San Juan 19:1-34

¹Ya chiꞌchi gucaꞌha Pilahtu laꞌh Jesuhs tin gwanee raꞌ xpwiinn ba laꞌh Ñiꞌh tin bacaꞌyahga raꞌ ba laꞌh Ñiꞌh,

²ya laꞌh raꞌ suldahdu raꞌ chi bwiꞌhnnchaꞌyi raꞌ ba tuhbi curohn guihchii, guluuꞌ raꞌ ban yihca Jesuhs cun bagahcu za raꞌ ba laꞌh Ñiꞌh tuhbi cahpa naxñaa nagaasa nin rahcu tuhbi rrehyi,

³ya chiꞌchi gwabiiga raꞌ ba loh Ñiꞌh rahbi raꞌ ba: ―¡Gubahan par tuꞌpazi Rehyi raꞌ bwiinn Israel! Chiꞌchi riaꞌzi raꞌ ba loh Jesuhs.

⁴Ya chiꞌchi biriaꞌh laꞌgaꞌh Pilahtu stuhbi, chiꞌchi rahbi ba: ―Gulguiaꞌha, laꞌn cabweꞌhe bwiinn riiꞌ nezloh tu tin gacabwaꞌ tu ayi rdxeelaꞌhn nin tuhbi xtuhlda bwiinn riiꞌ.

⁵Ya chiꞌchi guleꞌhe ba laꞌh Jesuhs, nuu curohn guihchii chi yihca Ñiꞌh cun nahcu za Ñiꞌh cahpa naxñaa nagaasa, ya rahbi Pilahtu: ―¡Gulguiaꞌha! ¡Laꞌh bwiinn chi niꞌca!

⁶Ya chin bwaꞌha raꞌ bixohza nin rnabwaꞌ laꞌh raꞌ bixohza cun guixaꞌga raꞌ xteenn guidoꞌ laꞌh Jesuhs ziꞌchi, mahziru gudihdxyidxiahyoꞌba raꞌ ba rahbi raꞌ ba: ―¡Bacaꞌh ba loh cruhzi! ¡Bacaꞌh ba loh cruhzi! Chiꞌchi rahbi Pilahtu: ―Pwihsi gulchenee ba laꞌhtu, ya laꞌgahca tu gulgacaꞌh ba loh cruhzi, laasii naꞌh ayi rdxeelaꞌhn nin tuhbi xtuhlda bwiinn ca.

⁷Ya chiꞌchi rahbi raꞌ bwiinn Israel raꞌ chi loh Pilahtu: ―Laꞌhnu nidxiaapa nu tuhbi lehyi, ya ziga xlehyi nu nahpa gachi ba, laasii cagatiiꞌdxi ba laꞌh ba ziga Lliiꞌn Dxiohs.

⁸Ya chin bihn Pilahtu dxyiꞌdxyi nin guñiꞌ raꞌ ba, mahziru bidxyihbi ba,

⁹ya chiꞌchi guyuuꞌtii ba stuhbi laꞌn palahsiu chiꞌchi gunaabadxyiꞌdxyi ba loh Jesuhs stuhbi rahbi ba: ―¿Chyu bwiinn luꞌh? Ya laꞌh Jesuhs ayi guñiꞌtiiꞌ Ñiꞌh loh ba,

¹⁰chiꞌchi rahbi Pilahtu loh Jesuhs: ―¿Taayi guiñiꞌ luꞌh loon? ¿Taayi gaann luꞌh naꞌpahn guelrnabwaꞌ tin gucaꞌhn yiꞌh loh cruhzi nee naꞌpazahn guelrnabwaꞌ tin gutaꞌhzahn yiꞌh?

¹¹Ya chiꞌchi rahbi Jesuhs loh Pilahtu: ―Ayi ñahpa luꞌh nin tuhbi guelrnabwaꞌ para naꞌh sidela Dxiohs ayi ñuniꞌhi guelrnabwaꞌ yiꞌh; pwihsi niꞌchin nnah, bwiinn raꞌ nin biuꞌntriehgu naꞌh loh luꞌh bwiinn chi nahpa zirooꞌru duhlda que ziga yiꞌh.

¹²Ya desde hohra chi gahca, gudxiꞌhyi Pilahtu xa ñutaꞌh ba laꞌh Jesuhs, per laꞌh raꞌ bwiinn Israel raꞌ chi mahziru jweersirooꞌ gudihdxyidxiah raꞌ ba rahbi raꞌ ba: ―¡Sidela yiꞌh gutaꞌh luꞌh laꞌh ndxiꞌhw ca, ayi naa luꞌh xamihgu emperador, laasii cuunchiꞌzi bwiinn nin xclaaꞌdzi tiidxi ziga rrehyi, naa bwiinn chi nin rdxindxinee laꞌh emperador!

¹³Ya chin bihn Pilahtu dxyiꞌdxyi raꞌ riiꞌ, biriaꞌhnee ba laꞌh Jesuhs tin guzohba ba loh yagaxiiyi hasta ruhn ba guelguxchisi, hasta laa cun dxyiꞌdxyi griehgu hasta naꞌ dxiah zaꞌca (nin zee loh dxyiꞌdxyi hebreu Gabata).

¹⁴Dxyih chi naa dxyih bispra lañih paascu, ya zigachiꞌh laaꞌyidxyih biꞌ Pilahtu loh raꞌ bwiinn Israel raꞌ chi, rahbi ba: ―¡Gulguiaꞌha, laꞌh xrrehyi tu niꞌca!

¹⁵Chiꞌchi rahbi raꞌ ba jweersirooꞌ: ―¡Gachi ba! ¡Gachi ba! ¡Bacaꞌh ba loh cruhzi! Chiꞌchi rahbi Pilahtu loh raꞌ ba: ―¿Ta naꞌh gucaꞌhn laꞌh xrrehyi tu loh cruhzi? Ya chiꞌchi rahbi raꞌ bixohza raꞌ nin rnabwaꞌ raꞌ laꞌh raꞌ bixohza loh Pilahtu: ―¡Laꞌhnu ayiru chyu nahpa rrehyi, sola tuhbidxiꞌh laꞌh emperador!

¹⁶Ya chiꞌchi biuꞌn Pilahtu ntriehgu laꞌh Jesuhs tin gucaꞌh raꞌ ba laꞌh Ñiꞌh loh cruhzi, ya chiꞌchi zenee raꞌ ba laꞌh Ñiꞌh.

¹⁷Ya tin basaguꞌa raꞌ ba laꞌh Jesuhs xcruhzi Ñiꞌh, ya zenee raꞌ ba laꞌh Ñiꞌh nez hasta laa yihca bwiinnguuchi (ya cun dxyiꞌdxyi hebreu lahan Gólgota),

¹⁸ya riꞌchi bacaꞌh raꞌ ba laꞌh Jesuhs loh cruhzi, neezaa bacaꞌh raꞌ ba schiohpa bwiinn cweꞌ Jesuhs cada lahdu cweꞌ Ñiꞌh tuhbigah raꞌ ba.

¹⁹Ya yihca xcruhzi Ñiꞌh gunabwaꞌ Pilahtu gucah dxyiꞌdxyi raꞌ nin rñiꞌ squiiꞌ: “Jesuhs nin zeꞌ guihdxyi Nazaret, Xrrehyi raꞌ bwiinn Israel.”

²⁰Ziahan raꞌ bwiinn Israel biꞌlda raꞌ ba dxyiꞌdxyi raꞌ chi, laasii nez hasta bacaꞌh raꞌ ba laꞌh Jesuhs loh cruhzi, gaxuhgahan para loh guihdxyi Jerusalehn, ya dxyiꞌdxyi raꞌ chi caaꞌhan cun dxyiꞌdxyi hebreu, cun dxyiꞌdxyi latin, cun neezaa dxyiꞌdxyi griehgu.

²¹Ya pur niꞌchin rahbi raꞌ bixohza raꞌ nin rnabwaꞌ loh raꞌ bixohza loh Pilahtu: ―Ayi gucaꞌh luꞌh: “Xrrehyi raꞌ bwiinn Israel”, sino que bacaꞌh: “Nin guñiꞌ ñahca Rehyi raꞌ bwiinn Israel.”

²²Chiꞌchi rahbi Pilahtu loh raꞌ ba: ―Nin bacaꞌhn, bacahan ziꞌca.

²³Ya chin guyaꞌloh bacaꞌh raꞌ suldahdu laꞌh Jesuhs loh cruhzi, chiꞌchi gucaꞌha raꞌ ba xahba Jesuhs bwiꞌhnn raꞌ ban tahpa taaꞌha tin bigaꞌzin gucaꞌha raꞌ ban; neezaa xahba Ñiꞌh nin laa tunica gucaꞌha raꞌ ba, ya lahdxi chi tuhsi taaꞌha naa lahdxi chi zigazi tuhbi buuxa ya dxiꞌban nez laꞌn gueeta cun para nez guiyaꞌ tuhbi dxiꞌh taaꞌha naa lahdxi chi.

²⁴Ya chiꞌchi rahbi loh lasaaꞌ raꞌ suldahdu raꞌ chi: ―Ayi chyu chiꞌllu lahdxi ca, mas chaꞌyi guidzihta nuꞌh pur lahdxi ca guidiaꞌha raꞌ nuꞌh chyu naan xsweerta ñiꞌh. Pwihsi ziꞌchi guzohba dxyiꞌdxyi nin caa loh Xchihtsi Dxiohs hasta rahbi: Bigaꞌzi xaabahn gucaꞌha raꞌ ba, ya basaaꞌ raꞌ ba sweerta cun xtunicahn. Deeꞌ bwiꞌhnn raꞌ suldahdu.

²⁵Ya nez caa Jesuhs loh cruhzi zuu xmaah Ñiꞌh cun bwehldaa xmaah Ñiꞌh zuu riꞌchi, cun María cheꞌhla Cleofahs, cun María Magdalena.

²⁶Ya chin bwaꞌha Jesuhs loh xmaah Ñiꞌh, nee bwaꞌha za Ñiꞌh gahxu cweꞌ xmaah Ñiꞌh zuu xpwiinn Ñiꞌh nin mahzi nadziiꞌhi Ñiꞌh, chiꞌchi rahbi Ñiꞌh loh xmaah Ñiꞌh: ―Gunnaꞌh, laꞌh lliiꞌn luꞌh niꞌca,

²⁷ya chiꞌchi rahbi Ñiꞌh loh xpwiinn Ñiꞌh chi: ―Laꞌh xmaah luꞌh niꞌca. Ya desde hohra chi bacaꞌha xpwiinn Ñiꞌh chi laꞌh xmaah Jesuhs zigazi xmaah ba tin baganee ba laꞌh María rwaaꞌ yihdzi ba.

²⁸Ya chin guyaꞌloh garaa raꞌ deeꞌ, ya naann Jesuhs laꞌhgahn guhca garaa raꞌ cohsa raꞌ nin nahpa gaca, tin guzohba raꞌ xchiꞌdxyi Dxiohs nin caa pur xcweenta Ñiꞌh, niꞌchin rahbi Jesuhs: ―Rdxaagahn ñihsa.

²⁹Ya riꞌchi zuu tuhbi ploorii ñihsa uhva naltaa ya guluuꞌ raꞌ ba ziga tuhbi taaꞌha lahdxi loh ñihsa uhva naltaa chi bacaꞌh raꞌ ban rwaaꞌ Jesuhs cun tuhbi lliꞌdzi yahga nin laa hisopo,

³⁰ya chin gwaaꞌ Jesuhs ñihsa uhva naltaa chi, chiꞌchi rahbi Ñiꞌh: ―Laꞌn guluhlla. Ya lwehgu basiaaba loh Ñiꞌh nezloh yuh ya batiꞌdxi Ñiꞌh xaalma Ñiꞌh loh naa Xtaada Dxiohs Ñiꞌh.

³¹Dxyih chi naa bispra xteenn lañih paascu, ya laꞌh raꞌ bwiinn Israel raꞌ ayi gunah raꞌ ba ñiaꞌhan bweꞌltihxi Jesuhs cun bweꞌltihxi schiohpa raꞌ bwiinn chi loh cruhzi dxyih lañih paꞌ chi, laasii dxyih chi naa dxyih lañihrooꞌ nin rahpadaa raꞌ bwiinn Israel raꞌ. Pwihsi niꞌchin gunaaba raꞌ ba loh Pilahtu guinabwaꞌ ba cheechiꞌchii raꞌ ba ñaaꞌ raꞌ bwiinn raꞌ nin caa loh cruhzi cun ñaaꞌ za Jesuhs tin guenagah gachi raꞌ ba tin dxiehta bweꞌltihxi raꞌ ba loh cruhzi dxyih chi gahca.

³²Ya chiꞌchi gwah raꞌ suldahdu riꞌchi ya gudxyiꞌchii raꞌ ba ñaaꞌ mwer tuhbi bwiinn nin caa loh cruhzi cweꞌ Jesuhs, ziꞌchi za stuhbi ba nin caa cweꞌ Ñiꞌh stuhbi lahdu,

³³per ya chin gwabiiga raꞌ ba hasta caa Jesuhs loh cruhzi, bwaꞌha raꞌ ba laꞌh Jesuhs guhchi la. Pwihsi pur niꞌchin ayi gudxyiꞌchii raꞌ ba ñaaꞌ Ñiꞌh,

³⁴ya chiꞌchi gucaꞌha tuhbi suldahdu chi tuhbi lahnsa guxaala ba loh baldiꞌh tihxi Jesuhs, ya loh billaala tihxi Ñiꞌh biriaꞌh rihn cun ñihsan.