San Juan 12:10-37

¹⁰Zeel bayaꞌn ree bixhioz rniabee diidx guial në Lazr gugüjt reeman.

¹¹Din por laax dád zien ree bejn cayrii loj reeman, abiꞌ caliladx reeman Jesús.

¹²Chi bareguiaal, zien daꞌt ree bén zë lanij pascw Jerusalén gogbee guidxin Jesús yagaj,

¹³dxel cwaꞌ reeman zijn, brii reeman bigchaagloj reeman laaman, rbidxaꞌ reeman rëb reeman: ―¡Benzaꞌc bendxoon na̱j Dios! ¡Nüjnleꞌman Bén guxhaalaman! ¡Nüjnleꞌman bén na̱j rey Israel!

¹⁴Bidxaagloj Jesús tijb burdoo, abiꞌ gudxibaman laab, persi gojc ziꞌc ca loj xtiidx Dios lod rëb:

¹⁵Bén Sión, ad rdxebidi. Gol baguiaa, laa xreydi zëëd, dxiibaman tijb burdoo.

¹⁶Yaloj ad bigniaꞌt ree xbejn Jesús ni cayajc. Per chi ma bayëꞌpaman xanyabaa, dxel bigniaꞌ reeman guial zian ca loj xtiidx Dios xcwentaman, zeel gojc zian.

¹⁷Bén guzu ree con Jesús chi guredxaman Lazr din yariix lën baa, basban tëëman laax loj ree bengüt, rusnuu rü reeman diidx loj ree bejn ni baguiaa reeman.

¹⁸Zeel zien ree bejn brii bigchaagloj laaman, guial gogbee reeman milagr beenman.

¹⁹Dxel rëb loj lasaꞌ ree bénfarisew: ―Gol baguiaa nial graczi bejn zinal laax, achetri zajc yaguieen ree.

²⁰Loj gra ree bén we lanij bignajchiꞌ reeman Dios Jerusalén, noꞌch bëlzi ree bén grieg,

²¹gubig reeman loj Felip, bén za guiedx Betsaida, ni rigaꞌ niz Galilea, guzajc reeman liaadx rëb reeman: ―Dad, rayënan yaneenëꞌn Jesús.

²²Abiꞌ wej Felip biguiedxaman loj Andrejs, dxel wej grop reeman bicojn reeman Jesús.

²³Badxiꞌ Jesúsan rëbaman: ―Ma bidxin hor par Bén guxhaal Dios, guiëtaman abiꞌ yabanman.

²⁴Diidxliczi rnin, ziꞌc tijb xob bal idan chuꞌ luyuj najz najn tijbzi, per bal chuꞌn luyuj zajcxhiejn.

²⁵Bén ru mazri xgab naabzi por guialnaban yuꞌ loj guidxliuj guie, yuꞌ dxej gunijtaman laan, per bén ru mazri xgab güünman ziꞌc rën Dios, xhietëëz sacaman, zajpaman guialnaban tiblayaa con laaman.

²⁶Bal chu rën güün ni rënan guidnalaman naj, lod gazun, nëgajcaman su. Bén güün ni rënan, guiën da Dadan laaman.

²⁷Rëb tëë Jesús: ―Dád yuꞌn xgab. ¿Xhie guiën? ¿Zën ya: “Dad, babëë naj loj ni gazaagdiajn”? Per ad zëtan zian, din par zian zialan.

²⁸Dad, balüü xguialrniabeel. Dxel biguien chaꞌ bejn xanyabaa rëbaman: ―¡Ma balü da guialrniabeen, per gulünan stijb!

²⁹Riguiejn ree bén rigaꞌ yagaj, zeel rëb reeman: ―Guziaawan guridxaꞌ. Per yuꞌ reeman rëb: ―Tijb anjlan gunee laaman.

³⁰Dxel rëb Jesús: ―Ad por najtan biguien chaꞌ bejn, por lëjtan.

³¹Ma bidxin dxej gac guialguxtis loj guidxliuj, yan yarii bén rniabee lojn.

³²Per chi guilies reeman naj ya loj guidxliuj guie, dxel guiꞌt graloj bejn lon.

³³Zian basigniaꞌman xhienaag guiëtaman.

³⁴Badxiꞌ ree bén guinan rëb reeman: ―Dunujn rayagbee rëb loj ley, Cristo guiban tiblayaa. ¿Chexc zeel nal, rayal guilies reeman Bén zëëd xanyabaa? ¿Chunin na̱j Bén zëëd xanyabaa?

³⁵Rëb Jesús loj reeman: ―Ad zien dxejtri sunë bajl guie lëjt. Gol guza laꞌtgaj zaꞌnëdi bajl guie, chitëë guiniaaz guiaal lëjt. Din bén rza loj xcay, ad ragbeetaman ban cheman.

³⁶Gol bililadx bajl guie, laꞌtgaj zaꞌnëdan, din gaquidi xbejnan. Chi gulox gunee Jesús zian, dxel baquieꞌchlojman loj reeman.

³⁷Majsi been Jesús zien daꞌt milagr baguiaa reeman, ad bililadxt reeman.