Ioanes 19:1-34

¹Goio, e Pailat puli e Iesus soio, goma la valalua tetala goio kumamasi vulotiao.

²Tio egite la valalua la vaubi goio viri e dahe, veia ge igo la kisivaru tetala, egite goio taua te la gamalao, me egite goio vikai leia la kairobola ale magesegese mai la irovilala te la mulugaluga.

³Egite ge goio ge magiri moli oio te la lagulale, egite ge pigi malikiala mago “Tahalo kokora, eme la uru tegiteu e Iuda!” Tio egite goio sabalea la galelale.

⁴Goio, e Pailat gogala lou tegiteu, eia veia giteu mago “Ale eau pulia mutou sogalae, veia amuto ge rovia veia eau kama tahi vuti isasa la iruru oio tetalae.”

⁵Goma e Iesus gali sogala, la kisivarule dahe oata te la gamala, la kairobola ale magesegese oio te la pokela. Goio e Pailat vei mago “Male, amuto ge hilo la tahalo aleie!”

⁶Tio, egiteu la mulugaluga tegiteu e pris, me egiteu la tahalo la vagari robola tegiteu, egite hiloale, egite tatola mago “Katu tolea te la tauvalautu, katu tolea te la tauvalautu!” Eala moli e Pailat goio veia giteu mago “Amuto moli ge tatea soio, amuto ge katu tolea te la tauvalautu. Eau kama sivuti isasa la iruru oio tetalale.”

⁷Goma, egiteu e Iuda koli la vikararala tetala mago “Amite omai la viputumulila isasa tabuliti, me la viputumulilale eia maie veia mai isasa ge toia veia eia e Latu La Tahalo Uru, la valalua ge bilia eia ge peho.”

⁸Goio, e Pailat loloa mai ele, eia taga pepeho seseleti.

⁹Eia goio puli rivu lou e Iesus soilo te la luma te gavman, goma eia tahi matagaga e Iesus mago “Eme love sesele?” Eala moli e Iesus kama koli la vikararala tetalale.

¹⁰Goio e Pailat veiala mago “Mave, eme kama kolikoli la vikararala takue? Eme kama rovia veia egite abitiagu la viputumulila, eau koramulia ge lubemei, me eau koramuli taia veia ge baha eme soio, egite ge katu tolame te la tauvalautu? Soioge eme souka rovi aleie, ia?”

¹¹Goio, e Iesus ule baoliala soio mago “Mai La Tahalo Uru oata kama ge abiamu la vagagarila, eme kama koramulia ge bolehoho eau. Eau magiri moli omai te la lagumu te la masasagala moli te La Tahalo Uru, la vuhula la tahalo taku isasa eia sugu tarotiau somai te la limamu, me la iruru tetala eia kara polo sesele te la iruru taumele.”

¹²Goma, e Pailat lolotia mai ele, eia ga gabutala vulovuloti veia ge lube e Iesus, eala moli egiteu e Iuda loio tatola moli mago “Mai eme ge lubea, ale eme veipalea mai ele veia eme kama la tahalo te Sisa, la vuhula mai isasa veia eia la uru, eiala moli eia la gima te Sisa!”

¹³Tio, e Pailat lolotia mai ele, eia goio puliti e Iesus sogalao. Me eia goio pou te la pulolou la ilololo la merera, egite tigi saea oata, me la baale egite igo robo tatahola la uatati ale bolabola, me la isa la baale te la merera e Hibru egite toila “e Gabata”.

¹⁴Tiele la haro aleiele la haro la iraragi la ilali te La Ilali La Poloselela, tio la haro hugutolatia, goma e Pailat goio veia giteu e Iudale mago “Male, ale la uru tamutou.”

¹⁵Eala moli egite lolotia mai ele, goio egite tola lahutio mago “Lapua soio, lapua soio, katu tolea te la tauvalautu!” Goma, e Pailat veia giteu mago “Me eau ge katu tola moli la uru mutou oata te la tauvalautu e?” Goio, egite la mulugaluga tegiteu e pris ule baoliala mago “Amiteu la uru miteu isa moli e Sisa, isa oukati lou.”

¹⁶Tiele, e Pailat goio sugu tarotia giteu e Iesus ele, veia egite ge katu tolea te la tauvalautu. Tio, egiteu la tahalo la vaubila tegiteu e Rom goio puli e Iesus soio.

¹⁷Eia gali sogala la mautu e Ierusalem, eia bole la tauvalautu tetala loio la mautu ele, soio te la popoiti isasa egite toila veia La Gama La Tahalo, la isala te la merera e Hibru egite toila “e Golgota.”

¹⁸Me oio moli te la baa aleiele, egite katu tola e Iesus te tauvalautu, me egite katu tola tai taho lua oio te la galela iluao, me e Iesus kabili.

¹⁹Goio, e Pailat kekesi isa la vikararala tai veia ge taua oata te la gama la tauvalautu ele, eia kekesi la vikararala maie:

²⁰Eala moli la baa ale egite katu tola e Iesus te la tauvalautuo, eia hagagavi moli te la mautu. Tiele egiteu e Iuda usu goio gigigi la vikararala alele. La vuhula e Pailat kekesi la vikararala alele te la merera tegiteu e Hibru, tegiteu e Rom tai, me la vikarakarala tai e Grik.

²¹Goma egite la mulugaluga tegiteu e pris ale tegiteu e Iuda goio veiale Pailat mago “A ge, eme umala ge kekesia mai ele veia ‘La Uru tegiteu e Iuda’ umala. Eme ge kekesi molia maie ge ‘La tahalo ale eia veia maie: Eau La Uru giteu e Iuda.’”

²²Goio, e Pailat ule baolia giteu ele mago “La vikararala ale eau kekesitia, eau kekesitia, kama ge vulo loua.”

²³Tio, egiteu e soldia katu tolati e Iesus te la tauvalautuo, egite goio abi la lavalava me la papaga tomi tetala, egite tau mulila la tilalau ivaao, egite goio barerele giteu. Egite goio abi tai la kairobola tetala, eala moli eia la silahi ouka ovola veia egite ge silea ovola, eia viruru moli loata abia gotalo la gilesulao.

²⁴Tio, egite la valalua la vaubi ele hiloa mai ele veia eia la silahi ouka ovola, egite vei mago “Etato kama ge silea, etato ge pigi la satu, etato ge rovirovi gabu molia veia ale ge tere.” Tiele egite igoa mai ele veia la vikarara te La Buk Tabu Ale Pala eia ge puru sesele ale veitia maie: Egite barereti la lavalava taku, me egite vipigi vulovulo moliti la kairobola takuo. Tiele me egite la valalua la vaubi igo sesele taia mai ele.

²⁵Eala moli e tilale Iesus me tabarala, e Maria ale rutule Klopas, vikapopo me e taola, e Maria Magdala, egite oio magirigiri hagagavi te la tauvalautu te Iesus ele.

²⁶Goma e Iesus hiloti e tilalale vikapopo me la tahalo la vimari ale eia masaga seseleao, e Iesus goio veiale tilala mago “Tavile uru, male ale magirigiri ele e latumu molie.”

²⁷Tio eia goio vulo tavu lou la tahalo la vimari tetalale, mago “Male, alele e tilamu.” Tiele la tahalo la vimari ele pulia soio te la luma tetalao, eia soko la baumulila.

²⁸E Iesus rovitia veia la igogolu tomi tetala eia kaluvuti, tio eia goio vipuru isa lou la merera te La Buk Tabu mago “Eau malehu pasie.”

²⁹Goma la botol isa oio tabulibuli ele, eia volu la bulu la vaen ale ama. Tiele egite goio sigilia soio te la pagolu, egite goio vituria soata te la harelao.

³⁰Goio e Iesus liua, eia goma vei mago “Eia kaluvuti.” Tiele la gamala mapakulitio, eia goio pehotio.

³¹Tiele, ale la haro la iraragila te La Ilali La Poloselela. Ale la haro lima, mai galigeli eia la haro tabu ale uru sesele tegiteu e Iuda, eala egiteu e Iuda kama masaga veia la vovo giteu taho tolu ele ge titili lou oata la tauvalautu ele. Tio egite goio veiale Pailat veia eia ge baha la merera soio tegiteu e soldia veia egite ge putu loto la vaha giteuo, veia egite ge peho hari mai ele, veia ge visivo taro egiteu loata la tauvalautu ele.

³²Tio egite la valalua la vaubi goio putu loto la vaha girua ale taho lua, egite katu tola egirua te la tauvalautu oio te la galele Iesus iluale.

³³Eala moli egite goio te Iesuso, egite ga hiloao, eia pehoti, tio egite kamati putu loto la vahalale.

³⁴Eala moli la tahalo la vaubi isasa goio ubi la karusurusule Iesus ele la gata, goio la kasosola me la lalu salitio.