Juan 2:1-9

¹C̈hjep majquiztan tsjii zalz pjijzta z̈elatc̈ha Caná wajtquin, Galilea yokquin. Jesusiz̈ maa nicju z̈elatc̈ha.

²Niz̈aza Jesusaqui niiz̈ tjaajinta z̈oñinacz̈tanpacha nii zalz pjijztiquiz kjawz̈tatac̈ha.

³Jalla nuz̈ pjijzta paan vino upzitac̈ha. Jalla nekztanaqui Jesusiz̈ maaqui niiz̈quiz cjichinc̈ha: —Vino upzic̈ha.

⁴Jesusaqui naaquiz tuz̈ kjaazic̈ha: —Maataka, ¿kjaz̈tiquiztan nii puntu wejtquiz chiijo? Wejt langz ora imazic̈ha.

⁵Pero naaqui nekz atintiñi sirwizunacz̈quiz cjichinc̈ha: —Tiiz̈ mantitacama anc̈hucz̈ paaquic̈ha.

⁶Jalla nicju sojta pajk maz luuznaca z̈elatc̈ha. Judío z̈oñinacaqui ajunz cuzturumpi paazjapa luuznaca joojooñitac̈ha. Zapa luuzquiz quinzakal tunc litro, patac litro, nuz̈ kjaz luzñitac̈ha.

⁷Nekztan Jesusaqui nii pjijzta paañi sirwizunacz̈quiz mantichic̈ha, tuz̈ cjican: —Tii luuznacquiz anc̈hucqui kjaz chjijpznaquic̈ha. Nekztanaqui luuz joracama kjaznaca chjijpzic̈ha.

⁸Jalla nekztanaqui Jesusaqui cjichic̈ha: —Jaziqui tsjii zkoluculla cooz̈na. Nekztan pjijzta paañi patrunz̈quiz chjicha. Jalla nuz̈ niiz̈ chiitacama chjitchic̈ha.

⁹Nii pjijzta paañi patrunaqui mallzic̈ha nii kjazquiztan vino tucchi. Jakziquiztan tjonchi nii vino, jalla nii ana zizatc̈ha. Sirwizunacakaz zizatc̈ha. Ninacaz̈ kjazqui cootkalc̈ha. Jalla nuz̈ nii vino mallz̈cu pjijzta paañi patrunaqui nii zalzñi tjowa kjawzic̈ha.