2I lenri: Ara bung o Saimon Pita ma o Tomas, ra di watungi kai nama kasango, ma o Natanael a te Kana tagun a papor Galili, ma aru nutun o Sebedi, ma aru kai tagun a kum nat na ususer, det kis tomo.
3Ra o Saimon Pita i watungi tandet lena, “An nan, an woro a uben.” Det balu i lena, “Dat tomo.” Ra det kas pas una pot ma det wan. Ikut una bung na mirum ra, ka det dat lako kiripo.
4Una komkobot raut, o Iesu i tur taru nago una usalin, ikut a kum nat na ususer ka det tasmani lena o Iesu ut ra.
5Ra o Iesu i kakabo torom det lena, “A kum nat, mot dat pas lako kiripo ut?” Det ipul kut lena, “Awu.”
6O Iesu i watungi tandet lena, “Mot in woro a uben una papor sot na lamamot, sur mot in dat lako kiripo.” Det woro i lari ra i watungi. Ra det lagano datdat tar a uben, uni i bukus nama kum kiripo.
7A nat na ususer ra o Iesu i ser nem doko i, i watungi tan o Pita lena, “A Labino ut nago!” O Saimon Pita i longoro i lena a Labino ut nago, ra i pipis melet pas in namalu ra i palos tari ra i woro a uben, ma i sirok losop utiro utasi.
8A kum nat na ususer det mur nama pot unago una usalin. Ma det dat piso pas a uben ra i bukus nama kum kiripo, uni ka det bakbak gusun a usalin, i elar kut nama limo na noino sinanga.
9Det sirok gusun a pot, ra det tama a lakit na sungun ma a kiripo kusapat netes uni, ma det tama i kai a beret.
10O Iesu i watungi tandet lena, “Mot in los lako kiripo urin tagun a kum kiripo ra unikutri mot uben pasi.”
11Ra o Pita i kas una pot, ra i dat pirso a uben unago una usalin, ma i ulit ru a kum kiripo gusuni. I bukus nama kum lamlabino kiripo, a nilulukin det i elar nam ara mar ma limo na noino ma tul. Det susut doko, ikut a uben ke tararos.
12O Iesu i watungi tandet lena, “Mot wan urin ma mot in nangon.” Kataio tagun anun a kum nat na ususer i pet lar pasi sur in tingi lena, “Ui osi?” Det sa tasmani lena i a Labino ut ra.
13O Iesu i los pas a beret ma i tabor det nami, ra numur i tabor det bulung nama kiripo.
14Iri a mantul na dino ra o Iesu i wanpat torom anun a kum nat na ususer, numur tan anun a katkatutur melet gusun a minat.
15Ra det sa wangon rop, o Iesu i watungi tan o Saimon Pita lena, “Saimon, nutun o Jon, pepetlai, u nem doko iau taun det ri?” I balu i lena, “Lingmulus, Labino, u tasmani lena a nem ui.” O Iesu i watungi tano lena, “Un tabor anung a kum nat na sipsip.”
16O Iesu i manru u iting toromi lena, “Saimon, nutun o Jon, pepetlai, u nem doko iau?” I balu i lena, “Lingmulus, Labino, u tasmani lena a nem ui.” Ra o Iesu i watungi tano lena, “Un tamtamabat anung a kum sipsip.”
17Ra o Iesu i mantul u watungi tano lena, “Saimon, nutun o Jon, pepetlai, u nem iau?” O Pita i tupunuk, uni o Iesu i tingi a tulu dino lena, “U nem iau?” I watungi tano lena, “Labino, u tasman a kum utna rop. U tasmani lena a nem ui.” Ma o Iesu i watungi tano lena, “Un tabor anung a kum sipsip.
Jon 21
Jon 21:2-17