San Juan 7:46-52

⁴⁶Yalni ebnaj chitan̈en yatut Comam Dios tuꞌ hacaꞌ tiꞌ: —Caw machi hunu mac caw helan istzotel hacaꞌ istzotel naj, ẍi ebnaj yin̈ Comam.

⁴⁷Yalni xin ebnaj fariseo tuꞌ tet ebnaj: —¿Tom haꞌ hunex cheyakꞌ subchaho heba tet huneꞌ naj tuꞌ?

⁴⁸¿Tom ay hunu ebnaj yahawil chianayto yul yanma yin̈ tzet chal naj, maca hunujon̈an̈ han̈on̈ fariseo on̈tiꞌan̈?

⁴⁹Han̈cꞌan̈e huntekꞌan anma caw mach yohtajo isley naj Moisés, haꞌ chisubcha yu naj, yajaꞌ xin chiay isyaꞌtajil yiban̈ huntekꞌan anma tuꞌ yu Comam Dios, ẍi ebnaj.

⁵⁰Ay xin huneꞌ naj fariseo Nicodemo isbi, naj beycꞌo tzotelo tet Comam yin̈ huneꞌ akꞌbalil, haꞌ naj xin halni tet ebnaj yetbi tuꞌ:

⁵¹—Haꞌ chiyute yalni coley tato mach chu iscawxico ismul hunu naj yiban̈ yalan̈to maẍto chijabe tzet chal naj, yun̈e johtan̈eniloj tzet iswatxꞌe naj, ẍi naj Nicodemo tuꞌ.

⁵²Yuxinto yal ebnaj yetbi naj tuꞌ tet: —¿Tom ah Galilea hachpaxoj? Wal xin say yul Istzotiꞌ Comam Dios cat hawilni tato ay hunu ischejab Comam Dios chitit bey Galilea tuꞌ, ẍi ebnaj.