Luka 19:1-10

¹Yesu Yeliko i luiya po i nenae.

²Ma noka hosi takisi tu tama hai bada waigapolana gowana Sakiyasi i mamae.

³Tauna i ileta ipa Yesu ina galeya naka iyowai ma ega emoemotana babana gahina i kuku duma ma bolu hi itugaagali.

⁴Ega yaka i bulili tahatahaya po Yesu apo tahayanei ina nenae mayau gehouna i geini.

⁵Ma hougana Yesu i nei po mayouna ugolina ma i luwatateya po Sakiyasi ugolina i baha i pa, ‘Una hopu yagiyagina mai babana amalai apo am u numa a mae.’

⁶Ega yaka Sakiyasi i hopu yagiyagina po a kaohana Yesu i weluwaya.

⁷Ma lawa atapuhi hi gagaleya po hi’mpili ma hi pa, ‘Geka lawana i witoumana nae tu apapoe a u numa.’

⁸Ma Sakiyasi i towolo po Guyau ugolina i baha i pa, ‘Guyau, una galeu. U gapola a kahaya po tupona apo tu dayadayabu a welehi ma tupona galiugei. Ma inapa iyai amaka koyamagei ma a ginouli a tamihi yaka apo ginoulihi hai lata mala wohepali a weleya.’

⁹Ma Yesu i baha nae ugolina i pa, ‘Tam Abelaham gogana gehouna ma amalai luyagohana i nei om numana u hinena.

¹⁰Ma Lawa Moinau a nei ipa lawa tu welupowa a bihehi po a luyawahihi.’