SAN JUAN 4:3-20

³Bra nu ngwa biyaꞌ tiꞌ Jesús chaꞌ wa ynan neꞌ fariseo chaꞌ kanꞌ, mdoꞌo yu lo yuu ꞌin Judea bra kanꞌ, ndyaa yu la lo yuu ꞌin Galilea kanꞌ xiyaꞌ.

⁴Kanꞌ chaꞌ ndyaa Jesús tuwiin, mdijin yu lo yuu ꞌin Samaria.

⁵Kanꞌ mdiyan yu kichen Sicar, ska kichen seꞌen ndiꞌin neꞌ Samaria. Ndiya kichen kanꞌ lo yuu nu wa mda ayman Jacob ꞌin ayman Se sñiꞌ yu nu ngwa sꞌni.

⁶Nde kwa ndiya ska tu tiyuu nu ndukwin neꞌ chaꞌ chku ꞌin ayman Jacob lka kanꞌ. Wa ndla ti ka ndiꞌya kwan ngwa bra kanꞌ, kwiꞌ ngwa tñaꞌ ꞌa Jesús tuwiin; kanꞌ chaꞌ ndyaa tukwa yu tuꞌwa chku kanꞌ.

⁷Wa ndyaa neꞌ nu ngiꞌni xaꞌan chaꞌ ꞌin yu lo kichen, ndyaa siꞌi neꞌ nan ku neꞌ. Chunꞌ ndiꞌin la yan ska nu kunaꞌan neꞌ Samaria, mdiyan yꞌya tyiꞌa bra kanꞌ. ―¿Ja taa chinꞌ tyiꞌa koꞌoǔn a? ―ndukwin Jesús ꞌin nu kunaꞌan kanꞌ.

⁹―Kwiꞌ neꞌ judío lka nuꞌwin ―ndukwin nu kunaꞌan kanꞌ―, loꞌo naꞌ lkaǎn neꞌ Samaria. ¿Ni chaꞌ lka njñaan tyiꞌa koꞌoo ꞌñaǎn? ―ndukwin nu kunaꞌan kanꞌ. (Ngwañaꞌan ndukwin chaꞌ ja suꞌwe nsuꞌwi neꞌ Samaria loꞌo neꞌ judío bra kanꞌ.)

¹⁰Loꞌo mxkwen Jesús ꞌin nu kunaꞌan kanꞌ: ―¿Ja jlyo tiiꞌ nchga chaꞌ suꞌwe nu nda Ndiose ꞌin nten a? ―ndukwin Jesús―. Si jlyo tiiꞌ ti ka nu lka nu njñan tyiꞌa koꞌo ꞌiin, ja chan nuꞌwin chkwiiꞌ loꞌoǔn chaꞌ taǎn tyiꞌa koꞌoo bra kanꞌ ―ndukwin yu―, loꞌo taǎn tyiꞌa koꞌoo nu chañi kuꞌni kuꞌu kasiya ꞌiin.

¹¹―Neꞌ kula ―ndukwin nu kunaꞌan kanꞌ ꞌin Jesús―, kiꞌñi ꞌa chku tiyuu re; loꞌo ja loꞌo balde ꞌiin ―ndukwin―. ¿Ni sa ñaꞌan ka kuloo tyiꞌa chaꞌ kuꞌni kuꞌu ꞌñaǎn a? ―ndukwin―.

¹²¿Ta kaꞌan la nsuꞌwi lyo nuꞌwin ke ayman Jacob ꞌñaan nu nda chku tiyuu re ꞌwa a? ―ndukwin―. Yiꞌo ayman kanꞌ tyiꞌa chku re, kwiꞌ ngwañaꞌan yiꞌo sñiꞌ yu, loꞌo skunꞌ neꞌ yiꞌo tyiꞌa re.

¹³―Bra nu koꞌo nten tyiꞌa chku re ―ndukwin Jesús―, xiyaꞌ kityi tiꞌ neꞌ chunꞌ ndiꞌin la ―ndukwin yu―.

¹⁴Loꞌo ni, xa nu koꞌo neꞌ tyiꞌa nu taǎn, ja kityi ꞌa tiꞌ neꞌ xiyaꞌ bra kanꞌ ―ndukwin―. Taǎn ska lo tyiꞌa koꞌo neꞌ nu kuꞌni kuꞌu kasiya ꞌin neꞌ. Sa ñaꞌan lka si tyukwa tyiꞌa niꞌ kasiya ꞌin neꞌ, ngwañaꞌan lka chaꞌ kanꞌ, loꞌo ja tsaa tii ꞌa chalyuu nu taǎn ꞌin neꞌ bra kanꞌ.

¹⁵Mxkwen nu kunaꞌan kanꞌ ꞌin Jesús bra kanꞌ: ―Taa lyaa tyiꞌa kanꞌ koꞌoǔn, neꞌ kula ―ndukwin―, chaꞌ ja kityi ꞌa tiǎnꞌ xiyaꞌ, chaꞌ ja ka ꞌa tlyu tñan ꞌñaǎn kan yꞌyaǎn tyiꞌa nde re.

¹⁶Loꞌo ykwiꞌ Jesús loꞌo nu kunaꞌan kanꞌ bra kanꞌ: ―Yaa lyaa yaa tiꞌin ꞌin kwilyoꞌoo chaꞌ kan yu nde re.

¹⁷―Ja ndiya kwilyoꞌoǔn ―ndukwin nu kunaꞌan kanꞌ bra kanꞌ. ―Ñi ꞌa chaꞌ ykwiiꞌ loꞌoǔn chaꞌ ja ndiya kwilyoꞌoo ―ndukwin Jesús bra kanꞌ―.

¹⁸Wa kiꞌyu yaꞌ mjwi kwilyoꞌoo nu ngwa sꞌni, loꞌo siꞌi kwilyoꞌoo lka nu kiꞌyu nu ndiꞌin loꞌoo ni ―ndukwin yu―. Ñi ꞌa chaꞌ ykwiiꞌ loꞌoǔn.

¹⁹―Neꞌ kula ―ndukwin nu kunaꞌan kanꞌ―, ngwa biyaꞌ tiǎnꞌ ni, chaꞌ ndiꞌin ꞌa chaꞌ tiya ꞌiin, chaꞌ nuꞌwin lkaa ska nu nchkwiꞌ chaꞌ ꞌin Ndiose loꞌo nten ―ndukwin―.

²⁰Kiꞌya kwan kwa ni, kti ꞌa kiꞌya kwan kwa ꞌin nu ngwa ayman ꞌwa ti sꞌni, chaꞌ nde kwa yꞌni tnun ayman kanꞌ ꞌin Ndiose; loꞌo xka chaꞌ ndaꞌan tiye wan neꞌ judío, chaꞌ ndukwin wan chaꞌ ndiꞌin chaꞌ kuꞌni tnuan ꞌin Ndiose ska ti niꞌ lyaa tnun nu ndukwa Jerusalén.