ᤕᤢᤜᤢᤴᤏᤠ 11:20-47

²⁰ᤔᤠᤷᤌᤠᤖᤧ ᤕᤧᤛᤢ᤺ᤴ ᤑᤧᤴᤗ ᤐᤳ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤗᤠᤶᤍᤣ᤺ᤱ ᤌᤠᤖᤡᤰ ᤁᤢᤍᤢᤶᤛᤧ ᤐᤣᤖᤥ. ᤁᤖ ᤔᤖᤡᤕᤶᤔᤡᤴ ᤜᤡᤶᤔᤥᤀᤣ ᤕᤠ᤺ᤰᤋᤧᤖᤥ॥

²¹ᤔᤠᤷᤌᤠᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤁᤵᤔᤥ ᤁᤧᤘᤕᤧᤸᤗᤧᤃ ᤀᤠᤴᤛᤠ᤹ ᤔᤧᤛᤩᤧᤏᤧᤶᤒᤠᤔᤧᤴ᥄

²²ᤁᤖ ᤀᤠᤸᤗᤥ ᤌᤣ ᤁᤧᤏᤠ᤺ᤰᤋᤢᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡ᤹ ᤁᤧᤗ᤹ᤒᤠᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥”

²³ᤕᤧᤛᤢᤖᤧ ᤔᤠᤷᤌᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤴᤛᤠ᤹ᤃ ᤕᤠᤶᤔᤥ ᤛᤡ᤺ᤔᤧᤴᤗᤠᤶ ᤜᤡᤱᤗᤥ॥”

²⁴ᤜᤧᤰᤁᤣ᤺ᤸᤗᤧ ᤔᤠᤷᤌᤠᤖᤧ ᤏᤥᤃᤵ ᤐᤡᤖᤢ. “ᤀᤥᤖᤥ ᤀᤠᤍᤠᤱᤒᤣ. ᤁᤢᤏᤢᤵᤔᤠ ᤕᤧᤴᤏᤥ ᤛᤡ᤺ᤔᤧᤴᤗᤠᤶ ᤜᤡᤱᤔᤴᤏᤥ ᤂᤢᤏᤧ᤹ ᤕᤠᤶᤔᤥ ᤜᤡᤱ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥”

²⁵ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ᤃ ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤜᤡᤱᤔᤴ ᤁᤧᤒᤡᤒᤠ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠᤀᤠᤖᤥ॥ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤁᤠ ᤂᤧᤱᤃ ᤛᤡ᤺ᤛᤠᤱ ᤕᤠᤶᤔᤥ ᤜᤡᤱᤗᤥ॥

²⁶ᤜᤧᤰᤁᤩᤠᤱ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤜᤡᤱᤒᤠᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤛᤡ᤺ᤏᤧᤴᤗᤥ॥ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤀᤠᤒᤠ᤺ᤴᤏᤡᤴ ᤏᤛᤠ᤺ᤴ ᤁᤧᤈᤥᤃᤢᤒᤡ᥅”

²⁷ᤔᤠᤷᤌᤠᤖᤧ ᤏᤥᤃᤵ ᤐᤡᤖᤢ “ᤀᤥᤖᤥ ᤀᤠᤍᤠᤱᤒᤣ. ᤂᤧᤏᤧ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤢ᤺ᤔᤠ ᤁᤧᤒᤥ᤺ᤱᤒᤠ ᤏᤡᤱᤘᤠ᤹ᤑᤢᤛᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤧᤒᤠ ᤂᤪᤡᤛ᤻ᤋᤏᤧ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤛᤠ᤺ᤴ ᤆᤥᤃᤢᤱᤗᤥ॥”

²⁸ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤠᤶᤔᤥ ᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤔᤖᤡᤕᤶᤔᤡᤴ ᤔᤣᤖᤡᤱ ᤁᤧᤎᤰᤐᤠᤜᤠ᤹ᤗᤠᤶ ᤌᤡᤰᤗᤧᤵᤔᤠᤱ ᤛᤫᤠ᤺ᤳ ᤀᤢ᤺ᤳᤋᤢ ᤋᤣ᤹ᤖᤢᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤠᤱᤃ ᤁᤵᤔᤥ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤏᤧ᤹ ᤁᤧᤀᤢ᤺ᤳᤋᤧᤀᤠᤱ ᤘᤠ᤹ᤖᤥ॥”

²⁹ᤔᤖᤡᤕᤔᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤏᤢᤔᤧ᤺ᤴᤏᤣ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤧᤛᤢᤖᤧ ᤁᤢᤍᤢᤶᤛᤧ ᤐᤣᤖᤥ॥

³⁰ᤂᤧᤴ ᤕᤧᤶ ᤌᤠᤖᤡᤰ ᤕᤧᤛᤢ᤺ᤱᤃ ᤐᤠᤱᤓᤣ᤹ᤀᤥ ᤔᤧᤱᤃᤧᤳᤋᤣ ᤘᤕᤧ. ᤁᤖ ᤂᤢᤏᤧ᤹ᤃ ᤔᤠᤷᤌᤠᤖᤧ ᤋᤢᤔᤢᤒᤠ ᤋᤧᤴᤏᤥᤀᤣ ᤘᤕᤧ॥

³¹ᤀᤠ᤺ᤴᤇᤡᤱᤔᤠ ᤐᤡᤛᤧ ᤜᤡᤶᤔᤥ ᤁᤧᤍᤠ᤺ᤒᤠ ᤕᤜᤢᤍᤡᤜᤠ᤹ᤖᤧ ᤔᤖᤡᤕᤶᤔᤡᤴ ᤜᤧᤰᤁᤣᤗ᤹ᤖᤡᤰ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤐᤣᤒᤠ ᤔᤧᤏᤡ᤺ᤛᤢᤀᤠᤱ ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤢᤴᤛᤠ᤹ᤖᤧ ᤁᤢᤀᤡᤵᤐᤢᤱᤅᤥ ᤔᤣᤖᤡᤱ ᤌᤰᤛᤧ ᤐᤣᤒᤠᤒᤡᤗᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥

³²ᤔᤖᤡᤕᤶᤔᤡᤴ ᤕᤧᤛᤢ᤺ᤴ ᤘᤕᤧᤒᤠᤍᤧᤴᤏᤥ ᤁᤧᤖᤧᤀᤠᤱ ᤌᤢᤱᤒᤥᤜᤈ᤹ᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤵᤔᤥ ᤁᤧᤘᤕᤧᤸᤗᤧᤃ ᤀᤠᤴᤛᤠ᤹ ᤔᤧᤛᤩᤧᤏᤧᤶᤒᤠᤔᤧᤴ॥”

³³ᤕᤧᤛᤢᤖᤧ ᤔᤖᤡᤕᤶᤔᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤀᤠᤱ ᤔᤣᤖᤡᤱ ᤔᤧᤎᤰᤋᤧᤒᤠ ᤏᤡ᤺ᤛᤢᤛᤡᤸᤗᤧ ᤁᤢᤛᤠ᤹ᤀᤡ ᤕᤃᤧᤀᤠᤱ ᤁᤢᤕᤥ᤺ᤶ ᤐᤢ᤹ᤖᤧᤖᤥ॥

³⁴ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤢᤏᤧ᤹ ᤀᤠᤳᤋᤥ ᤁᤧᤏᤧᤛ᤻ᤛᤢᤶᤔᤠᤱ ᤏᤧᤒᤣ᥅” ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤍᤠᤱᤒᤣ. ᤑᤧᤖᤧ᤹ᤀᤠᤱ ᤀᤥᤔᤧᤳᤋᤧ᤹ᤀᤥ॥”

³⁵ᤕᤧᤛᤢ᤺ᤴ ᤜᤠᤒᤧ॥

³⁶ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹ ᤂᤢᤏᤧ᤹ᤃ ᤗᤠᤈᤖᤛᤧᤴ ᤀᤠᤰᤂᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠᤒᤣ᥅”

³⁷ᤁᤖ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤶᤒᤧ. ᤔᤡᤰᤑ᤺ᤶᤒᤠᤴ ᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤈᤥ᤺ᤰᤐᤠᤱᤃ ᤒᤠ ᤂᤢᤏᤧ᤹ ᤔᤧ᤺ᤶᤒᤡ᥅ ᤌᤣᤀᤠᤱ ᤁᤴ ᤗᤠᤈᤖᤛᤧᤴ ᤛᤡ᤺ᤔᤠᤗᤠᤶ ᤜᤡᤱᤔᤠ ᤔᤧᤛᤢᤰᤋᤢᤶᤒᤠᤒᤣ᥅”

³⁸ᤕᤠᤶᤔᤥᤀᤠᤱ ᤕᤧᤛᤢ᤺ᤴ ᤛᤠ᤹ᤖᤡᤰ ᤁᤢᤕᤥ᤺ᤶ ᤐᤢ᤹ᤖᤧᤀᤠᤱ ᤀᤡᤵᤐᤢᤱᤅᤡᤸᤗᤧ ᤁᤢᤒᤣᤛᤠᤱ ᤐᤣ॥ ᤂᤧᤴ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤕᤶᤒᤠ ᤗᤢᤱᤅᤡᤴ ᤔᤧᤕᤧᤵᤛᤢᤒᤠ ᤑᤢᤰᤁᤢ ᤘᤕᤧᤖᤥ॥

³⁹ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤀᤡ᤺ᤛᤧᤶᤔᤧ᤹॥” ᤁᤖ ᤗᤠᤈᤖᤛᤖᤧ ᤁᤢᤴᤏᤧ᤹ ᤔᤠᤷᤌᤠᤖᤧ ᤔᤧᤳᤋᤢ. “ᤍᤠᤱᤒᤣ. ᤂᤢᤏᤧ᤹ᤃ ᤂᤠᤶᤔᤥ ᤆᤡᤱᤔᤏᤠᤒᤠ ᤗᤡᤛᤡ ᤕᤧᤴ ᤁᤧᤖᤧᤔᤠᤖᤧᤖᤥ. ᤀᤠᤸᤗᤃ ᤏᤠᤶᤛᤢᤒᤡᤗᤠᤖᤥ॥”

⁴⁰ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤔᤧᤳᤋᤢ. “ᤏᤛᤠ᤺ᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤁᤧᤏᤡ᤺ᤛᤢ᤹ ᤑᤠ᤹ᤀᤠᤱ ᤋᤃᤡᤛᤠ ᤔᤧᤳᤏᤧᤀᤠᤱ ᤘᤕᤧᤖᤥ॥”

⁴¹ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥᤒᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤌᤠ᤺ᤱ ᤀᤥᤔᤧᤳᤋᤢᤖ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤀᤠᤒᤣᤗᤡ᤺ᤴ ᤁᤧᤄᤧᤵᤛᤢᤒᤠᤀᤥ ᤏᤥᤃᤧᤴᤗᤥ॥

⁴²ᤂᤧᤏᤧ᤹ᤃ ᤛᤍᤠᤍᤡᤱ ᤀᤠᤒᤣᤗᤡ᤺ᤴ ᤁᤧᤄᤧᤵᤛᤢ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ. ᤁᤖ ᤀᤡᤱᤃᤠ᤹ ᤁᤵᤔᤥ ᤀᤠᤄᤡᤖᤡ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤕᤠᤵᤔᤡ ᤁᤧᤒᤠᤱᤄᤧᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤒᤠᤖᤥ॥”

⁴³ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤳᤋᤢ. “ᤗᤠᤈᤖᤛ᤻ᤛᤣ. ᤗᤠ᤺ᤰᤁᤠᤳ ᤗ᤺ᤴᤍᤧ᤹ᤀᤥ᥄”

⁴⁴ᤁᤧᤛᤡ᤺ᤒᤠ ᤗᤠᤈᤖᤛᤧᤴ ᤗᤠ᤺ᤰᤁᤠᤳ ᤗ᤺ᤴᤍᤧ. ᤂᤢᤏᤧ᤹ ᤁᤢᤗᤠᤱ ᤏᤢ ᤁᤢᤜᤢᤰᤜᤠ᤹ ᤆᤣᤍᤣ᤺ᤳᤋᤡᤸᤗᤧ ᤁᤢᤓᤠᤰ ᤁᤢᤓᤠᤰ ᤔᤧᤃᤡᤳᤋᤢᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤁᤢᤏᤠᤖᤠ᤺ᤴᤏᤠᤱ ᤆᤡᤖᤡᤰᤁᤡᤸᤗᤧ ᤔᤧᤍᤧᤵᤋᤢᤀᤠᤱ ᤐᤳᤇᤧᤖᤥ॥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤆᤣᤍᤣ᤺ᤳᤋᤡᤴ ᤑᤠ᤺ᤰᤂᤧᤶ ᤐᤡᤖᤧᤶᤔᤧ᤹ᤀᤠᤱ ᤐᤣ᤺ᤰᤗ ᤕᤠ᤺ᤴᤍᤧᤶᤔᤧ᤹॥”

⁴⁵ᤂᤧᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤔᤖᤡᤕᤔᤖᤧ ᤁᤢᤍᤢᤶᤛᤧ ᤁᤧᤍᤠ᤺ᤒᤠᤀᤠᤱ ᤁᤧᤘᤠ᤹ᤒᤠ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥

⁴⁶ᤁᤖ ᤁᤢᤓᤠ ᤔᤏᤠᤜᤠ᤹ᤃ ᤑᤖᤡᤛᤡᤜᤠ᤹ᤀᤥ ᤔᤧᤒᤣᤀᤠᤱ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤔᤧᤈᤧᤰᤋᤢᤛᤡ॥

⁴⁷ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤐᤠ᤺ᤴᤎᤰᤛᤧ ᤕᤜᤢᤍᤡ ᤕᤧᤈᤢᤶᤓᤥ ᤕᤢᤱᤔᤠ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤸᤗ ᤀᤠᤏᤡ᤹ ᤌᤣ ᤀᤠᤈᤥᤃᤢᤶᤒᤠᤒᤣ᥅ ᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤢᤛᤡ॥ ᤁᤴ ᤔᤏᤠ᤺ᤸᤗᤧᤃ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤆᤥᤃᤢᤖ ᤘᤠ᤹ᤖᤥ॥