SAN JUAN 5:19-22

¹⁹Te ni cahān Jesús: Jendaá cahán rī jiín ró jijnáhan ró: Ruhū jeē cúu Sēhe Yaā Dios, tú na vé cúu sáha ri jeē maá rí, chi máni sáha ri jeē jíto ri sáha Tátá rī. Chi tāca jéē sáha Tátá rī, suni sáha ruhū jeē cúu ri Sēhe ya.

²⁰Chi máá Tátá rī, manī yā jiín ruhū jeē cúu ri Sēhe ya, te stéén yā nuū rī ndɨhɨ jeē sáha ya. Te jéhnu ga jniñu stéén yā vēsú jeē ní cuu vijna, jeē naa ni rō coto ró jíjnáhan ró.

²¹Te nájnūhun jeē nastécu maá Tátá rī ndɨ̄yɨ te cotecu tucu i, suni súcuan ruhū jeē cúu ri Sēhe ya, nástécu rī ndé‑ni cúu jeē cuní maá rí.

²²Te máá Tátá rī, tu sándaā yā sɨquɨ̄ ni ɨɨn ñayuu, chi ni jēhe ya jnūhun jeē sándaā maá rí sɨquɨ̄ tāca ñáyuu, chi Sēhe ya cúu ri.