San Juan 21:2-17

²Deni dxasaa Simóny Bed, cun Mally ni raipdeb Cuach, ne cun Natanael ni zá Caná ni ná nez Galilea, cun de llingaan Zebedeo ne cun stiop de xpɨny Jesús.

³Chiy raipy Simóny Bed laadeb: —Nare chanaaza beld. Laadeb cuaibdeb: —Néza dunnɨ izan. Chiyru zédeb ax bieepydeb láani barcu, per guxinqui xíteete quɨt ninaaztideb.

⁴Chi bragueel deni bieeny chiy bdiacá Jesús ruxchu nisqui, per de xpɨnnyqui quɨt gántideb dec laaniy.

⁵Chiy gunabdiidx Jesús laadeb: —De hombreen, ¿ta gady xi inaaztɨ? Laadeb cuaibdeb: —Xíteete.

⁶Chiyru raipy Jesús laadeb: —Gulcuaa tarray xtentɨ lad naldí xte barcu, te inaaztɨ beld. Ziy xquel baandeb, parzi chiguld niclɨ quɨt relee cuéedeb tarrayqui tant zieny beld nuu láanqui.

⁷Chiy xpɨny Jesús ni quesentiand rcaazny, raipbɨ Bed: —¡Dad Jesúsiy! Cuantpac bindiag Simóny Bed ziy, as gudacubɨ xabloyaab ni guléeb par canaazbɨ beld, ax desde láani barcuqui btesbɨ axtquɨ lo nis.

⁸Per dzɨ xoop de xpɨny Jesús láani barcu bdzɨndeb ruxchu nisqui. Rxiubiudeb tarray ni dxaa beldqui, te pur zecti stuby gayuaa metrɨ rieedx idzɨndeb par ruxchu nis horqui.

⁹Deni bdzɨndeb ruxchu nisqui, gunádeb cayac gui ruy ax zuub tuby beld lo guiqui, cun guechtily.

¹⁰Jesús raipny laadeb: —Gultané tuby tiop beld ni teste gunaaztɨ.

¹¹Chiyru bieepy Simóny Bed láani barcuqui, ax bxiubiudeb tarray ni dxaatec de beldroo axt ruxchu nisqui. Tuby gayuaa cincuenta y tres beld nuu láanqui. Ne masquɨ zienmɨ, per quɨt niallaati tarrayqui.

¹²Chiy raipy Jesús laadeb: —Gultaa te iquiintɨ. Ne nic tuby de xpɨnny quɨt riallti inabdiidx laany tú laany, te pur nándeb dec laaniy Jesús.

¹³Chiyru gubii Jesús, cuáany guechtilqui bdeedny laadeb, ziytiziac baanny cun beld.

¹⁴Niy guc chon güelt ni bliulo Jesús lo de xpɨnny deni gubíi gubánny.

¹⁵Chi gulull bquiindeb chiy raipy Jesús Simóny Bed: —Simóny, llingaan Juany, ¿ta rcaazrupacu nare que iraru de ni rguiuu rurén? Bed cuaibbɨ: —Ɨɨ́, Dad, laabiu nánbiu dec rcaaza laabiu. Ax raipy Jesús laab: —Bcualo de lliliin xtena pɨs.

¹⁶Chiy gubíi gunabdiidx Jesús laab: —Simóny, llingaan Juany, ¿ta rcaazpacu nare? Bed cuaibbɨ: —Ɨɨ́, Dad, laabiu nánbiu dec rcaaza laabiu. Ax raipny laab: —Bcualo de llíily xtena pɨs.

¹⁷Ni rion güelt gubíi gunabdiidx Jesús laab: —Simóny, llingaan Juany, ¿ta rcaazu nare? Bed nalas bziienbɨ pur ni gunabdiidxny laab chon güelt la rcaazbɨny. Chiyru cuaibbɨ lony: —Dad, laabiu nánbiu irate. Ne laabiu nánbiu dec rcaaza laabiu. Jesús raipny laab: —Bcualo de llíily xtena pɨs.