39Se de inon ichtejcamen no ompa omasoutoya ihtech in cruz oteiluic: ―Tla tehhuatl Cristo, ximomaquixti huan noyojqui xitechmaquixti.
40Huan in oc seya oquixiluic in icompañero: ―Tel, ¿ahmo titemoucaita in Dios? Teh noyojqui ijcon titlapanotica.
41Tehhuanten matechtlapanoltican tleca tictlaxtlahuasque in tlen melahuac totlahtlacol oticchiuque. Huan inin tlacatl ahmo quichiutoc in tlen ahmo cuali.
42Oncan oteiluic: ―Jesús, xinechilnamiquis huan noca xitlocoya ihcuac ahxihuas tenahuac in tetlatequiutilistzin.
43In Jesús omonanquilic: ―Ic nele nimitziluiya, de axan nohuan tiyes nepa neluicac.