Yahaya 21:2-17

²Wekala pamoja Ansumani Peduru, Tamimu (wakwitiwa “Masa”), Nataniyeli wa Kanaa ya Galileya, wana wa Zebedeyu, pamoja na wanafunzi wengine wawiri.

³Ansumani Peduru akiwambira wenziwe ware: “Nankuka kuvuwa.” Ewo wakamba: “Ofwe tukufulata tikakwavye.” Wakilawa wakiripakira mungalawa wakuka. Wavuwa usiku nzima, awapatire kinu.

⁴Pakucere subuu, Insa ákiwa nlufuko, fala wanafunzi ware awakimmanyira.

⁵Insa akiwadairi: “Wanangu, amumpatire inswi anta mmoja?” Ewo wakijibu: “Iii, atipatire kinu.”

⁶Iye akiwambira: “Tayani nyavu‑zo upande wa nkono nriro‑wo, mupata.” Basi, wakitenda novire, awakidirire kuvuta nyavu zire, konta zikoreka inswi nyingi futi.

⁷Kwa javyo, mwanafunzi ákipendiwa pakulu na Insa ire akimwambira Peduru: “Ire Mwenye!” Ansumani Peduru paasikire kuwa ákiwa Mwenye, akivala nguwo zake sana-sana (konta kâvala nguwo za mwani), akirefya mbahari.

⁸Wanafunzi wengine ware wakinfulata na ngalawa ire, wakipita wakivuta nyavu zire na inswi tapa-tapa, kamana awawere baidi na lufuko, wákiwa kiyasi ca pima miya.

⁹Nakwisuka mungalawa mure, wasingana makala a moto na inswi pajulu. Íkiwapo novyo mikate.

¹⁰Insa akiwambira: “Njoni nazo inswi aba zamuvuwire sambi-pa‑zo.”

¹¹Kwa javyo, Ansumani Peduru akingira mungalawa mure, akivutira nyavu zire kungulu. Zikoreka inswi ulu‑ulu, kwisabu piya zíkiwa inswi miya na amusini na natu. Ingawa zikoreka inswi nyingi, fala nyavu zire azipapuke.

¹²Insa akiwambira: “Njoni murye.” Aalawirire anta mwanafunzi mmojawapo wakutwakali kundairi: “Uwe nani?” Wakijiwa kuwa ndi Mwenye wawenye.

¹³Insa akija akitwala nkate ure, akiwapa. Na inswi zire novyo akiwapa.

¹⁴Bandi ya kufufuriwa ka wafwi, Insa akiwalawirira mara ka mara wanafunzi wake, eyi ndi íwere mara yatatu.

¹⁵Nakwisa kurya, Insa akindairi Ansumani Peduru: “Ansumani, mwana wa Yahaya, unipenda pakulu kuwapunda ewa piya‑wa?” Iye akijibu: “Aye, Mwenye, ukwijiwa kuwa omi uwe nukupenda.” Insa akimwambira: “Warise makondoo wangu watoto‑wa.”

¹⁶Mara yapiri Insa akindairi: “Ansumani, mwana wa Yahaya, unipenda?” Iye akijibu: “Aye, Mwenye, ukwijiwa kuwa omi uwe nukupenda.” Insa akimwambira: “Wasunge makondoo wangu.”

¹⁷Mara yatatu Insa akindairi: “Ansumani, mwana wa Yahaya, unipenda?” Peduru akikimiwa konta kândairi mara ya natu, “Unipenda?” Basi akinjibu: “Mwenye, uwe ukwijiwa piya vinu. Ukwijiwa kuwa omi uwe nukupenda.” Insa akimwambira: “Warise makondoo wangu.