San Juan 2:7-24

⁷Te n‑jaꞌan Jesús nuu se ka dakee xio xa io viko: —Dachitu yoo ya ndute. N‑ka dachitu‑s yoo ndute.

⁸N‑xiaꞌan‑ia: —Vitna tava itaꞌu‑té, te kaneꞌe‑té juaꞌan nuu se yɨndaꞌa ntdaa xa io viko. Te neꞌe‑s‑té juaꞌan.

⁹N‑xiꞌi se yɨndaꞌa viko itaꞌu ndute n‑nduu vinu, ko mee‑s ña n‑xini nde n‑kixi vinu. Ko n‑ka xini se ka dakee xio xa io viko, chi mee‑s n‑ka xe tava‑té. Se yɨndaꞌa xa io viko, n‑kana‑s noviu, te n‑jaꞌan‑s:

¹⁰—Ntdaa ñayiu, ditna ka dakee xio‑i vinu vaꞌa ka. Te dada, na n‑yaꞌa xa n‑ka xiꞌi vaꞌa se xyɨꞌɨ viko, dakee xio‑i vinu ndaꞌu ka. Ko mee‑n, nevaꞌa‑n vinu vaꞌa ka nde vitna.

¹¹Duꞌa n‑kuu milagru kiꞌna nuu n‑kida Jesús. Ñuu nani Caná distrito Galilea, n‑dandeꞌa Jesús ñayiu xa taxnuni‑ia nuu ntdaa xa io. Te n‑ka jandixa ñaꞌa se dakuaꞌa‑ia.

¹²Te n‑xeꞌen Jesús ñuu nani Capernaum. Dɨꞌɨ‑ia, ñani‑ia, se dakuaꞌa‑ia du. Ijan n‑ndoo‑ia uni koon kɨu.

¹³Vax kuyatni ɨɨn viko ñayiu Israel. Viko nani Paxcua. N‑xeꞌen Jesús ñuu nani Jerusalén.

¹⁴Ijan yeñuꞌu, n‑nanitnaꞌa‑ia xiꞌin se ka diko ngutu, tkachi, data. Se ka dama tvini du. N‑ka nukoo‑s ijan.

¹⁵N‑kava‑ia ɨɨn chirrión ñɨɨ. Chirrión jan, n‑kineꞌe‑ia ntdaa se ijan, xiꞌin tkachi‑s, ngutu‑s. N‑kida‑ia xa jungoio centau kuechi se ka dama tvini, te n‑dajane‑ia mexa‑s.

¹⁶N‑jaꞌan‑ia nuu se ka diko data: —¡Kaneꞌe koio ntdaa xaꞌa juaꞌan! ¡Maxku kada koio ka‑n xa veꞌe Taa‑r kuu ná kuu nuyaꞌu!

¹⁷Te n‑ka najaꞌan se dakuaꞌa‑ia nax jaꞌan tnuꞌu Ianyuux: “Yo kudaꞌan‑da veꞌe Ianyuux. Kuu ná kuu ñuꞌu koko danaa ñaꞌa.”

¹⁸Xijan kuu xa n‑ka jaꞌan se Israel nuu‑ia: —¿Na milagru kada‑n xa dandeꞌa ñaꞌa‑n xa taxnuni‑n? ¿Nax kuu xa kineꞌe‑n se ijan veñuꞌu?

¹⁹N‑jaꞌan Jesús: —Kanu koio veñuꞌu yaꞌa, te nuu uni kɨu ndadavaꞌa‑r.

²⁰Xijan kuu xa n‑ka jaꞌan se Israel: —Uu diko iñu kuia n‑ka kidavaꞌa‑s veñuꞌu yaꞌa, ¿te mee‑n jaꞌan xa ndadavaꞌa‑n nuu uni kɨu a? ¡Juun!

²¹Ko xaxeꞌe yɨkɨ kuñu mee‑ia n‑jaꞌan‑ia.

²²Xijan kuu xa, na n‑nandoto‑ia xa n‑kuu‑ia ndɨyɨ, te n‑ka najaꞌan se dakuaꞌa‑ia xa duꞌa n‑jaꞌan‑ia. Te n‑ka jandixa‑s tnuꞌu Ianyuux xiꞌin tnuꞌu n‑jaꞌan Jesús.

²³N‑xo tuu Jesús Jerusalén viko Paxcua, te n‑ka jandixa ñaꞌa kueꞌe ñayiu, chi n‑ka xini‑i milagru n‑kida‑ia.

²⁴Ko mee Jesús, n‑xetnɨɨ anu‑ia nuu ñayiu jan, chi naꞌa‑ia ntdaa xa ka xani ini‑i.