John 2:4-15

⁴Jesu-el renh tjernemel ilek, “Tjengan arltang nhenh itja anem, yeng rrkwapetjehan. Yeng arnterr pawenhetjal anay. Mpank arltang arrpenh-ingar yeng rrkwapetjenh mernelhetjehan, kelant inang yeng alhengk-aretjenheng.”

⁵Mary-el rrkwapenh-apenh map ilek, “Rang apek arrantherrenh twernemeng, arrantherr kel kwer kangkwerretjehant!”

⁶Tjerrtj Jew map kweteth iltjang inngerr-arlk lhewelhetjart, mpwareng-areng inehenh-angkwerr. Warl kwerel drum kwatj-kenh 6 irnek, nheng inarl tjerrtj lhewelhetjenheng. Drum nyentel kwatj 100 litres antwerrkem. Drum nhenh inang pwertengarl mpwarekarl.

⁷Jesu-el rrkwapenh-apenh inenh twernek, “Drum map-warn kwatj thelewarrang, angerr-ilemel kerneh-atwetj.” Kel inang drum inenh-warn kwatj angerr thelek.

⁸Kwereng rang inenh ilek, “Kwatj kwek tjampetel anweng-inemel, arrantherr nhenh twernk tjenkerreh-artwey-warn angerrerrang, rang arrkernetjeh.” Kel inang lakenh mpwarek, rang wart inenh twernekarl.

⁹Tjenkerrek-artwey rangemeh kwatj wine irrekarl renh arrkernemel antjwek. Rrkwapenh-apenh inang kaltj anek, wine renh drum kwatj-akerteng inekarl. Tjenkerrek-artwey rang nhenheh itjarl kaltj anek. Rang artwang arrkar inekarl kwer ntangkelhek.

¹⁰Rang renh ilek, “Nhenh-artek wine mwerr anthwerr, tjekert anetj-kweny! Tjerrtjel kwenh wine mwerr-lkwer-amparr antjwetjeh anthem! Kwereng wine mwerr inehenh ingkerrek antjwek-arleng, wine tjekert inang ingkern anthem. Wenhengam ntwang wine mwerr alengk-wek? Nhenh-artek wine mwerr anthwerr!”

¹¹Jesu-el twer angerr kwerenh rrkwapek, town kwek Cana-el mer Galilee-el. Lakenh rang twer angerr alker-areny anthwerr mernelhemel mpwarek tjerrtj mapeng ularr. Kwertengerl kwerenh mapel renh nakek-antem.

¹²Kwer-penh Jesu rang town Capernaum-warn peltj kwerenh mapel-ayeng alhek. Matj kwerenh, kenheng-nheng kwerenh kwertengerl kwerenh map inehel-ayeng angkep alpek. Inang Capernaum mer kwerel arltang rrpwetj war anek.

¹³Tjerrtj Jew map-henh irlpangkentjeh arltang rang angathemeh irrerl-apetjam. Irlpangkentj arreny kwerenh Anper Alhekarl anek. Inang irlpangketjart, Altjerrel arrwekeleny map angek mer Egypt-eng. Jesu rang arrwekel Jerusalem-warn alhek, tjenkerr renh kelant arlkwetjeh.

¹⁴Rang arentj-alpek, church angerr iterel yard-el pwelek yep-yep ntwerrert-arlk maneyeh sell-em-iletjart. Artwang arrpenh map maney angart-wenh-wenh table inehenhel anetjam.

¹⁵Jesu-el whip mpwarek rope-penh. Kwereng rang artwang inenh yard-eng anhelemel anpwek, yep-yep inehenh-akert pwelek inehenh-akert. Artwang maney angart-wenh-wenh map-henh table rang angart-wemel taly-wek. Maney inehenh-arlk irrarnp-wek.