San Juan 4:1-33

¹Benne' fariseo ca' belenne̱' zjácale̱ benne' zandxa Jesús ca benne' zjácale̱ne̱' Juan, na' dxuchúa Jesús benne' zandxa nisa ca benne' dxuchúa Juan nisa.

²Quebe dxuchúaqueze Jesús bénneache nisa. Benne' ca' dxusé̱dene̱' dxuluchúe̱' bénneache nisa.

³Gate guque be'e Jesús da nigá, na' bezé̱'e̱ naga nababa Judea, xexíaje̱' naga nababa Galilea.

⁴Ca xu'u Jesús neza, be̱n na ba xen tée̱' naga nababa Samaria.

⁵Ca'an guca, bzrine̱' tu xe̱zre naga nababa Samaria nazí le na Sicar, da dxe' gáguze naga zua xe̱zr la xu na' bnezruj Jacob chee̱ zrí'ine̱', bi le̱be' José.

⁶Lu xe̱zr la xu na' gudé̱n Jacob, zre sua Abraham, tu beaj situj. Ba dxeajxreque Jesús xu'e̱ neza, na' gudxé'e̱ dxu'a beaj na'. Naca na zran wagubizra.

⁷Benne' ca' dxuse̱de Jesús xjaque̱' lu xe̱zre Sicar, xeajlegá'awe̱' da xelawe̱'. Dxácate̱ na' bzrin tu nu'ula Samaria dxu'a beaj na' zeajxri'e̱ nisa, na' Jesús guzre̱' le̱': ―Be̱nna nisa xí'aja'.

⁹Nadxa nu'ula na' beche̱be̱': ―¿Ájazra naca, lue', benne' judío, dxenabu' neda' nisa, naca' nu'ula Samaria? Caní gunné̱' lawe' da quebe zaj zra' chawe' benne' judío ca' nen benne' Samaria ca'.

¹⁰Nadxa beche̱be Jesús: ―Chela nézenu' da dxunna Dios, ne nua' dxenabe̱' lue' nisa xí'aje̱', lue' nábenu' neda', na' neda' gunna' lue' nisa da gunna na lue' xel-la' nabán.

¹¹Na' nu'ula na' guzre̱' Le̱': ―Benne', quebe bi nuxru' cuéaju' nisa, na' beaj nigá nácale̱'e̱ na situj. ¿Ájazra na' gunu' gunnu' neda' nisa chee̱ xel-la' nabán?

¹²Xra xrtáuntu', Jacob, be̱nne̱' netu' beaj nigá, naga güé'equeze le̱' nisa, ne naga gulé'ajqueze zrí'ine̱', ne be̱ xixre' chee̱'. ¿Nácadxu' szrendxa ca le̱'?

¹³Jesús beche̱be̱': ―Xúgute̱ benne' dxelé'aje̱' nisa chee̱ beaj nigá welexebílequezne̱' nisa.

¹⁴Nu benne' xí'aje̱' nisa da gunézruja' neda', québedxa bílene̱' na, lawe' da nisa na' dxunézruja' neda' galaj na lu xichaj lázrdawe̱' ca tu beaj nisa da gunna na le̱' xel-la' nabán da zeajlí canna.

¹⁵Nadxa nu'ula na' guzre̱' Le̱': ―Benne', be̱nna neda' nisa na', chee̱ québedxa gun na ba xen xida' nigá xedajxrí'a nisa.

¹⁶Na' Jesús guzre̱' nu'ula na': ―Guxíaj xeajnné̱ benne' chiu', na' xídale nigá.

¹⁷Na' beche̱be nu'ula na': ―Quebe nu chilá' benne' chia'. Nadxa Jesús guzre̱' le̱': ―Da li dxennáu' quebe nu chilá' benne' chiu',

¹⁸lawe' da ba guzúale̱nu' gazxu' benne', na' bénnea' zúale̱nu' na'a quebe naque̱' benne' chiu'. Ca naca da nigá gunnáu' da li.

¹⁹Gate nu'ula' benne̱' da nigá, na' gunné̱': ―Xran, dxéqueda' nacu' lue' benne' dxuchalaje̱' waláz chee̱ Dios.

²⁰Xra xrtáuntu' ca' bulucá'ana szrene̱' Dios lu xi'a nigá, na' le'e, benne' judío, dxennale dxun na ba xen gucá'ana szrendxu Dios xe̱zre Jerusalén.

²¹Na' beche̱be Jesús: ―Guxéajle̱ chia', nu'ula. Ba za zra gate le'e gucá'ana szrenle Xradxu Dios, ne quebe gun na ba xen xídale lu xi'a nigá, ne quebe gun na ba xen chéajle Jerusalén.

²²Le'e, benne' Samaria, quebe núnbeale nua' dxucá'ana szrenle. Netu' núnbeantu' Nua' dxucá'ana szrentu', lawe' da za' benne' weselá ládujla benne' judío ca'.

²³Wazrín zra, ne ba dxezrín zra na', gate benne' ca' da li dxulucá'ana szrene̱' Xradxu Dios, xelune̱' na ne̱ chee̱ Be' Lá'azxa, ne ne̱ chee̱ da li, lawe' da dxaca lazre' Xradxu Dios xulucá'ana szren bénneache Le̱' caní.

²⁴Dios naque̱' Be', na' benne' dxulucá'ana szrene̱' Le̱', dxun na ba xen xulucá'ana szrene̱' Le̱' ne̱ chee̱ Be' Lá'azxa, ne ne̱ chee̱ da li.

²⁵Na' nu'ula na' guzre̱' Le̱': ―Neda' nezda' walá' benne' Mesías (da zéaje̱ na Cristo), na' gate la' Le̱', na' guzéajni'ine̱' dxi'u ca naca xúgute̱.

²⁶Jesús guzre̱' le̱': ―Neda' naca' Bénnea', dxuchálajle̱na' lue'.

²⁷Ca gunné̱' ca', na' belexezrín benne' ca' dxuse̱dene̱', na' belexebánene̱' lawe' da dxuchálajle̱ Jesús tu nu'ula Netúe̱' quebe bexázrjene̱' guche̱be̱' Le̱' bi da dxaca lazre̱', u bizra chee̱n dxuchálajle̱ne̱' nu'ula na'.

²⁸Nadxa nu'ula na' bca'ane̱' dxe'e chee̱' dxu'a beaj na', na' bezé̱'e̱ zexíaje̱' xe̱zre na' naga xeaje̱zre̱' benne' ca':

²⁹―Le da lé'ele tu benne' guzre̱' neda' xúgute̱ da ba be̱na'. ¿Quegá benne' nigá Cristo, Bénnea' sel-la Dios?

³⁰Nadxa beledxúaj benne' ca' xe̱zre na', zjaque̱' naga zua Jesús.

³¹Dxácate̱ na', benne' ca' dxuse̱de Jesús gulata' xuene̱' Le̱', gulenné̱': ―Benne' Wese̱de, gudagu late'.

³²Jesús guzre̱' benne' ca': ―De̱ da dxawa', da quebe núnbeale le'e.

³³Nadxa benne' ca' dxuse̱de Jesús gulezú lawe̱' dxuluche̱be ljwezre̱', dxelenné̱': ―¿Núteca bedajgú'e̱ da gudawe̱'?