San Juan 19:1-34

¹Dxel gunabee Pilato gudijn ree suldad Jesús.

²Abiꞌ beenchaaw reeman coron guiëjch, badxeꞌ reeman laan guijcaman, bascajcw reeman laaman tijb lajd xniayaꞌs.

³Dxel gubig reeman lojman, rëbgaj reeman: ―¡Guibanri xrey ree bén Israel! Dxel rëëzgaj reeman lojman.

⁴Brii Pilato stijb, abiꞌ rëbaman loj ree bén Israel guin: ―Gol baguiaa, gabën laax din gagbeedi, achet xguialquiax radxejlan.

⁵Dxel brii Jesús, yuꞌ coron guiëjch guin guijcaman, najcw tëëman lajd xnia guin. Abiꞌ rëb Pilato: ―Laax guie.

⁶Dxel bixhioz rniabee ree në ree bén rajp roꞌ yadooroꞌ Jerusalén, chi baguiaa reeman laaman, guzuloj rbixdiaj reeman, rëb reeman: ―¡Bacaax loj crüjz! ¡Bacaax loj crüjz! Rëb Pilato loj reeman: ―Gol chinëx, lëjt gol bacaax loj crüjz, achet xtolix radxejlan.

⁷Badxiꞌ reeman laan rëb reeman: ―Laa tijb dux leyan yuꞌ, rëb lojn rayal guiëtix, guial nax najx Xiꞌn Dios.

⁸Chi biguienman ni rëb reeman, mazri bidxebaman.

⁹Bayuman lën palas guin zatijb, gunabdiidxaman loj Jesús rëbaman: ―¿Ban xin lüj? Per ad badxiꞌt Jesús laan.

¹⁰Zeel rëb Pilato: ―¿Nid zadxiꞌl ni rnin ya? ¿Nid ragbeel ya caꞌn guialrniabee din gucan lüj loj crüjz o guslaan lüj ya?

¹¹Dxel rëb Jesús: ―Achetczi guialrniabee nitiaꞌl bal id Dios nunee laan. Zianan zeel mazri zien xtol bén bidnë naj guie yuꞌ guial lojl.

¹²Diizd hor zii gajc raguiil Pilato mod, xhienaag guslaaman Jesús, per rbidxaꞌ ree bén rigaꞌ yagaj, rëb reeman: ―¡Bal guslaal laax, ad najtil xmiw bén na̱j César! ¡Din chutëëz bén rajc rey rzuj contr César!

¹³Chi biguien Pilato rëb reeman zian, gunabeeman babëë reeman Jesús, dxel gurej lod rniabeeman, lod la Gabata con diidx hebreo, rën guiëban Lod yuꞌ ree guiaj.

¹⁴Chi guixiez gal lanij pascw, cost garol dxej rëb Pilato loj ree bén Israel: ―¡Laa xreydi guie!

¹⁵Per rbidxaꞌ reeman rëb reeman: ―¡Guiëtix! ¡Guiëtix! ¡Bacaax loj crüjz! Gunabdiidx Pilato loj reeman, rëbaman: ―¿Wen gucan xreydi loj crüjz ya? Badxiꞌ ree bixhioz rniabee laan, rëb reeman: ―Achut dux reyan yuꞌ, tijbzi César.

¹⁶Dxel bayü Pilato Jesús loj ree suldad din gucaa reex laaman loj crüjz, dxel zinë reex laaman.

¹⁷Briinë reex Jesús, nüüman crüjz, binë reex laaman lod la Calaver, diidx hebreo lan Gólgota.

¹⁸Ni bacaa reex laaman loj crüjz con zatioꞌp ree bejn, tijb gaj reeman ca cwëꞌman.

¹⁹Gunabee Pilato cwa lejtr guijc crüjz guin, rëban: “Jesús bén Nazaret, xrey ree bén Israel.”

²⁰Dád zien ree bén Israel biil lejtr guin, guial na̱j luar zii gajxh loj ciuda, guiáad lejtr guin can con diidx hebreo, diidx latin në diidx grieg.

²¹Rëb ree bixhioz rniabee ree bixhioz loj Pilato: ―Ad rucaal: “Xrey ree bén Israel”, bacaa: “Bén rëb na̱j xrey ree bén Israel.”

²²Badxiꞌ Pilato laan rëbaman: ―Ni ma bacan yayaꞌnan zian.

²³Chi gulox bacaa ree suldad guin Jesús loj crüjz, bacaꞌ reex xabaman, gudixyaꞌ reexan tajp laꞌ, dxel cwaꞌ reex tib laꞌ gajn. Në stijb xabaman cwaꞌ reex, ad nadiibtan, najcchaaw diizd yëjnan xt guiaꞌn, najn tijbzi lajd.

²⁴Zeel rëb loj lasaꞌ reex: ―Ad zarooxt reen, yadxiꞌt ree suert din guidoon chu yayal laan. Zian gojc cumplid ni ca loj xtiidx Dios, rëban: “Balaꞌ reeman da xaban, gudxijt tëë reeman suert guijcan.” Zeel been ree xinsuldad guin zian.

²⁵Gajxh cwëꞌ crüjz ca Jesús zaꞌ xniaaman con xbël xniaaman con Li xbéngunaa Cleofas con Li bén gunee reeman Magdalena.

²⁶Chi baguiaa Jesús xniaaman, zaꞌ tijb ree xbejnman cwëꞌman, bén rën daꞌtaman, rëb loj xniaaman: ―Na, laa xiꞌnl yagaj.

²⁷Dxel rëb loj xbejnman: ―Laa xniaal yagaj. Diizd dxej zii bignëman xniaa Jesús lidxaman.

²⁸Chi gulox rëb Jesús zian, gogbeeman ma gojc gran cumplid. Per din gac cumplid ni ca loj xtiidx Dios, rëbaman: ―Reꞌcan nijs.

²⁹Yagaj zaꞌ tijb re yuꞌn vin noꞌchan vinagr, zeel bagajdx reex tijb xiil loj vin guin, bacaa reexan loj tijb yag, dxel badxig reexan roꞌman.

³⁰Chi ma guꞌman laan, dxel rëbaman: ―Ma gojc gran cumplid. Dxel basajb lojman luyuj, güjtaman.

³¹Ma cayüjn ree bén Israel porvinid din guixiez gal lanij pascw. Zeel ad guyënt reeman nayaꞌn ree cuerp guin loj crüjz dxej raziiladx reeman, din dád rajp reeman dxej guin respejt. Zeel biguiedx reeman loj Pilato din nabeeman quiꞌch ree suldad guin xdxijt ree bén ca loj crüjz din guiët reeman yalet tëë reex laa reeman.

³²Zeel wej reex. Yaloj gudiꞌch reex xdxijt bén ca cwëꞌ Jesús, dxel gudiꞌch reex xdxijt bén ca stiblad cwëꞌman.

³³Chi gubig reex lod ca Jesús, baguiaa reex ma güjtaman, zeel ad gudiꞌcht reex xdxijtaman.

³⁴Per tijb suldad guin guxhal ladaman con guiib caꞌx, dxel briin rejn con nijs.