San Lucas 19:1-10

¹Jesús biiuny láani guɨdx ni lá Jericó ax guzulo cadeedny láani guɨdxqui,

²ne láani guɨdxqui rbez tuby bniety nguiu ni ná ricu ax láb Zaqueo. Laab rnabeeb lo de cobrador xte de impuest.

³Zaqueo rcaazbɨ gumbeeb Jesús, per quɨt releeti yianlobny te pur la zieny de bniety ne laab ax chaparrenzib.

⁴Pur ningui blluuinbɨ guzanɨɨdybɨ ne par güelee bianlob Jesús ax bieepybɨ lo tuby yag sicómoro ni zub gaxga rut ná par teedny.

⁵Chi gudeed Jesús ruy, bguiaany nez yaa ax raipny laab: —Zaqueo, quebiat angaré, te andxiré ná par yáana lizu.

⁶Chiyru gueeld biat Zaqueo ne quesentiand rzaclaazbɨ zéneb Jesús.

⁷Chi guná de bniety ziy, iratedeb guzulo rniyádeb Jesús rniideb dec laany zeyáanny liz tuby bɨnduld.

⁸Chiy guzuldí Zaqueo ax raipbɨ Jesús: —Bguiaabiu, Dad, quiizia iruldti ni napa lo de prob. Ne belati nuu bniety ni abaania cobrɨ mazru que zec ni ná par quillybɨ, anre ideedab tap zecti ni gulaanab.

⁹Chiy raipy Jesús laab: —Andxiré abaany Dios perdón irate de ni rbez liz Zaqueo pur reldilaazbɨ Dios zectiziac Abraham.

¹⁰Ne nare Bniety ni bxiaald Dios zelda par zedtíilia de bniety ni quɨt zé xnez Dios par ildaadeb lo duld.