YOHAAN 2:4-15

⁴Dhala Yesus ki owa yim gwo mo ki: Ayy a’boma. A’di midi mii /e katinta dhali aha/ mo? Haali/ mom pem diki p̱u’d naskina/ mo be.

⁵Dhali kum ki o imanmiiya ṯu’c gwo mo ki: Miiyi a’diyin jin mina a’di iṯor um mo.

⁶Dhali dhur wosh ’kokini pe’de/ mo kun caaca mo kun dhukunu mo gom ’Kwani Yahuuda/ mo mmolam to mo me’d mii gi gwoŋḵan jin c̱inu mo be. Jin ṯal ’de/ ḵalki’da jaluun bwamani iss ’de/ mo walla jaluun bwamani iss ’de/ i’ce’dka ’kume’d mo be.

⁷Yesus ki o uni gwo mo ki: ’Tu’di dhur gwansan ki yi’de/ mo ma. Dhali uni ki ’tu’d uni ki sheŋgolu/ ilu/ mo be.

⁸Dhali a’di ki o uni gwo mo ki: Pashi mo ma dhali ha’bki a’di eya mancila to gi mo jin yuḵuwa yuḵ mo. Wakan uni ha’bki a’di mo be.

⁹Dhali ka mancila to gi mo jin yuḵuwa yuḵ mo nyoḵki yi’de/ jin warki’d ki yimana mura’th mo tani dhali a’di diki mish mo jin ha’bkunu a’di ’peni nycine/ mo (bahili jasi imanmiiya ṯu’c uni mishki mo jin ha’bkunu yi’de/ ’peni cine/ mo) dhala mancila to gi mo jin yuḵuwa yuḵ gom montul ’kup̱ mo tani a’di ki yuḵ wathinyaŋa’b mo be.

¹⁰Dhali a’di ki o a’di gwo mo ki: Aris ’kwani ’baar mo ka ’deṯe/ ’deṯe/ c̱iki ’kwani yimana mura’th jin ’boro’di ṯwa/a/ mo, dhali ki ’kwani p̱ikini kap̱ mo tani yimana mura’th jin thap̱athap̱ mo c̱iyunu ’kwani mo be. Hili /e karki yimana mura’th gana/ mo ntagi shwanesan mo be.

¹¹Mii yansan a’di ta miimer jin ṯwa/a/ jin miikin ma Yesus e Paŋ Kaana gi Pany Jaliil mo dhali a’di ki ṯor monycam piti eya tente/ mo, dhali imanciḵ a’di gwo gamki gwo is e a’di mo be.

¹²Dhali ’ko’di mii yan mo tani a’di yaki’d ka luŋgu’b e Paŋ Kap̱ranahuum nyaḵki kum mo dhali ikam piti mo dhali imanciḵ a’di gwo mo dhali uni ki ’ko imun ka cim ka hony/e mo be.

¹³Dhali Mompe’kup̱anyolos gi ’Kwani Yahuuda/ dishki’d mo dhala Yesus yaki’d ka gagamis e Pa Urushaliim mo be.

¹⁴Dhali e gu’b gi mondheleladhelel mo tani a’di gamki uni gwansan kun ’kokin mo mmoyola morbip̱ mo dhali ḵa’bal mo dhali gurko/ mo, dhali uni kun ta imanwan emena guurush mo eya ṯu’c buni mo be.

¹⁵Dhali a’di ki ṯo’d guluca ’ci’d mo dhali a’di ki ur uni ’baar ka pije/ mo ki ḵa’bal ilu/ mo dhali ka morbip̱i lu/ mo ’peni gu’b gi mondheleladhelel mo, dhali a’di ki wol emena guurush ’pera ’cesh mo dhali a’di ki kuma tharabeesam buni ’twa/a ’cesh mo.