka kanun suꞌwe chaꞌ suꞌwe kanꞌ niꞌ kasiya ꞌin neꞌ.

¹⁵Sa ñaꞌan lka mta nu ngalu seꞌen nu suꞌwe ꞌa yuu kanꞌ, ngwañaꞌan lka nten nu tyukwi ti tiye neꞌ nnan neꞌ chaꞌ suꞌwe nu nchkwiꞌ Ndiose loꞌo neꞌ; xlyaa neꞌ tukwa neꞌ nchga chaꞌ nu nchkwiꞌ Ndiose loꞌo neꞌ. Ndalo neꞌ kanꞌ bra kanꞌ, ja ndaꞌan chunꞌ neꞌ chaꞌ wa msñi neꞌ chaꞌ kanꞌ. Loꞌo bra kanꞌ suꞌwe ꞌa chaꞌ nsuꞌwi niꞌ kasiya ꞌin neꞌ kanꞌ.

¹⁶’Ja tukwin xtya xaa niꞌ ñaꞌan ꞌin, chaꞌ tukunꞌ neꞌ ꞌin xaa kanꞌ chunꞌ ndiꞌin la; ti kwiꞌ ti chaꞌ, ja xtya neꞌ ska xaa ska niꞌ kiꞌyan ti. Ja ngiꞌni neꞌ ngwañaꞌan. Nxtya neꞌ xaa ska seꞌen nu kwan, chaꞌ xuꞌwi xaa chaꞌ ka ñaꞌan neꞌ nchga nan nu ndiꞌin niꞌ ñaꞌan kanꞌ.

¹⁷Nchga chaꞌ nu nsuꞌwi nchkunꞌ ꞌin nten ni, tyija lyo chaꞌ kanꞌ ꞌin neꞌ chunꞌ ndiꞌin la; nchga chaꞌ nu nsuꞌwi mnan ti ni, tyija chaꞌ kanꞌ ꞌin neꞌ chunꞌ ndiꞌin la, chaꞌ ka biyaꞌ tianꞌ chaꞌ kanꞌ bra kanꞌ.

¹⁸’Kanꞌ chaꞌ kunan suꞌwe wan sikwa. Nten nu ndyaa ñaꞌan tiꞌ chaꞌ nu ngiꞌni xaꞌan neꞌ chaꞌ ꞌin Ndiose ni, ti chkwiꞌ la Ndiose loꞌo neꞌ kanꞌ; loꞌo kanꞌ, nten nu ja ndyaa ñaꞌan tiꞌ chaꞌ kanꞌ, nu ja nchka tiꞌ kuꞌni xaꞌan chaꞌ kanꞌ, kuꞌni Ndiose chaꞌ ja ka ꞌin neꞌ kanꞌ kuꞌni xaꞌan neꞌ chaꞌ ꞌin Ndiose siyaꞌ ti.

¹⁹Bra kanꞌ mdiyan jyaꞌan Jesús, ndijyan loꞌo yu kiꞌyu taꞌa yu, mdiyan neꞌ seꞌen ndiꞌin yu bra kanꞌ. Ja ngwa kan neꞌ kwiꞌ seꞌen ndiꞌin yu, chaꞌ kaꞌan ꞌa nten ndiꞌin.

²⁰Kanꞌ chaꞌ ndyaa rsun nde seꞌen nduun Jesús bra kanꞌ: ―Chunꞌ naꞌan nduun jyaꞌaan loꞌo taꞌaa. Nchka tiꞌ neꞌ chkwiꞌ neꞌ loꞌoo ―ndukwin neꞌ ꞌin yu.

²¹Bra kanꞌ mxkwen Jesús ꞌin neꞌ: ―Nten nu nnan chaꞌ nu nchkwiꞌ Ndiose loꞌo neꞌ, loꞌo ngiꞌni neꞌ kanꞌ nchga tñan nu ndlo Ni ꞌin neꞌ, sa ñaꞌan si lka neꞌ jyaꞌaǎn, sa ñaꞌan si lka neꞌ taꞌaǎn, ngwañaꞌan lka neꞌ kanꞌ ―ndukwin Jesús ꞌin neꞌ.