SAM 55:10-23

¹⁰Sike kwakngaom ba zikaane supda temake tasibasiking gapmane engatangan sukukaing. Gatu you wanggapmane nanata gutonga ba waiaknga tasikaingunin.

¹¹Sike you wanggapma atangganu aminu kunduta kuku aminkat gatu sangaapanaat ngang yumdekan pasiwan maikaing. Sike gatu kepi banakan yuaingune ba paut tasikaing komune waamindakan notnaapa yanisapduke sanga wai tasiyamunangge natake yakaing.

¹²Sike iwanata wamu waiaknga apba naniwik. Undanga, na meya take gwaamumbit. Sike iwanata enake na apba tasiwan maiwitde yawik. Undanga, na kusopuwa meya waaknga nae dua apik.

¹³Siwan ngana iwana wena. Gakan. Nata gandupa notna siknga singgak. Siwan ngana tapitekngwamban iwana dakngake wai waaknga tasingamunggayak.

¹⁴Tupa niu unekan sukuke wamu yanggatake sukukumak. Sukuyuuk aminu kunduat Anutue yot gwenu kwaimune sukukumak.

¹⁵Gata katewi kungwak kakngae dua nataaing ngana waakngata iwana apu papsok. Papan ninu kayuk take yuamang ngang yakaing ngana nata nataau gapmaatang gwa kupsa aminda yuaing katang pukuningge nataat. Dasingge, aminu waakwakga yotnaatang yuke waiaknga kundu pasikaing.

¹⁶Sike na Anutu yatawamba ita gatangamunggak. Siwana ita na gatu tanggak.

¹⁷Sike tembana gatu kepmaom gatu zikaane kuut, meyata tasiwan mainggatde sitawanggat. Siwan ita nae tumuu atnataak.

¹⁸Aminbamda nae amak tasikaing. Siwan ngana na meya dua kaat. Dasingge, Anututa nanduyuke na gatuna nanitakapunggak.

¹⁹Anutu tupa siknga king kapa binga yukut. Ge apman kaya ina unzakan king kapa ayuak. Sike ita nae tumuk wama natake ita gakngau iwanata amak gwekatang tasikaing kaknga natake ayapbimbik. Waakwau ie dua gwaukaing. Dua gwauke musia dua tapatekngamban kepi wai tawakaingu dua siknga tening.

²⁰Natane notna siknga amau inane notna akwakat amakaing. Sike wamu minaka tasinangge tupa waakwakat yawan kekekakuu, ina gwa zipbukut.

²¹Sike genanetanu wamu kaa siknga yanggak. Siwan ngana baniatangu amak tasinangge nataak. Wamu yanggakga tasiwan ninu musip kwikwik yuamang. Siwan ngana wamna toknga siknga bainat dakatane genaaknga binga, ninu ita nisipmanggak.

²²Siwan ngana gata meya gwaamumbiyau, wa gata Buyambam tapatane katakngine peyo. Pewi ita gwaamuke ga tapan kekekaya. Sike ita dua kapewan sanga takngatuta noman aminu pasiwan maining.

²³Siwan ngana Anutu, ga amin wai tasikaing aminu kaipakepi gapma gupna bukataning gapmane pukunong. Aminu amin zipnangge tasikaing amikat gatu aminu tanzit tasikaing amikatda tapduknga wena dua siawan ngana waakwau akumning. Siwan ngana ninan, gae baniu kekeknga asinggan siwit.