San Juan 7:14-20

¹⁴Ijkuak yoyaya tlajko ilwitl, Jesús otlejkok kan Weyi Tiopa iwa opé tlamachtia.

¹⁵N tlayakankeh judíojteh san omotlajtlachialtiayah iwa okijtoayah: —¿Kenomi nin tlakatl satlawel kimati miak, iwa amo omixtlamachti?

¹⁶Jesús okinnankili: —Notemachtilis amo Ne noaxka, yej de Akin onechaltítlanki.

¹⁷Akin kineki kichiwas tlan Dios kimonekiltia, kajsikamatis kox notemachtilis walewatok de Dios, noso nikijtoa san tlan Ne nikijtoa.

¹⁸Akin tlajtoa san tlan ye itlajtol, kichiwa san para makiyektenewakah n tlakah. Pero Ne nikneki nikweyijkachiwas Akin onechaltítlanki, yika nikijtoa tlan milák iwa ayik nitlakajkayawa.

¹⁹'Moisés onomechmák n tlanawátili, iwa nion se de nomejwah amo kichiwa tlan kijtoa non tlanawátili. ¿Tleka kiné nonkinekih nonnechmiktiskeh?

²⁰N tlakah okinankilijkeh: —Te tikpia se demonio; ¿akin kineki mitsmiktis?