SAN JUAN 2:4-15

⁴Ate ra̱hn Dihvo vo ri ye ihyan: ―Chacó, metah deh cuande che ca̱hma ne nducó yahn vino, te metah nda̱ ura che cuhnde ro vederihquentiyon che quenan cumá.

⁵Tuhme ra̱hn chaco ye ri ye sa̱hn che chenan se rinan se na̱n vihco me: ―Codinahn nchuhn nducuahn che ca̱hcantiyon ye.

⁶Min vate a̱n chite rahte che dema̱n tu ndi ndah. Chite chemin chan ne, che retoh ihyan nación yahn Israel, rih ye nune che rena̱no ye dehtenduh ca̱va che co vihco nduhca̱ costumbre yahn ye. Queri a̱ma chite chemin chan ne, rahn tenduh a̱ma ciento litro nune.

⁷Ra̱hn Dihvo vo ri ye sa̱hn chahn: ―Cuedecuto nchuhn nune chite che tihchan vate ta̱n. Cuahn che a chihno decuto nahn se chite chahn ne,

⁸tuhme ra̱hn Dihvo vo ri ye sa̱hn: ―Ma̱n ne, cuetenda̱h nchuhn tah, ne ca̱h ne nda̱co ndihte. Dinahn sa̱hn chahn,

⁹ne ca̱h se nda̱co ndihte me, dechihn ye. Nune me ne, a nta̱conda̱ vino, nde hua devano nda̱co ndihte me ti chica, atena̱n sa̱hn chahn. Tuhme cah ye sa̱hn che rihneva̱co me,

¹⁰ne ra̱hn ye ri ye sa̱hn: ―Nducoya̱ca ihyan che redin ye vihco ne, dinoca vino ndah reca̱h ye, ne cuahn che a ya̱ ndih ihyan ne, reca̱h ye vino ndere. Me di ne, ¿dehra cuande che denderen che redin, nde ma̱n tendah vino ndah?

¹¹Tihca̱ chi che cana̱n din Dihvo vo vederihno, min ya̱n Caná, esta̱do yahn Galilea, chihco ro ye che a̱ma yudo vederihquentiyon che quenan cuma ye, ne ihyan che rinduco ye ihyan ne, chitahno ye ihyan.

¹²Chihno min ne, cuahn Dihvo vo ya̱n Capernaum nduco chaco ye ma̱n, dihno ye ma̱n, ihyan chahn che rinduco ye ihyan ma̱n, ne min chahtenan ye nduco vih neve ro.

¹³Cuahn che a nda̱ nino vihco ro yudo che renun va̱n ihyan nación yahn Israel ne, cuahn Dihvo vo ya̱n Jerusalén.

¹⁴Cuahn che nda̱ ye min ne, cuahn ye chete ya̱co chahte, ne min chenun sa̱hn che rendihcue itenine ma̱n, sa̱hn che rendihcue itecuche ma̱n, sa̱hn che rendihcue icui ma̱n. Namin min chenun sa̱hn che rendahcorun tume, vate se na̱n mesa yahn se.

¹⁵Tuhme din chine ye a̱ma ndi ihyo, ne nduco chemin ndetenda̱h ye sa̱hn chahn chete ya̱co, nde nduco itenine yahn se ma̱n, itecuche yahn se ma̱n. Me sa̱hn che rendahcorun tume chahn ne, chih muhn chih min ye mesa yahn se, chihtera ye tume me ndiya̱hn.