Jon 12:10-37

¹⁰Mewö kaŋgotketmö, jike nup galöm yeŋön Lazarus mewöyök qein kömumapkö keu jöhöget.

¹¹Juda ambazip gwötpukŋan Lazarusgöra aka Betani anda uruŋini meleŋda Jisös möt nariget. Miaŋgöra keu mewö jöhöget. Mewö.

¹²Mewö aketka ahöba wahöta miaŋgöreŋ ambazip kambulelembenöŋ ak-kömukömu kendongöra Jerusalem sitinöŋ kaŋgota malgeri, yeŋön buzup keu kewö mötket, “Jisösnöŋ Jerusalem kamamgö könanöŋ kaza.”

¹³Keu mewö möta umji böröŋi memba könanöŋ miwikŋaibingö anda kewö jiba qetket, “Hosana, owe owe! Anutu möpöseizin. Kembugö qetŋe kamawi, Anutunöŋ mönö kötuetköma! Israel neŋgö Kiŋ Kembunini owe owe!”

¹⁴Jisösnöŋ doŋki moröŋi kun miwikŋaiba miaŋgö qakŋe öŋgöba tarök. Mi kezapqetok keu kun kewö ohoget ahözawaŋgö dop asuhuyök,

¹⁵“O Jerusalem ambazip Zaion kunduŋi liliköba maljei, iŋini mötket, eŋgö Kiŋ Kembuŋinan mönö kama. Doŋki moröŋaŋgö qakŋe tata kama. Miaŋgöra keŋgötŋini mönö kude mötme.”

¹⁶Jisösgö gwarekurupŋan yuai asuhuyöhi, miaŋgö könaŋi mutuk qahö möt kutugetmö, könaŋgep ölöp möt asariget. Jisösnöŋ Suepnöŋ öŋgöba asakmararaŋambuk malöhi, keu mi nalö miaŋgöreŋ mötmöriba kewö jiget, “Aha! Keu mi mönö Jisösgöra ohoget ahöza aka ambazipnöŋ keu miaŋgö dop ak waŋgigetka ölŋambuk ahök.”

¹⁷Ambazip Jisösbuk Betani malgeri, yeŋön dangunu ewö kinda buzupŋi jim sehiget. Jisösnöŋ Lazarus qeriga kömupnöhök guliba wahöta qaksirigö köt köteŋ mosöta kaŋgoriga ambazip kambunöŋ ekeri, yeŋön Jisösgö könaŋi naŋgöba jiba jim asariget.

¹⁸Jisösnöŋ aŋgöletot mi meyöhi, keu mi mötkeraŋgöra aka ambazip kambunöŋ luluŋda köl öröm waŋgibingö anget.

¹⁹Mewö angetka Farisi (Köna keugö kapaŋkölköl) yeŋön nanŋinök eraum möta kewö jiget, “Mötket. Gölmeŋi gölmeŋi ambazip yeŋön mönö luluŋda öröba yaŋgö andöŋe anakze aka nini keu nup miyök mem bibihiinga ölŋi kun qahö asuhuza.” Mewö.

²⁰Juda ambazip ak-kömukömu kendongöra Jerusalem sitinöŋ öŋgöba Anutu waikŋi memba möpöseigeri, yeŋgö sutŋine Grik ambazip tosatŋi mohotŋe malget.

²¹Yeŋön gwarek qetŋi Filip yaŋgöreŋ kaget. Filipnöŋ Galili prowinsgö taon qetŋi Betsaida miaŋgö azia malök. Grik yeŋön yaŋgöreŋ kaba qesiba kewö jiget mörök, “Ketaŋamnini, nini sihimninan Jisös ekingö mötzin.”

²²Mewö jiget möta Andrugöreŋ anda keu mi jii mörök. Jii möta mohotŋe anda Jisös jiyohot mörök.

²³Keu mi möta meleŋda kewö jiyök, “Suepkö asakmararaŋan Suep gölmegö Azi Ölŋi yaŋgöreŋ kunbuk asuhum kutuiga asarimawi, miaŋgö nalöŋan mönö töriza.

²⁴Nöŋön kömupnaŋgö söpsöp keu öl töhönŋi kun kewö jibi mötket: Sehoŋ kötŋi gölmenöŋ qahö geba julma ewö, mönö öne miyök ahöma. Mewö öne ahömapmö, geba julma ewö, korapŋan mönö jula öndölböndöl wahöri ölŋi gwötpuk söhöma.

²⁵“Miaŋgö dop denike yeŋön malmalŋini nanŋinaŋgöra aŋgön köla nanŋini imbi-imbi siyoŋsayoŋi qahö malbingö ak eŋgimakzawi, yeŋgö malmalŋinan mönö sohoma. Mewö sohomapmö, kunŋan kun nanŋi malmalŋi göragöra ala nia jegep al niŋgimawi, yaŋön mönö malmal ölŋi öndölböndölŋambuk miwikŋaiba köhöiba teteköŋi qahö mal öŋgöma.

²⁶Kunŋan ni welen qem niŋgimamgö jizawi, yaŋön mönö ni nuataŋgöba mali dop kölma. Weleni qemakzawi, mönö ni anda kaba malmamaŋgöreŋ mewöyök nömbuk malma. Kunŋan nömbuk mala weleni qem niŋgimakzawi, Iwinöŋ mönö i göda qem waŋgii malma.” Mewö.

²⁷Jisösnöŋ jiyök, “Wösöni dölki kot gwözöŋniga amqam aka maljal. Denöwö jibileŋak? Keu jaruzal. O Iwi, gi ölöp aua nalö kewöŋaŋgö köŋjiliŋnöhök meköm niŋgiman. Töndup kewögöra mewö qahö köulukömam: Aua kiaŋgö sihimbölöŋi mi mökösöŋda bisimamgöra aka nangak qakne aljan.

²⁸O Iwi, gi mönö nangi aködamungi al niŋgiba qetbuŋagi mem qariman.” Mewö köuluköiga Suepnöhök keu kewö asuhuba erök, “Nöŋön aködamuni lök al gihiba mewö qetbuŋani mem qarial aka toroqeba mem qaribiga sehiba anma.”

²⁹Keu mi asuhuiga ambazip kambu kinget yeŋön mi möta jiget, “Wöl pöndaŋ qetza.” Tosatŋan jiget, “Suep garata kunŋan yaŋgöra keu jiiga kourukŋi mötzin.”

³⁰Mewö mewö jigetka kewö jii mötket, “Kouruk mi nöŋgöra aka qahö asuhuzapmö, mi eŋgöra aka asuhuza.

³¹Nalö kewöŋe gölmeŋi gölmeŋi ambazip ahakmeme bölöŋi wuataŋgömakzei, yeŋgö kewötkewöt nalöŋinan mönö mesohol köl eŋgiza. Anutunöŋ yeŋgö keuŋini jim teköba likepŋi meleŋ eŋgiiga qakŋine öŋgömapkö akza. Nalö kewöŋe Anutunöŋ Bölöŋaŋgö Kembuŋi gölme dop galöm köl eŋgimakzawi, mönö i közöliga yaigep etmapkö akza.

³²Yaŋön etmapmö, nöŋgöra kewö asuhuma: Ambazipnöŋ gölmenöhök nömemba könakemba kösököm niŋgigetka öŋgöba kinbiga köna ahuiga ambazip gölme dop öröm eŋgibiga luluŋda nöŋgöreŋ kaba kambu köla kinme.”

³³Mi kömup denöwöŋi kömumawi, miaŋgö keu saiŋa mewö jii mötket.

³⁴Ambazip kambu yeŋön mi möta kewö jiget mörök, “Nini Köna keu oyoŋda kewö mötzin, ‘Kraistnöŋ qahö kömumba teteköŋi qahö mal öŋgöba malma.’ Göŋön wuanöŋgöra kewö jizan, ‘Suep gölmegö Azi Ölŋi gölmenöhök memba kösökögetka könakemba öŋgöba kinma.’ Suep gölmegö Azi Ölŋi mi daŋön?”

³⁵Mi möta meleŋ eŋgiyök, “Asakŋan nalö töröptökŋi kunbuk sutŋine asariba malma. Söŋaupnöŋ qakŋine öŋgöba turum eŋgii miaŋgö buŋaŋi akepuköra mönö asakŋe anda kaba malme. Asakŋan ahöm eŋgimawaŋgö dop mönö asakŋe malme. Daŋön panamanöŋ jipjap anda kamakzawi, mönö denike aŋgotmawi, mi qahö mötza.

³⁶Miaŋgöra asakŋan nalö dawik embuk malmawi, nalö miaŋgöreŋ mi mönö urunöŋ möt aŋgön köla malme. Asakŋaŋgö könagesö aka malmegöra mönö asakŋi mi möt nariba malme.” Jisösnöŋ keu mewö jiba eŋgömosöta tölapköba anök. Mewö.

³⁷Jisösnöŋ aŋgöletot gwötpuk memba maliga Juda yeŋön mi jeŋinan eketmö, töndup i qahö möt narim waŋgiba silebile malget.