SAN JUAN 2:1-9

¹Chaymanta kimsa diya washan Galilea partipi Kana llaktapi suk funsia tiyarkan. Chay funsiapi Jesuspa maman karkan.

²Ñukaykuna Jesuspa disipulunkuna paywan tantalla invitadu kashpaynikuna rirkanisapa.

³Chay funsiapi aypa runakuna kaptin vinu pishirkan. Chayrayku mamanka Jesustaka willarkan: —Vinuka ñami tukushkana.

⁴Chaypina Jesuska willarkan: —Mamayni ¿imapatí ñukata willawanki? Tatayni Dioska manarami willawashkarachu riksichinakunaynipa.

⁵Chashna Jesus willaptinpish mamanka mikuna sirvikuk runakunata willarkansapa: —Tukuy Jesus willashunaykichita ruraychi.

⁶Chaypi tiyarkan sokta atun rumimanta ruradu puyñukuna yakuta churanankunapa. Chay yakuwan judiyu runakuna amañaksapa mayllakuyta chuya chuya Tata Diospi rikurinankunapa. Chay atun puyñukunapi chunka ashwan taksha puyñu yaku yaykuk.

⁷Chaypina Jesuska mikuna sirvikuk runakunata willarkansapa: —Kay atun puyñukunata yakuwan untachiychi. Chashna willaptinkuna shimi shimita untachirkansapa.

⁸Chaypina Jesuska willarkansapa: —Kunanka chay puyñukunamanta suk tipita wishishpa funsiapi kamachikukta mallichiychi. Paykunaka Jesus willashkanshina aparkansapa.

⁹Chayta kuptinkuna chay kamachikukka mallirkan mishkik likidu vinuta. Chay karkan yakumanta ruradu vinu. Payka manara yacharkanrachu maymantami chay vinuta surkushkasapa nishpa. Funsiapi mikuna sirvikuk runakunalla yacharkansapa. Chaypina funsiapi kamachikuk runaka noviota kayarkan.