San Juan 11:20-47

²⁰Oicuase Marta Jesús yepota seni, oso voi eté sapeve; María rumo opɨtaño oɨ pɨpe.

²¹Evocoiyase Marta aipo ehi voi chupe: —Che Yar, ehi cohave ereicose, nomanoi chietera revo ore quɨvrɨ viña.

²²Che rumo aicua Tũpa omboura opacatu nde porandusa ndeu —ehi Marta chupe.

²³—Nde quɨvrɨ rumo ocuerayevɨ irira —ehi Marta upe.

²⁴—Supi eté aicua niha ocuerayevɨra opacatu omano vahecuer reseve arɨ ipa vahe pɨpe —ehi Marta.

²⁵—Che niha cuerayevɨsa aico iyavei tecovesa. Acoi ava che reroya vahe, yepe omano tẽira viña, oicoveño itera rumo.

²⁶Acoi che reroya vahe güecoveseve, nomanoi chietera. ¿Ereroya aipo che hesa? —ehi Marta upe.

²⁷—Orovɨroya ité, che Yar. Nde niha Poropɨ̃sɨrosar ereico Tũpa Rahɨr, ore remiaro ereyu vaherã co ɨvɨ pɨpe oreu nara —ehi Marta Jesús upe.

²⁸Aipo ohe pare, Marta oso ocupɨhɨr María reca, chupeñomi aipo ehi: —Porombohesar oicove cohave, “Tou” ehi ndeu —ehi chupe.

²⁹Evocoiyase María oso voi eté sepia.

³⁰Jesús rumo ndoique vɨtei eté tecua pɨpe; Marta rese oyoepiasave vɨteño ité secoi.

³¹Osepiase María sẽ poyava, judío eta sẽtave yuvɨrecoi vahe imbovɨhasar yuvɨraso voi saquɨcuerive, “Oquɨvrɨ ruvɨpave revo osora oyaseho” ehi yuvɨreco viña.

³²Evocoiyase María oyepotase chupe, oñenopɨha sovai aipo ehi: —Che Yar, ehi revo ereicoveño itese cohave, che quɨvrɨ nomanoi chietera viña —ehi María chupe.

³³Osepiase María yaseho iyavei judío eta yuvɨraso vahe supi, opɨha pɨpe oyandu ité ovɨharẽhɨsa.

³⁴Evocoiyase oporandu: —¿Que vo peñotɨ? —ehi chupe. Ahe aipo ehi yuvɨreco chupe: —Ore Yar, erio, teresepia —ehi.

³⁵Ahese Jesús oyaseho.

³⁶Judío evocoiyase aipo ehi yuvɨreco: —¡Esepia, osaɨsu ité! —ehi oyeupe yuvɨreco.

³⁷Ambuae rumo ipãhu pendar aipo ehi yuvɨreco: —Co mbɨa omomahe vahe acoi mbɨa ndasesapɨsoi vahe, ¿ndoicatui chira pĩha Lázaro manoẽhɨ ãgua mbahe apo cuese rahe viña? —ehi yuvɨreco.

³⁸Jesús oyemboya suvɨpave ovɨharẽhɨsa pɨpe; ahe suvɨpa ita hoprɨ, sovapɨsa ita avei.

³⁹—Perocua sovapɨsa ita ichui —ehi. Marta, omano vahe reindrɨ, rumo aipo ehi: —Che Yar, iné ité revo. Esepia, opa niha irungatu arɨ imanore —ehi.

⁴⁰—¿“Che reroyase eve, Tũpa pĩratasa eresepiara” ndahei vo acoi ndeu? —ehi Marta upe.

⁴¹Aipo ihe pare, vɨrocua ita yuvɨreco ichui. Evocoiyase omahe ɨva rese aipo ehi: —Che Ru, “Avɨye ndeu” ahe ndeu. Esepia, eresendu che ñehe.

⁴²Che aicua nde eresenduño ité che ñehe yepi, che rumo aipo ahe co ava eta rembiepiave ‘tovɨroya avei nde che mbousa co ɨvɨ pɨpe yuvɨreco’ che yapave —ehi.

⁴³Aipo ohe pare, oñehe pĩrata aipo ehi: —¡Lázaro, esẽ eipeve sui! —ehi.

⁴⁴Omano vahe evocoiyase osẽ voi opacatu turucuar omamasa reseve. Jesús evocoiyase aipo ehi ava upe: —Peyorapa imamasa ichui, toguata —ehi.

⁴⁵Osepiase co poromondɨisa, judío eta yuvɨraso vahe María rupi setá ité Jesús vɨroya yuvɨreco.

⁴⁶Ipãhu pendar rumo movɨro yuvɨraso voi ava fariseo rerecuareta uve sembiapo mombehu ãgua.

⁴⁷Evocoiyase fariseo rerecuareta iyavei pahi rerecuareta oñemonuha guasu yuvɨreco aipo ehi: —¿Mara yahera vo sereco? Co mbɨa setá ité oyapo poromondɨisa oico.